ދެ މީހުންނާއެކު ށ.މިލަންދޫން ފުރައިގެން ހދ.ކުޅުދުއްފުށްޓަށް ދަތުރުކުރަމުންދިޔަ ޑިންގީއެއް، ށ.ފޯކައިދޫ ކައިރިން ބަންޑުން ޖަހާލައިފިއެވެ. 

އެންއެމްޑީއެފް އިން ރޭ ބުނީ، އެ އިދާރާއަށް މިހާދިސާ މައުލޫމާތު ލިބިފަައިވަނީ ރޭ 22:23 ހާއިރު ކަމަށެވެ. އަދި ލިބުމާއެކު އެމްްއެންޑީއެފް ނޮދަން އޭރިއާ ކޮމާންޑް ކޯސްޓްގާޑް ފަސްޓް ސްކޮޑްރަން އިން އެ ސަރަހައްދުގައި ހަރަކާތްތެރިވެފައިވާ ކަމަށް ބުނެފައިވެއެވެ. 

މިއާއެކު އެމްއެންޑީއެފްއިން ބުނީ، ބަންޑުން ޖަހާލި ޑިންގީން ކަނޑުވި ދެމީހުން ފެނިފައިވާ ކަމަށާ، އެ މީހުން ނަގާފައިވަނީ އެ ސަރަހައްދުން ދަތުރުކުރި ކަންނެލި ދޯންޏަކަށް ކަމަށް ރޭ 00:21 ހާއިރު އެމްއެންޑީއެފް ކޯސްޓްގާޑަށް މައުލޫމާތު ލިބިފައިވާ ކަމަށެވެ. 

އަދި އެ ދެމީހުން ށ.ފޯކައިދޫއަށް ގެންގޮސް، މިހާރު އެރަށު ސިއްޚީ މަރުކަޒަށް ގެންދެވިފައިވާ ކަމަށާ، ދެމީހުންގެވެސް ހާލު ރަނގަޅު ކަމަށް އެމްއެންޑީއެފްއިން ބުނެފައިވެއެވެ.