ގދ. ތިނަދޫގެ ރަށްވެހިކަން ދޫކޮށްލާ މީހުންގެ އަތުން 5000 ރުފިޔާގެ ފީއެއް ނަގަން އެ ރަށު ކައުންސިލުން ނިންމި ނިންމުން ގާނޫނުއަސާސީއާ ހިލާފު ކަމަށް ނިންމައި އެ ނިންމުން ބާތިލްކުރަން ޖެހޭ ކަމަށް ލޯކަލް ގަވަމެންޓް އޮތޯރިޓީން ނިންމައިފި އެވެ.

ތިނަދޫ ރަށްވެހިކަން ދޫކޮށް އެހެން ރަށްރަށަށް މީހުން ބަދަލުވުމަކީ ތިނަދޫ ސިޓީގެ އާބާދީގެ އަދަދަށް ނުރަނގަޅު އަސަރެއް ކުރާ ކަމެއްކަމަށް ބުނެ، ރަށްވެހިކަން ދޫކޮށްދާ ފަރާތްތަކުގެ އަތުން 5000 ރުފިޔާގެ ޖޫރިމަނާއެއް ނެގުމަށް ނިމިދިޔަ ހަފްތާ ތެރޭގައި ވަނީ އެ ކައުންސިލުން ނިންމާފައެވެ. 

މިކަމާއި ގުޅިގެން އެލްޖީއޭއިން މިއަދު ނެރުނު ބަޔާނެއްގައި ބުނެފައިވަނީ މީހުން ދިރިއުޅޭ ކޮންމެ ރަށެއްގައި ވަޒަންވެރި ވުމާއި، އެއް ރަށުން އަނެއް ރަށަަށް ހިޖުރަ ކުރުމަކީ ދިވެހި ކޮންމެ ރައްޔިތަކަށްވެސް ގާނޫނު އަސާސީން ލިބިދޭ ހައްގެއް ކަމަށެވެ. 

އަދި އެފަދަ ހައްގެއް ހިފެހެއްޓޭނީ ގާނޫނު އަސާސީއާ ތަޢާރުޒު ނުވާ ގޮތުގެ މަތީން، ރައްޔިތުންގެ މަޖިލީހުން ފާސްކުރާ ގާނޫނަކުން ކަމަށްވެސް ބުނެފައިވެއެވެ.

މީގެ އިތުރުން، ލާމަރުކަޒީ ގާނޫނުގައި ވެސް އެއްވެސް ޝަރުތެއް ނެތި އެއް ރަށުން އަނެއް ރަށަށް ރަށްވެހިކަން އެއްވެސް ތަފާތުކުރުމެެއް ނެތި ބަދަލުކުރެވޭނެ ކަމަށް ބަޔާން ކޮށްފައިވާކަން އެލްޖީއޭގެ ބަޔާނުގައި ފާހަގަކޮށްފައިވެއެވެ.

އެހެންކަމުން ގދ. ތިނަދޫގެ ރަށްވެހިކަން ދޫކޮށްލާ މީހުންގެ އަތުން 5000 ރުފިޔާގެ ފީއެއް ނަގަން އެ ރަށު ކައުންސިލުން ނިންމި ނިންމުން ގާނޫނުއަސާސީއާ ހިލާފު ކަމަށާ، އެ ނިންމުން ބާތިލްކުރަން ޖެހޭ ކަމަށް އެލްޖީއޭގެ ބޯޑުން ނިންމާފައިވާ ކަމަށްވެސް އެ ބަޔާނުގައި ވެއެވެ.