އަދުގެ ރައީސުލް ޖުމުހޫރިއްޔާ ޑރ. މުހައްމަދު މުއިއްޒުގެ ތަސައްވުރަކީ ވެލާނާ އިންޓަނޭޝަނަލް އެއާޕޯޓުގައި މިއަދު ހުޅުވި ކާގޯ ޓާމިނަލް އަދިވެސް ބޮޑުކޮށް، ރާއްޖޭގެ ޓްރޭޑް ޑެފިސިޓް ނުވަތަ އިމްޕޯޓާއި އެކްސްޕޯޓްގެ ފަރަގު ކުޑަކުރުންކަމަށް އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ވެލާނާ އިންޓަނޭޝަންލް އެއާރޕޯރޓް ވީއައިއޭގެ އައު ކާގޯ ޓާމިނަލް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ސައީދު ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާއި ހަވާލުވެވަޑައިގަތް ދުވަހުން ފެށިގެން އިންތިޤާލީ މަރުހަލާގައިވެސް ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމުގެ މަސައްކަތާއި މިހާރު ކުރިއަށްދާ މުހިއްމު މަޝްރޫޢުތައް ވަރަށް ގާތުން ބެއްލެވިކަމަށެވެ.
އެގޮތުން އެއަރޕޯޓަށް ވަޑައިގެން 2 ގަޑިއިރުވަންދެން އެއަޕޯޓްގެ އިންސްޕެކްޝަންއެއް ހެއްދެވުމަށްފަހު، ވީ އެންމެ އަވަހަކަށް މަސައްކަތް ނިންމާ ޚިދުމަތަށް ގެނައުމަށް ކުރަންޖެހޭ މަސައްކަތްތައް ކުރުމަށް ރައީސުލްޖުމްހޫރިއްޔާ އިރުޝާދުދެއްވިކަމަށެވެ.
ސައީދު އިތުރަށް ވިދާޅުވި ގޮތުގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ތަސައްވަރަކީ ޓާމިނަލްގެ ކެޕޭސިޓީ އަދިވެސް އިތުރުކޮށް، މިހާރުން މިހާރަށް މަސައްކަތް ފަށައި ކާގޯ ޓަމިނަލްއިން މުދާ ހޭންޑަލްކުރެވޭ އަދަދު 3 ލައްކަ ޓަނަށް އިތުރުކުރުން ކަމަށެވެ.
"މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން އުފެއްދުމާއެކު މިފަދަ ދައުވަތުތައް އައިސް، މިނިވަން ވިޔަފާރީގެ ބޮޑު ބާޒާރުގައި ބައިވެރިވެވި ކާގޯ ޓާމިނަލް 3 ލައްކަ މެޓްރިކް ޓަނަށް ބޮޑު ކުރެވުމަކީ ރާއްޖޭގެ ޓްރޭޑް ޑެފިސިޓް، 3.48 ބިލިޔަން ރުފިޔާގެ އިމްޕޯޓް، 300 މިލިޔަން ރުފިޔާގެ އެކްސްޕޯޓް ގެޕްއަށް ހައްލެއް ހޯދުމަށްޓަކައި ރައީސުލްޖުމްހޫރިއްޔާއަކަށް ނިންމެވޭނެ އެންމެ ވިޝަނަރީ ނިންމެވުން. އަދި ރާއީސްގެ ވިޝަން ކާމިޔާބުކުރުމަށްޓަކައި މުޅި ސަރުކާރު މަސައްކަތް ކުރައްވާނެ."
މިއަދުގެ މިރަސްމިއްޔާތުގައި ރައީސަށް ވަރަށް ބޮޑަށް ތަޢުރީފް ކުރައްވަމުން ސަޢީދު ވިދާޅުވިއެވެ.
މިއަދުގެ ރަސްމިއްޔާތުގައި ސައީދު އިތުރަށް ފާހަގަ ކުރެއްވި ގޮތުގައި އެއަރޕޯޓް ބޮޑުކުރުމުގެ މަޝްރޫޢުއާއެކު ރާއްޖޭގެ އިޤްތިޞާދު 6 ބިލިޔަން އެމެރިކާ ޑޮލަރުން 12 ބިލިޔަން އެމެރިކާ ޑޮލަރަށް މަތިކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ގެންގުޅުއްވާ ތަސައްވުރަށް ވާސިލްވެވޭނެކަމަށް ޔަގީންކުރައްވާކަމަށެވެ.
މިއަދު ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހުޅުވައިދެއްވި އެއަރޕޯޓްގެ އައު ކާގޯ ޓަރމިނަލަކީ އަހަރެއްގެ މައްޗަށް 120،000 ޓަނުގެ މުދާ ހޭންޑަލް ކުރެވޭ ކެޕޭސިޓީގެ ޓަރމިނަލެކެވެ. އެހެންކަމުން ޒަމާނީ ވަސީލަތްތަކާއެކު ތަރައްޤީކޮށްފައިވާ އައު ކާގޯ ޓަރމިނަލަކީ އެއަރޕޯޓްގައި މިހާތަނަށް ބޭނުންކުރަމުންދިޔަ 50000 ޓަނުގެ ކެޕޭސިޓީގެ ކާގޯ ޓާމިނަލާއި އަޅާބަލާއިރު 2 ގުނަ ބޮޑު ޓަރމިނަލަކެވެ.
Advertisement
This content is created and paid for by advertisers and does not involve Voice Journalists
