ދާއިރާތަކުގެ އާބާދީގެ ނިސްބަތަށް ބަލައި، މަޖިލީހުގެ މެމްބަރުންގެ އަދަދަށް ކޮންމެ ދައުރެއްގައި ވެސް ބޮޑެތި ބަދަލުތަކެއް އަންނާތީ، ވަކި ހައްދެއް ގެނައުމަށް އިދިކޮޅު މައި ޕާޓީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އާއި ދަ ޑިމޮކްރެޓްސް ގުޅިގެން ޤާނޫނު އަސާސީ އިސްލާހު ކުރަން ހުށަހަޅާނެކަން ހާމަކޮށްފި އެވެ.

މިކަން ހާމަކޮށްފައި ވަނީ އެމްޑީޕީ އާއި ޑިމޮކްރެޓްސްގެ ބައެއް އިސްވެރިން މިއަދު ހަވީރު ބޭއްވި ނޫސްވެރިންގެ ބައްދަލުވުމެއްގައި މިކަން އިޢުލާން ކުރެއްވީ ދަ ޑިމޮކްރެޓްސްގެ ރައީސް ހަސަން ލަތީފެވެ.  

ޗަމްޕާ ސެންޓްރަލްގައި އޮތް ބަދަލުވުމުގައި މިއަދު މީޑިއާތަކަށް މައުލޫމާތު ދެއްވީ އެމްޑީޕީގެ ޗެއާޕާސަން ފައްޔާޒް އިސްމާއީލާއި، ޑިމޮކްރެޓްސްގެ ރައީސް ހަސަން ލަތީފާއި، ޕާޓީގެ ޕީޖީ ލީޑަރު އަލީ އާޒިމްގެ އިތުރުން މަޖިލީހުގެ ނައިބު ރައީސް އަހުމަދު ސަލީމެވެ.

"ރައްޔިތުންގެ މިޖިލހުގެ މެމްބަރުންގެ އަދަދު ޤާނޫނު އަސާސީގައި ކަނޑައަޅާފައިވާ ގޮތަށް ކަނޑައަޅަމުން ގެންދިޔާމާ އެ އަދަދު އަޅުގަނޑުމެންގެ އެއްވެސް މީހަކު ބޭނުން ނުވާ ދަރަޖައަކަށް އިތުރުވަމުން، އިތުރުވަމުން، އިތުރުވަމުންދާ އުސޫލެއް މިހާރު އެއޮތީ ޤާނޫނު އަސާސީގައި ކަނޑައެޅިފައި،  އެހެންވީމާ އެ އަދަދަކީ ތަޅުލެވިފައި އޮންނާނެ އަދަދެއްގެ ގޮތުގައި ޤާނޫނުއަސާސީން ކަނޑައެޅުމަކީ މިވަގުތު މުހިންމު ކަމެއް ކަމަށް އަޅުގަނޑުމެން ދެޕާޓީންވެސް ފެންނާތީ އެއީ އަޅުގަނޑުމެން މަޝްވަރާކޮށްފައިވާނޭ ކަމެއް" މެމްބަރުންގެ އަދަދު ލިމިޓް ކުރުމާއި ގުޅޭގޮތުން ހަސަން ލަޠީފު ވިދާޅުވިއެވެ.

މިއަދުގެ ނޫސްވެރިންގެ ބައްދަލުވުމުގައި މި ދެޕާރޓީން މިކަން އިއުލާނު ކޮށްފައިވާއިރު މިހާރު ހިނގަމުންދާ 19 ވަނަ ރައްޔިތުންގެ މަޖިލިހަށް ވެސް ޑިމޮކްރެޓްސްގެ ފަރާތުން ހުޅުދޫ ދާއިރާގެ މެމްބަރު އިލްޔާސް ލަބީބު ވަނީ މަޖިލިސް މެމްބަރުންގެ އަދަދު  76 ގައި ހިފެހެއްޓުމަށް ޤާނޫނު އަސާސީގެ 71 ވަނަ މާއްދާއަށް އިސްލާހު ހުށައަޅުއްވާފައެވެ. ނަމަވެސް އޭރު މަޖިލިހުގެ ބޮޑު މެޖޯރިޓީއެއް އޮތް އެމްޑީޕީން ވަނީ  އިލްޔާސް ލަބީބުބުގެ އިސްލާޙު ބޭރުކޮށްލައިފައެވެ.

އެކަމާއި ގުޅޭގޮތުން މިއަދުގެ ބައްދަލުވުމުގައި ޗެއާރޕާޝަން ފައްޔާޒާއި ސުވާލުކުރުމުން ވިދާޅުވީ އޭރު ހުށައެޅިފަ އޮތީ އެމްޑީޕީ އާއި މަޝްވަރާ ކުރެވިގެން ނޫން ކަމަށާއި، އަދި އޭރު ދެ ޕާރޓީގެ ދޭތެރޭގައި ވަރަށް ބޮޑު ޚިޔާލުތަފާތުވުންތަކެއް އޮތް ކަމަށާއި އޭރުގެ އެ ނިންމުމަކީ ސިޔާސީ ނިންމުމެއް ކަމަށެވެ.