ދުނިޔޭގެ ފުޓްބޯޅަ މައި އިދާރާ ފީފާއިން ހޮވި 2023 ވަނަ އަހަރުގެ އެންމެ މޮޅު ފިރިހެން ފުޓްބޯޅަ ކުޅުންތެރިޔާގެ މަގާމު އާޖެންޓީނާގެ ކެޕްޓަން ލަޔޮނަލް މެސީ ހޯދައިފިއެވެ.
އިގިރޭސިވިލާތުގެ ވެރިރަށް ލަންޑަނުގައި ހޯމަދުވަހުގެ ރޭ ބޭއްވި އެވޯޑް ހަފްލާގައި 2023 ވަނަ އަހަރުގެ އެންމެ މޮޅު ކުޅުންތެރިޔާގެ މަގާމު މެސީ ހޯދީ ޕީއެސްޖީގެ ފްރާންސް ފޯވާޑް ކިލިއަން އެމްބާޕޭ އަދި މެންޗެސްޓާ ސިޓީގެ ނޯވޭ ފޯވާޑް އެރްލިންގް ހާލަންޑް އާއި ވާދަކޮށް ކުރި ހޯދައިގެންނެވެ. އަދި މިއީ މިއެވޯޑް މެސީ ހޯދި ތިންވަނަ ފަހަރެވެ.
ވޯޓްލީ މީހުންގެ ތެރެއިން ގައުމީ ޓީމުގެ ކެޕްޓަނުންނާއި މީޑިއާގެ ބައިން މެސީއަށް 13 ޕޮއިންޓް ލިބުނު އިރު ހާލަންޑަށް މިދެބައިން ލިބުނީ 11 ޕޮއިންޓެވެ. އަދި ކޯޗުން ނާއި ކުޅިވަރު ނޫސްވެރިންގެ ބައިން ހާލަންޑް 13 ޕޮއިންޓް ހޯދިއިރު، މި ދެބައިން ވެސް މެސީއަށް ލިބުނީ 11 ޕޮއިންޓެވެ. މިއާއެކު ދެ ކުޅުންތެރިންނަށް ވެސް ވަނީ 48 ޕޮއިންޓް ލިބިފައެވެ. އަދި ތިންވަނަ ހޯދި އެމްބާޕޭ އަށް ޖުމްލަ ލިބުނީ 35 ޕޮއިންޓެވެ.
މިއާއެކު މެސީ އަށް އެވޯޑް ލިބުނީ ވޯޓްލީ މީހުންގެ ތެރެއިން އެންމެ ގިނަ ބައެއްގެ ފުރަތަަމަ ޗޮއިސްގެ ގޮތުގައި ވޯޓްލާފައި ވަނީ މެސީއަށް ކަމަށް ވާތީއެވެ.
Advertisement
This content is created and paid for by advertisers and does not involve Voice Journalists
