މިހާރު މާލެއަށް ކުރަމުންދާ ވިއްސާރައިގައި ހުޅުމާލެ ސަހަރާގައި ފެންބޮޑުވެ، މީހުން ވަޅުލުން ވަގުތީގޮތުން މާލޭ ގަލޮޅު އާސަހަރާއަށް ބަދަލުކޮށްފިއެވެ.

ދާދިފަހުންވެސް މާލެ ސަރަހައްދަށް ކުރި ވިއްސާރައިގައި ހުޅުމާލޭ ސަހަރާގައި ފެން ބޮޑުވެ، ވަޅު ކޮނުމަށް ދަތިވެ، މީހުން ވަޅު ނުލެވިގެން، މީހުން ވަޅުލުމުގެ މަސައްކަތް މާލެއަށް ބަދަލު ކޮށްފައި ވެއެވެ.  

މިކަމާއި ގުޅިގެން މާލޭ ސިޓީ ކައުންސިލްގެ ހުޅުމާލޭ ދާއިރާގެ މެންބަރު އިބްރާހީމް ޝުޖާއު މިއަދު އެކްސްގައި ކޮށްފައިވާ ޕޯސްޓެއްގައި ވަނީ، ހުޅުމާލެ ސަހަރާ މިސްކިތުގެ ގޯތިތެރޭ ފެންބޮޑުވެ، ހިނަވާގެ ހިމެނޭ ސަރަހައްދަށް ވެސް ފެނުގެ އަސަރުކުރާ ހާލަތްތައްވެސް އަންނަކަން ފާހަގަކުރައްވާފައެވެ.

އެހެން ކަމުން އެ މައްސަލައަށް ދާއިމީ ހައްލެއް ހޯދުމަށް ސަހަރާ މިސްކިތުގެ ގޯތިތެރޭގައި ފެން ހިންދޭނެ ރަނގަޅު ނިޒާމެއް ގާއިމުކުރުމުގެ މަސައްކަތް ވަރަށް އަވަހަށް ފެށިގެން ދާނެކަމަށް އޭނާ ވިދާޅުވިއެވެ.

އަދި އެ މަސައްކަތާއެކު ޖަނާޒާ ތަކަށް އަންނަ ރައްޔިތުންނަށް ފަސޭހަކޮށް ދިނުމާއި، ސަހަރާ މިސްކިތުގެ ފާޚާނާ ބޭނުންކުރާ ރައްޔިތުން އިތުރުވަމުން ދާތީ، އިތުރު 4 ފާނާޚާ (ފިރިހެނުންނަށް ޚާއްޞަ 2ފާޚާނާ، އަންހެނުންނަށް 2 ޚާއްޞަ ފާޚާނާ، އާ ވުޟޫ ކުރެވޭގޮތައް) ހެދިގެން ދާނެ ކަމަށް އޭނާ ވިދާޅުވި އެވެ. 

މީގެ އިތުރުން ހިނަވާ ގެއަށް ވަންނައިރު އޮޅިގަނޑު ގައި ފައި އަޅައިގަނެ ތަފާތު އަނިޔާ ބައެއް ރައްޔިތުންނަށް ލިބެމުންދާކަމުގެ ޝަކުވާ ލިބެމުންދާތީ، އެ އޮޅިގަނޑު ނަގައި މައްޔިތާގެ މޫނު ދެކެލުމަށް ވަންނަ ފަރާތްތަކަށް ލުއި ފަސޭހަ ގޮތަކަށް ބަދަލު ކުރެވިގެން ދާނެ ކަމަށްވެސް އޭނާ ވިދާޅުވި އެވެ. 

މާލޭ ސަރަހައްދަށް މިއަދު ކުރާ ވިއްސާރާގައި ހުޅުމާލޭ އާއި މާލޭގެ މަގުތަކުގައި ވެސް ވަނީ ފެން ބޮޑުވެފައެވެ. އަދި ފެން ހިންދުމުގެ މަސައްކަތް ސިފައިން އަންނަނީ ކުރަމުންނެވެ.