މާލޭގައި ހުރި އަތޮޅު ފިހާރަތަކުން ލިބޭ ފައިސާ އެއަތޮޅަކަށް ދޭނެކަމަށް ރައީސުލްޖުމުހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވެފައި ވަނީ މާލޭގެ މޭޔަރު ކަމަށް ހޮވިފައިވާ އާދަމް އާޒިމާއި އިތުރު 3 ކައުންސިލަރުން ހުވާކުރެއްވުމަށް މިރޭ ދަރުބާރުގޭގައި ބެއްވުނު ދަރުބާރުގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ މި ސަރުކާރުން މަސައްކަތް ކުރަމުންދާނީ ކައުންސިލްތައް ބާރުވެރިކުރުމަށާއި ކައުންސިލްތަކަށް އާމުދަނީ ލިބޭނެ މަގުތައް ތަނަވަސް ކޮށްދެއްވުމަށެވެ.
ރައީސް އިތުރަށް ވިދާޅުވީ ވޭތުވެދިޔަ ސަރުކާރުތަކުން ލާމަރުކަޒީ ނިޒާމް ތަންފީޒުކުރެއްވި ވާހަކަ ދައްކާއިރު މާލޭގައި އަތޮޅު ފިހާރައެއް ހުންނަ ކަމަށާއި، ނަމަވެސް އެ ފިހާރަތަކަށް ލިބެމުން ދިޔަ ފައިސާ އަތޮޅުތަކާއި ހަވާލުކޮށްފައި ނުވާ ކަމަށެވެ.
"އެހެން ނަމަވެސް އަޅުގަނޑުމެން ނިންމާފައި ވާނީ އިރާދަކުރެއްވިއްޔާ ކުރިއަށް އޮތްތަނުގައި އެ އަތޮޅު ފިހާރަތަކުން ލިބޭ ފައިސާ އެ އަތޮޅުތަކާއި އަޅުގަނޑުމެން ހަވާލު ކުރާނަން.".
މިރޭގެ ދަރުބާރުގައި ރައީސް ވިދާޅުވިއެވެ.
މިރޭގެ ދަރުބާރުގައި ރައީސް ވިދާޅުވީ ކައުންސިލަރުން ވާންޖެހޭނީ ރައްޔިތުންނާއި ގާތުން މަސައްކަތް ކުރައްވާ ބަޔަކަށް ކަމަށާއި ، ހުރިހާ ކައުންސިލަރުންވެސް ގިނަގިނައިން ރައްޔިތުންނާއި ބައްދަލު ކުރައްވަން ޖެހޭނެކަމަށެވެ.
މީގެ އިތުރުން ރައީސް ވަނީ މާލޭގެ ރައްޔިތުންނަށްޓަކައި އެމަނިކުފާނުގެ ސަރުކާރުން ކުރައްވަން ހުރި ގިނަ ކަންތައްތަކެއް ހާމަކޮށްދެއްވާފައެވެ. އޭގެތެރެއިން އެންމެ ބޮޑަށް ފާހަގަކުރެވިގެން ދިޔައީ މާލެ އާއި ރަސްމާލެ ކަނޑު އަޑީގެ ރޭލު ޓަނަލަކުން ގުޅާލަން ސަރުކާރުން ނިންމާފައިވާ ނިންމެވުމެވެ.
Advertisement
This content is created and paid for by advertisers and does not involve Voice Journalists
