‏ހަޤީޤީ މާނައިގައި ސަރުކާރު ޖަވާބުދާރީކޮށް ޒިންމާދާރު ކުރުވޭނީ ޑިމޮކްރެޓްސް އާއި އެމްޑީޕީ އެކުގައި މަަަސައްކަތް ކުރެވިގެން ކަމަށް، އެމްޑީޕީން ވަކިވެ، ޑިމޮކްރެޓްސް އުފެއްދެވުމުގައި އިސްކޮށް ހަރަކާތްތެރިވެވަޑައިގެންފައިވާ، އެސްޓީއޯގެ ކުރީގެ އެމްޑީ ހުސައިން އަމްރު ވިދާޅުވެއްޖެއެވެ. 

ޢަމްރު މިފަދައިން ވިދާޅުވީ، އޭނާ މިއަދު ކުރެއްވި ޓުވީޓެއްގަ އެވެ. 

އެމްޑީޕީއާ އެކު އަލުން މަސައްކަތް ކުރެއްވުމުގެ ޚިޔާލު އަމްރު ފާޅުކުރައްވާފައިވާއިރު، އޭނާ އާއި، އެމްޑީޕީން، ކުރީގެ ރައީސް މުހައްމަދު ނަޝީދަށް ތާއިދު ކުރެއްވި ބޭފުޅުން އުފެއްދެވި ފިކުރެއްގެ ދިރުން ގޮފީގެ ބޭފުޅުން، އެމްޑީޕީން ވަކިވީ، އެ ޕާޓީގެ ސިޔާސަތުތައް ކަމު ނުގޮސްގެންނެވެ. 

އެގޮތުން، އެމްޑީޕީގެ ރައީސް މުހައްމަދު ޞާލިހުގެ ސަރުކާރުން، ކޮރަޕްޝަނަށް މަގުފަހިވާފަދަ ގޮތަށް ކަންކަން ހިންގި ކަމަށާ، ޕާޓީ ކޮރަޕްޝަންގެ ހާއްޔަކަށްވެ، އިންސާފް ލިބެންޖެހޭ މީހުންނަށް އިންސާފް ނުލިބި، ދައުލަތުން ވައްކަންކޮށް، ދައުލަތް ދަރުވާލާފައިވާ ކަމަށް ބުނެ، ސޯލިހުގެ ސަރުކާރަށް ޑިމޮކްރެޓްސް ގެ މެންބަރުން ވަރަށް ބޮޑަށް ފާޑުވިދާޅުވެފަ ވެއެވެ. 

އެއަށްފަހު، ރިޔާސީ އިންތިހާބުގެ ދެވަނަ ބުރުގެ ތެރެއިން، އެމްޑީޕީއާއި ގުޅުމާމެދު ވެސް މަޝްވަރާކުރެވުނު ނަމަވެސް އެއްވެސް ކޮޅަކަށް ނުޖެހެން ޑިމޮކްރެޓްސް އިން ނިންމާފައިވާއިރު، އެ ޕާޓީގެ އެތެރޭގެ އިންތިޚާބަށްފަހު މިހާރު ޕާޓީގެ އެތެރޭގައިވެސް ހަމަނުޖެހުން ވަނީ އުފެދިފައެވެ. 

އަދި މިފަހަކަށް އައިސް، އަމްރު ފެންނަނީ އެމްޑީޕީއާއި އެއްކޮޅަށް މީސްމީޑިއާގައި ސުޢޫރު ފާޅުކުރައްވަމުންނެވެ.