މިހާރުގެ ރައީސުލް ޖުމުހުރިއްޔާ ޑރ. މުހައްމަދު މުއިއްޒުގެ ފުރަތަމަ ރިޔާސީ ބަޔާން އިއްވާ ޖަލްސާ ނުވަތަ 19 ވަނަ ރައްޔިތުން މަޖިލީހުގެ މިއަހަރުގެ ފުރަތަމަ ޖަލްސާ އަންނަ ފެބުރުއަރީ މަހުގެ 5 ވަނަ ދުވަހު ބޭއްވުމަށް މަޖިލީހުގެ ރައީސް، އޮނަރަބަލް މުޙައްމަދު އަސްލަމް ނިންމަވައިފިއެވެ.
ދިވެހިރާއްޖޭގެ ޤާނޫނު އަސާސީގައި ވާ ގޮތުން ކޮންމެ އަހަރެއްގެ ރައްޔިތުންގެ މަޖިލިހުގެ ފުރަތަމަ ދައުރުގެ ފުރަތަމަ ޖަލްސާގައި ޤައުމުގެ ހާލަތު ބަޔާންކޮށްދީ އަދި ޤައުމުގެ ހާލަތު އިތުރަށް ރަނގަޅު ކުރުމަށްޓަކައި ކުރަންޖެހޭ ކަމަށް ރައީސުލްޖުމްހޫރިއްޔާ އަށް ފެންނަ ކަންތައްތަކުގެ މައްޗަށް އެކުލެވޭ ރިޔާސީ ބަޔާނެއް ރައްޔިތުންގެ މަޖިލިހަށް އިއްވަން ވާނެ އެވެ.
އެގޮތުން މިއަހަރުގެ މި ޖަލްސާ ވެގެން ދާނީ ދިވެހި ޖުމުހުރިއްޔާގެ 8 ވަނަ ރައިސްގެ ގޮތުގައި މިދިޔަ ނޮވެމްބަރ މަހު ރައީސްކަމުގެ ހުވާކުރެއްވި ރައީސް ޑރ. މުހައްމަދު މުއިއްޒުގެ އެންމެ ފުރަތަމަ ރިޔާސީ ބަޔާނަށެވެ.
ރައްޔިތުންގެ މަޖިލިހުގެ ޢިދާރާއިން މީޑިޔާތަކަށް ފޮނުވާފައިވާ ނޯޓްގައިވާ ގޮތުން އަންނަ މަހުގެ 5 ވާ ހޯމަ ދުވަހުގެ 9.00 އަށް ރައްޔިތުން މަޖިލިސް ހުޅުވުމަށް ބާއްވާ ޖަލްސާ ޝެޑިޔުލުކޮށް ޖަލްސާއަށް ވާން ޖެހޭ ތައްޔާރީތައް ވަނީ ފަށާފައެވެ.
މިއަހަރަށް ރައްޔިތުންގެ މަޖިލީހުގެ ޖަލްސާތައް ފެށިގެން ދާއިރު މަޖިލިހުން ނިންމަން ޖެހޭ މުހިއްމު މަސައްކަތްތަކެއް އެބަހުއްޓެވެ. އެގޮތުން އެންމެ ބޮޑަށް ފާހަގަކޮށްލެވޭ ކަމަކީ މި ސަރުކާރުގެ ވަޒީރުންގެ މަޖިލިހަށް ރުހުން ދިނުމުގެ މައްސަލައެވެ.
Advertisement
This content is created and paid for by advertisers and does not involve Voice Journalists
