އެމްޕީއެލް ދެ ވަނަ ޑިވިޝަން ފުޓްބޯޅަ މުބާރާތުގައި، ބުދަ ދުވަހު ހަވީރު ގުރޫޕް ސީގައި، ލޮރެންޒޯ ސްޕޯޓްސް ކްލަބާއި ދެކޮޅަށް ކުޅުނު މެޗު ފަސޭހަކަމާއި އެކު 8-0 ގެ ތަފާތުބޮޑު ނަތީޖާއަކުން ވިކްޓަރީ ސްޕޯޓްސް ކުލަބުން ކާމިޔާބުކޮށްފި އެވެ.

މިއަހަރުގެ ދެވަނަ ޑިވިޝަން ފުޓްބޯޅަ މުބާރާތަށް އެންމެ ރަނގަޅަށް ތައްޔާރުވި އެއް ޓީމަކީ ވިކްޓަރީ ސްޕޯޓްސް ކުލަބެވެ. އަދި އެޓީމުން ވަނީ މުބާރާތުގައި ކުޅުނު ފުރަތަަމަ މެޗުގައި 3-0 ގެ ނަތީޖާއަކުން ކުލަބް ޕީކޭ އަތުން މޮޅުވެފައެވެ.

މެޗުގެ ފުރަތަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅެ މެޗު ޑޮމިނޭޓުކުރީ ވިކްޓަރީ ސްޕޯޓްސް ކުލަބުން ނެވެ. އެގޮތުން މިހާފުގައި އެޓީމުން ފަސް ލަނޑު ކާމިޔާބުކުރިއިރު، މެޗުގެ ފުރަތަަމަ ލަނޑު 11 ވަނަ މިނެޓުގައި ކާމިޔާބުކޮށްދިނީ ތަޖުރިބާކާރު މިޑްފިލްޑަރު އުމެއިރު އެވެ.

Advertisement

މިއީ އެޓީމަށް ލިބުނު ކޯނަރެއްގައި ކިރްގިސްތާން މިޑްފީލްޑަރު، އަނަޓޯލީ ވްލަޝީޗޭފް ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. އަދި އެޓީމުގެ ދެވަނަ ލަނޑު މެޗުގެ 27 ވަަނަ މިނިޓްގައި ކާމިޔާބުކޮށްދިނީ ބެލަރޫސް ފޯވާޑް، އިވާން ވެރާސް އެވެ. މިއީ އެޓީމުގެ އަނަޓޯލީ ހުރަސްކޮށް ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. އަދި އޭގެ ހަތަރު މިނެޓް ފަހުން އެޓީމުގެ ތިންވަނަ ލަނޑު ކާމިޔާބުކޮށްދިނީ އިވާން އެވެ. އަދި އެޓީމުގެ ހަތަރުވަނަ ލަނޑު ފުރަތަމަ ހާފުގެ 34 ވަނަ މިނެޓުގައި ކާމިޔާބުކޮށްދިނީ ފާރޫކް ހައިދަރޯފް އެވެ.

މިމެޗުގައި ވިކްޓަރީ އިން ކާމިޔާބުކުރި ފަސްވަނަ ލަނޑު ފުރަތަަމަ ހާފުގެ 40 ވަނަ މިނެޓުގައި ކާމިޔާބުކޮށްދިނީ އުމެއިރު އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 5-0 ގެ ނަތީޖާއަކުން ވިކްޓަރީ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވިކްޓަރީ އިން އިތުރު ތިން ލަނޑު ކާމިޔާބުކުރިއިރު، ދެވަނަ ހާފު ފެށިގެން 6 ވަނަ މިނެޓުގައި އުމެއިރު ވަނީ އެޓީމުގެ 6 ވަނަ ލަނޑު ކާމިޔާބުކޮށްދީ މި މެޗުގައި އޭނާގެ ހެޓްރިކް ފުރިހަމަކޮށްފައެވެ. އަދި އެޓީމުގެ 7 ވަނަ ލަނޑު ފަހުހާފުގެ 67 ވަނަ މިނެޓުގައި ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް އިބްރާހިމް ރިޒްހާން (ރިޒްކޯ) އެވެ. މިއީ އެޓީމުގެ މޫސާ ޔާމީން (ޔާމްބެ) ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މިމެޗުގައި ވިކްޓަރީން ގެ 8 ވަނަ ލަނޑު މެޗުގެ ފަހު މިނިޓްގައި ކާމިޔާބުކޮށްދިނީ އަނަޓޯލީ އެވެ. މިއީ އެޓީމަށް ލިބުނު ކޯނަރެއްގައި އޭނާ ކާމިޔާބުކޮށްދިން ލަނޑެކެވެ. މިލަނޑާއެކު މެޗުގެ ކުޅުން ނިމިގެންދިޔައީ 8-0 ގެ ނަތީޖާއަކުން ވިކްޓަރީ ކުރީގައި އޮވެގެންނެވެ.

މިމެޗުން ލިބުނު ތިން ޕޮއިންޓާއެކު ކުޅުނު ދެ މެޗުން ވެސް މޮޅުވެ 6 ޕޮއިންޓާއެކު ގުރޫޕް ސީގެ އެއްވަނާގައި މިވަގުތު އޮތީ ވިކްޓަރީ އެވެ.