ކުލަގަދަ ރަސްމިއްޔާތަކާއެކު ހޮނިހިރު ދުވަހުގެ ރޭ އައިވަރީ ކޯސްޓުގައި ފެށި އެފްރިކަން ކަޕް އޮފް ނޭޝަންސްގެ ފުރަތަަމަ މެޗުގައި 2-0 ގެ ނަތީޖާއަކުން ގިނީ ބިސާއު ބަލިކޮށް އަމިއްލަ ސަޕޯޓަރުންގެ ކުރިމަތީގައި އައިވަރީ ކޯސްޓުން މުބާރާތްގެ ފެށުން ރަނގަޅުކޮށްފި އެވެ.

މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅެ އައިވަރީ ކޯސްޓުން މެޗު ޑޮމިނޭޓުކުރި އިރު، މެޗު ފެށިގެން ހަތަރުވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ އަލް ނަސްރުގެ މިޑްފީލްޑަރު ސެކޯ ފޮފާނާ އެވެ. މިއީ އެޓީމުގެ އަލް ހިލާލް މިޑްފީލްޑަރު ފްރެންކް ކެސީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މީގެ އިތުރުން ވެސް މިހާފުގައި އެޓީމުން ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފު ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން އައިވަރީ ކޯސްޓް ކުރީގައި އޮވެގެންނެވެ.

މެޗުގެ ދެވަަނަ ހާފު ވެސް ވަރުގަދަކޮށް ފެށީ އައިވަރީ ކޯސްޓުން ނެވެ. ނަތީޖާއެއްގެ ގޮތުން ފަހުފާފުގެ 58 ވަނަ މިނެޓުގައި އެޓީމުން ވަނީ އިތުރު ލަނޑެއް ކާމިޔާބުކޮށް ލީޑު ފުޅާކޮށްފައެވެ. މިލަނޑު އެޓީމަށް ކާމިޔާބުކޮށްދިނީ ފޯވާޑް ޖީން ފިލިޕް ކްރަސޯ އެވެ.

އައިވަރީ ކޯސްޓުގެ ދެވަނަ ލަނޑަށްފަހު ގިނީ ބިސާއު އިން ވަނީ އެޓީމުގެ ކުޅުން ރަނގަޅުކޮށް ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 2-0 ގެ ނަތީޖާއަކުން އައިވަރީ ކޯސްޓް ކުރީގައި އޮވެގެންނެވެ.

މިމެޗުން ލިބުނު ތިން ޕޮއިންޓާއެކު ގުރޫޕް އޭގެ އެއްވަނައިގައި މިވަގުތު އޮތީ އައިވަރީ ކޯސްޓް އެވެ. މިގުރޫޕްގައި ގިނީ ބިސާއު އާއި އައިވަރީ ކޯސްޓުގެ އިތުރުން ދެން ހިމެނެނީ ނައިޖީރިއާ އަދި އިކުއެޓޯރިއަލް ގިނީ އެވެ.

މިމުބާރާތުގައި މިރޭވެސް ދެ މެޗު ކުޅުމަށް ވަނީ ހަމަޖެހިފައެވެ. އެގޮތުން 19:00 ގައި ގްރޫޕް އޭގެ ނައިޖީރިއާ އާއި އިކުއެޓޯރިއަލް ގިނީ ވާދަކުރާއިރު، 22:00 ގައި މިސްރު ނުކުންނާނީ މޮޒަމްބިކް އާއި ދެކޮޅަށެވެ.