ރައީސް ޑރ. މުހައްމަދު މުއިއްޒުގެ ސަރުކާރުގެ ކުންފުނިތަކުގެ ވެރިންގެ ތެރެއިން އެންމެ ބޮޑު މުސާރައެއް ލިބިވަޑައިގަންނަވަނީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) މެނޭޖިން ޑިރެކްޓަރު ފަޒުލް ރަޝީދު ކަމަށް ބުނެ ފެތުރި ވާހަކަތައް އޭނާ ދޮގުކުރައްވައިފިއެވެ.

ފަޒުލް އެވާހަކަތައް ދޮގުކުރައްވާފައި ވަނީ އެކްސް މެދުވެރިކޮށް ކުރެއްވި ޕޯސްޓެއްގައެވެ.

އެކްސްގައި ކުރެއްވި ޕޯސްޓެއްގައި ފަޒުލް ވިދާޅުވީ، މުސާރައާއި ބެހޭ ގޮތުން ފަތުރަމުން އަންނަނީ ހަގީގަތާއި ހިލާފު ވާހަކައެއް ކަމަށާއި، އަދި ހަގީގަތާއި ހިލާފު ވާހަކަތަކެއް ފެތުރުމުގެ ބަދަލުގައި ޕްރައިވެޓައިޒޭޝަން ބޯޑު (ޕީސީބީ) އިން މައުލޫމާތު ސާފުކުރުން ރަނގަޅު ކަމަށެވެ.

Advertisement

"އަޅުގަނޑުގެ މުސާރައާއި ބެހޭގޮތުން ޙަޤީގަތާއި ޚިލާފު ވާހަކަ ފެތުރުމުގެ ބަދަލުގައި ، މަޢުލޫމާތު ޕީސީބީ އިން ސާފުކޮށްލައްވާ ނަމަ ރަނގަޅުވީސް" ފަޒުލްގެ ޕޯސްޓްގައި ވިދާޅުވެފައިވެއެވެ.

ފަޒުލް މިފަދައިން ވިދާޅުވެ އެކްސް ޕޯސްޓެއް ކުރައްވާފައި މިވަނީ މިސަރުކާރުން ފަޒުލްއަށް ދޭ މުސާރައަކީ ރައީސުލް ޖުމުހުރިއްޔާއަށް ދޭ މުސާރައަށް ވުރެވެސް ބޮޑު މުސާރައެއްކަމަށް ބުނެ ބައެއް މީޑިޔާ ތަކުން ރިޕޯރޓުކުރުމާއި ގުޅިގެންނެވެ.

ފަޒުލްގެ އެކްސް ޕޯސްޓުގައި އިތުރަށް ވިދާޅުވެފައި ވަނީ ސަރުކާރުގެ ސިޔާސަތުތައް ތަންފީޒުކުރުމަށް ކުރަންޖެހޭ މަސައްކަތްތައް ހަލުވި ސްޕީޑުގައި ކުރިއަށް ގެންދަވާނެ ކަމަށެވެ.

"އެޗްޑީސީގެ މަސައްކަތް ހަރުދަނާ ކުރުމަށް އަދި ސަރުކާރުގެ ސިޔާސަތު ތަންފީޒުކުރުމަށް ކުރާ މަސައްކަތް ހަލުވި ދުވެލީގައި ކުރިއަށް ދާނަން." ފަޒުލްގެ ޕޯސްޓު ނިންމާލަމުން ވިދާޅުވިއެވެ.

ރައީސް ޑރ. މުހައްމަދު މުއިއްޒުގެ ސަރުކާރުން އެޗްޑީސީގެ އެމްޑީއަކަށް ފަޒުލް އައްޔަނު ކުރައްވާފައިވަނީ މިދިޔަ ނޮވެމްބަރު މަހުގެ 28 ވަނަ ދުވަހުއެވެ. އެމަގާމަށް އައްޔަން ކުރުމުގެ ކުރިން އޭނާ އަކީ ރައްޔިތުންގެ މަޖިލީހުގެ ފެލިދޫ ދާއިރާގެ މެމްބަރެވެ. އަދި މީގެ ކުރިން ރައީސް ޔާމީންގެ ވެރިކަމުގެ ފަޒުލް ވަނީ އެމްޑަބްލިއުއެސްސީގެ މެނޭޖިން ޑިރެކްޓަރުކަން ވެސް ކުރައްވާފައެވެ.

މިސަރުކާރުގެ އެންމެ މުހިއްމު އެއް ވައުދު ކަމަށްވާ ބޯހިޔަވަހިކަމުގެ ވައުދު ފުރިހަމަ ކުރުމުގެ އެންމެ ބޮޑު ޒިންމާއެއް އަދާކުރަމުން ގެންދަނީ ފަޒުލުގެ ބެލުމުގެ ދަށުގައިވާ އެޗްޑީސީގެ ފަރާތުންނެވެ.