އައިވަރީ ކޯސްޓުގައި މިހާރު ކުރިއަށްދާ އެފްރިކަން ކަޕް އޮފް ނޭޝަންސް ގުރޫޕް އޭގައި އާދިއްތަ ދުވަހުގެ އެކުއަޓޯރިއަލް ގިނީ އާއި ނައިޖީރިއާ އާއި ވާދަކުރި މެޗު 1-1 ގެ ނަތީޖާއަކުން ދެޓީމް އެއްވަރުވެއްޖެ އެވެ.

ނައިޖީރިއާ އިން އެންމެ ފަހުން ކުޅުނު ފަސް މެޗުގެ ތެރެއިިން އެޓީމު މޮޅުވެފައި ވަނީ އެންމެ މެޗަކުންނެވެ. އަދި އެއްމެޗުން އެޓީމު ބަލިވެފައިވާއިރު ތިން މެޗު ނިމިފައި ވަނީ އެއްވަރުވެގެންނެވެ. ނަމަވެސް މިދެޓީމު އެންމެ ފަހުން ކުޅުނު ތިން މެޗުން ވެސް މޮޅުވެފައި ވަނީ ނައިޖީރިއާ އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ އެކުއަޓޯރިއަލް ގިނީ އިންނެވެ. މިލަނޑު ފުރަތަމަ ހާފުގެ 36 ވަނަ މިނެޓުގައި ކާމިޔާބުކޮށްދިނީ އެޓީމުގެ ފޯވާޑް އިބާން ސަލްވަޑޯ އެވެ. މިއީ އެޓީމުގެ މިޑްފިލްޑަރު ހޯސޭ މެކިން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ނަމަވެސް އޭގެ ދެމިނެޓު ފަހުން ނައިޖީރިއާ އިން ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ. މިލަނޑު އެޓީމަށް ކާމިޔާބުކޮށްދިނީ ނަޕޯލީގެ ފީވާޑް ވިކްޓަރ އޯސިމެން އެވެ. މިއީ އެޓީމުގެ އެޓްލާންޓާ ފީވާޑް އެޑެމޯލާ ލުކްމޭން ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ވެސް ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު މިހާފުގައި ނައިޖީރިއާ އިން ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މިނަތީޖާއާއެކު ގުރޫޕް އޭގެ އެއްވަނައިގައި މިވަގުތު އޮތީ ފުރަތަަމަ މެޗުގައި ގިނީ ބިސާއު އަތުން 3-0 ގެ ނަތީޖާއަކުން މޮޅުވި އައިވަރީ ކޯސްޓު އެވެ. އެޓީމަށް ތިން ޕޮއިންޓް ލިބިފައިވާއިރު ނައިޖީރިއާ އަދި އެކުއަޓޯރިއަލް ގިނީ މިއިން ކޮންމެ ޓީމަކަށް ލިބިފައިވަނީ އެއް ޕޮއިންޓެވެ. އަދި މި ގުރޫޕްގެ ފުލުގައި އޮތް ގިނީ ބިސާއު އަށް އަދި ޕޮއިންޓެއް ނުލިބެއެވެ.