އިންޑިއާއަކީ ދިވެހިރާއްޖެއާއި ވަރަށް އަވަށްޓެރި ޤައުމެއްކަމަށާއި، ދިވެހިރާއްޖެއިން އަބަދު ވެސް އިންޑިޔާއަށް އިހުތިރާމުކުރަން ޖެހޭނެ ކަމަށާއި އޭގެ ބަދަލުގައި ގަދަ ދައްކައިގެން އުޅެން ވެއްޖެ ނަމަ އެކަމުގެ ނަތީޖާ ހިތިވާނެ ކަމަށް ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައިވަނީ  އިންޑިއާގެ ބޮޑުވަޒީރު ނަރެންދުރަ މޯދީ ލަކްޝަދީޕަށް ކުރެއްވި ދަތުރުގެ ތެރެއިން އެ ސަރަހައްދުގައި ފަތުރުވެރިކަން ކުރިއެރުވުމާއި ގުޅޭ ވީޑިއޯއަކާއި އެކު، ރާއްޖެ އާއި އިންޑިޔާ އާއި ދެމެދު ސޯޝަލް މީޑިއާގައި ބޮޑު ޒުވާބެއް އުފެދި، ދެ ޤައުމުގެ ދެމެދު އޮންނަ ގުޅުން ހީނަރުވެފައި މިވާ ދަނޑިވަޅުގައި މިއަދު ކުރެއްވި އެކްސް ޕޯސްޓެއްގައެވެ.

"އިންޑިއާއަކީ އަހަރެމެންގެ އަވަށްޓެރިއެއް އަދި ރަހުމަތްތެރިއެއް. އަބަދުވެސް އިންޑިއާއަށް އިހުތިރާމު ކުރަން ވާނެ،" ރައީސް ނަޝީދު ޕޯސްޓުގައި ވިދާޅުވެފައި ވެއެވެ.

މި ވަގުތު ރާއްޖޭގެ ސިޔާސީ ކަންކަމުން އަމިއްލަފުޅަށް ދުރަށްޖެހި ވަޑައިގެން ހުންނެވި ނަޝީދު މިއަދު އެކްސްގައި ކުރެއްވި ޕޯސްޓުގައި އިތުރަށް ވިދާޅުވެފައި ވަނީ ދިވެހިންގެ އަމިއްލަ ވެރިކަމެއް ހޯދާފައިވަނީ ހަރުދަނާ އަދި ރޭވުންތެރި ބަޔަކަށް ވާތީ ކަމަށާއި އެއީ ގަދަބާރުން ހޯދި އެއްޗެއް ނޫން ކަމަށެވެ.

އަބަދުވެސް އިނޑިޔާ އާއި ވަރަށް ގާތް ގުޅުމެއް ބާއްވަވަމުން ގެންދަވާ ކުރީގެ ރައީސް ނަޝީދު މި ފަދައިން ވިދާޅުވެފައިވާ އިރު ރާއްޖޭގައި ގާއިމުވެ ތިބި އިންޑިއާ ސިފައިން މާޗު މަހުގެ 15ގެ ކުރިން އަނބުރާ ގެންދަން ރައީސް ޑރ. މުޙައްމަދު މުއިއްޒު މިހާރު ވަނީ ރަސްމީކޮށް އިންޑީޔާގެ ސަރުކާރުގައި އެދިވަޑައިގެންފައެވެ. އަދި މިހާރު އެކަމުގެ މަޝްވަރާތައް ދެ ޤައުމުގެ މަތީފަންތީގެ ބޭފުޅުންގެ ދެމެދުގައި ދަނީ ކުރެވެމުންނެވެ.