އެމްޖީ ސްޕޯޓްސް ކްލަބާއި ފިއޮންޓީ ސްޕޯޓްސް އެކެޑަމީ ގުޅިގެން ކ. ކާށިދޫގައި ކުރިއަށް ގެންދާ ފުޓްބޯޅަ އެކަޑަމީގެ ހަރަކާތް ރަސްމީކޮށް ފެށުމުގެ ރަސްމިއްޔާތު ހޮނިހިރު ދުވަހުގެ ހަވީރު ބާއްވައިފިއެވެ.

ކާށިދޫ ފުޓްބޯޅަ ދަނޑުގައި ބޭއްވި މިރަސްމިއްޔާތުގެ ޝަރަފްވެރި ކޮށްދެއްވީ ފުޓްބޯޅަ އިން ދިވެހިރާއްޖެއަށް އެންމެ ފުރަތަަމަ ރަންމެޑަލް ހޯދައިދިން ކެޕްޓަން އަސްއަދު އަބްދުލްޣަނީ އެވެ.

އަދި މިރަސްމިއްޔާތުގައި ޚާއްސަ މެހެމާނެއްގެ ގޮތުގައި މިވަގުތު ރާއްޖޭގައި ހުރި އެންމެ ހުނަރުވެރި އެއް ފުޓްސަލް ކުޅުންތެރިޔާ އަޔާޒު އަހުމަދު ވެސް ވަނީ ބައިވެރިވެފައެވެ. އަދި މިރަސްމިއްޔާތް ހޯސްޓް ކޮށްދެއްވީ ރާއްޖޭގެ މުނިފޫހިފިލުވުމުގެ ދާއިރާގައި ވަރަށް މަޝްހޫރު ފަންނާނެއް ކަމަށްވާ ނާޒިރު ޝިހާމް (ކާއްޓޭ) އެވެ.

Advertisement

ރަސްމިއްޔާތުގެ ޝަރަފްވެރި މެހެމާން އަސްއަދު އަބްދުލްޣަނީ 

މީގެ އިތުރުން މިރަސްމިއްޔާތުގައި ފިއޮންޓީ ސްޕޯޓްސް އެކެޑަމީ ރައީސް މުހައްމަދު ނިޒާމް (ނިޒާމްބެ) އާއި ކާށިދޫ ކައުންސިލްގެ މެންބަރުންގެ އިތުރުން އެކަޑަމީގައި ރަޖިސްޓަރީ ކުރެވިފައިވާ ކުދިންގެ ބެލެނިވެރިން ބައިވެރިވެލެއްވިއެވެ.

ފިއޮންޓީ ސްޕޯޓްސްގެ ރައީސް މުހަންމަދު ނިޒާމް 

މިރަސްމިއްޔާތުގައި ވާހަކަފުޅުދައްކަވަމުން ނިޒާމް ފާހަގަކުރެއްވި ގޮތުގައި ކާށިދޫގެ މުއައްސަސާތަކާއި ކުލަބު ޖަމިއްޔާތަކުގެ ފަރާތުން މިކަމުގައި ފެނިގެންދިޔައީ އެހެން އެއްވެސް ރަށަކުން ނުފެންނަފަދަ އެކުވެރިކަމެކެވެ. ހާއްސަކޮށް ސްކޫލްގެ ޕްރިންސިޕަލް އަދި ކާށިދޫ ޕޮލިސް ސްޓޭޝަންގެ އިންޗާޖްގެ ފަރާތުން ލިބުނު އެއްބާރުލުން ނިޒާމްގެ ވާހަކައިގައި ފާހަގަކުރެއްވިއެވެ. 

ކާށިދޫ ކައުންސިލްގެ ރައީސް 

އިތުރަށް ވާހަކަދައްކަމުން ނިޒާމް ވިދާޅުވީ މި އެކަޑަމީ ހިންގުމުގައި ފިއޮންޓީ ސްޕޯޓްސްގެ ދައުރަކީ އެމްޖީ ސްޕޯޓްސް ކުލަބުން ބޭނުންވާ ޓެކްނިކަލް ސަޕޯޓް ފޯރުކޮށްދިނުން ކަމުގައެވެ. އެގޮތުން އެކަޑަމީގެ ޓްރެއިނިންގް ޕްރޮގުރާމް ތައްޔާރުކުރުމުގެ އިތުރުން އެކަޑަމީއަށް ބޭނުންވާ ކޯޗުން ތަމްރީނުކުރުން ހިމެނެއެވެ.

އެގޮތުން މިހާރުވެސް ކުރިއަށް ގެންދެވުނު ތަމްރީނު ޕްރޮގްރާމްތަކުގެ ތެރެއިިން ކޯޗުންގެ ގޮތުގައި ޝައުގުވެރިކަން ހުރި ވަރަށް ގާބިލް ކޯޗުންތަކެއް އެރަށުން ފެނިގެން ގޮސްފައިވާތީ، ލ އުފާކުރާ ކަމަށް ނިޒާމް ވިދާޅުވިއެެވެ. އަދި އެ އެކަޑަމީގައި މިހާރު ތިބި ކުދިންގެ ތެރެއިންވެސް ވަރަށް ހުނަރުވެރި ކުޅުންތެރިންތަކެއް ފެނިގެން ގޮސްފައިވާ ކަމަށާ އޭނާ އެންމެ ދެކެން ބޭނުންވާ ދުވަހަކީ އެ އެކެޑެމީގެ ތެރެއިިން ތަމްރީނުވެގެން ނުކުންނަ ކުޅުންތެރިންގެ ތެރެއިިން ކުއްޖަކު ގައުމީ ޓީމުގައި ހިމެނި ރާއްޖެއިން ބޭރުން ރަންމެޑަލާއި އެކު ކާށިދޫ ފަސްގަނޑަށް އަންނަ ދުވަހެއް ކަމަށް އޭނާ ވިދާޅުވި އެވެ.

ރަސްމިއްޔާތުގެ ޝަރަފްވެރި މެހެމާން އަސްއަދު އަބްދުލްޣަނީ 

މީގެ އިތުރުން މިރަސްމިއްޔާތުގެ ޝަރަފްވެރި މެހެމާން އަސްއަދު އަބްދުލްޣަނީ ކާށިދޫ ކައުންސިލްގެ ރައީސް ވެސް ވަނީ ބައިވެރިންނާއި މުހާތަބު ކުރައްވާ ވާހަކަފުޅު ދައްކަވާފައެވެ.