ރާއްޖޭގެ ރައްޔިތުން މަޖިލިހާއި ގާތްގުޅުމެއް ބާއްވަމުން އަންނަ ޔުގަންޑާގެ ގާނޫނު ހަދާ މަޖިލީހުގެ ނައިބު ރައީސް، ތޯމަސް ތަޔެބްވާ ރާއްޖެ ވަޑައިގެންފިއެވެ.
ޔުގަންޑާ ގާނޫނުހަދާ މަޖިލީހުގެ ނައިބު ރައީސް، ތޯމަސް ތަޔެބްވާ މިއަދު ރާއްޖެ ވަޑައިގަތުމުން އެމަނިކުފާނަށް މަރުޙަބާ ދެންނެވީ ރައްޔިތުންގެ މަޖިލީހުގެ ކެލާ ދާއިރާގެ މެންބަރު އިބްރާހީމް ޝަރީފްއާއި އެސިސްޓެންޓް ސެކްރެޓަރީ ޖެނެރަލް މުޙައްމަދު ރަޝީދު ކަމަށް ރައްޔިތުންގެ މަޖިލީހުން މަޢުލޫމާތުދެއްވައެވެ.
ޔުގަންޑާ ގާނޫނުހަދާ މަޖިލީހުގެ ނައިބު ރައީސް، މިއަދު ރާއްޖެ ވަޑައިގެންފައިވާއިރު ރާއްޖޭގެ ޤާނޫނު ހަދާ މަޖިލިހުގެ މިހާރުގެ ރައީސް މުޙައްމަދު އަސްލަމް ވަނީ ދާދި ފަހަކުން ޔުގަންޑާގެ ވެރިރަށް ކަމްޕާލާގައި ކުރިއަށްދިޔަ 27 ވަނަ ކޮންފަރެންސް އޮފް ސްޕީކާސް އެންޑް ޕްރިސައިޑިންގ އޮފިސާސް އޮފް ދަ ކޮމަންވެލްތް ގައި ބައިވެރިވެ ވަޑައިގެންފައެވެ
މަޖިލީހުގެ ރައީސް އަސްލަމް ޔުގެންޑާއަށް ވަޑައިގެން އެމަނިކުފާނު ވަނީ ޔުގަންޑާގެ ގާނޫނުހަދާ މަޖިލީހުގެ ރައީސް އަނީތާ އަމޮންގް އާއި ވެސް ބައްދަލުކުރައްވައި ދެ ގައުމުގެ ގާނޫނު ހަދާ މަޖިލީހުގެ ގުޅުން ބަދަހިކުރުމާއި ގުޅޭގޮތުން ވާހަކަ ދައްކަވާފައެވެ. އަމޮންގްގެ ވާހަކަފުޅުގައި ރާއްޖޭގެ ފަތުރުވެރިކަމާއި މޫސުމަށް އަންނަ ނޭދެވޭ ބަދަލުތައް މެނޭޖްކުރުމަށް ރާއްޖެއިން ގެންގުޅޭ އުސޫލުތައް ދަސްކުރަން މުހިންމުކަމުގައި ވިދާޅުވިއެވެ.
ރައްޔިތުން މަޖިލިހުގެ ރައީސްގެ ހައިސިއްޔަތުން އަސްލަމް ރާއްޖެއިން ބޭރަށް ކުރެއްވި އެންމެ ފުރަތަމަ ދަތުރުފުޅުގެ ގޮތުގައި ވަޑައިގެންނެވި މި ކޮންފަރެންސްގައި ތިމާވެއްޓާއި، ދުނިޔޭގެ މޫސުމަށް އަންނަ ބަދަލުތަކާ ބެހޭގޮތުން މަޝްވަރާކުރެވުނު މައުޟޫގައި އަސްލަމް ވަނީ އިންޓަވެންޝަންއެއް ދެއްވައިފައެވެ.
މިއަދު ރާއްޖެ މި ވަޑައިގެންނެވި ޔުގަންޑާގެ ގާނޫނު ހަދާ މަޖިލީހުގެ ނައިބު ރައީސް، ތޯމަސްގެ ދަތުރުފުޅާއި ގުޅޭ އިތުރު އެއްވެސް ތަފްސީލެއް އަދި މިހާނަށްރައްޔިތުންގެ މަޖިލިހުން ހިއްސާކޮށްފައެއް ނުވެއެވެ.
Advertisement
This content is created and paid for by advertisers and does not involve Voice Journalists
