މާލޭގައި ބުޅާ ގިނަވެ އޭގެ އުނދަގޫ އާއްމުންނަށް އިންތިހާއަށް ބޮޑޮވެފައިވައިރު، ހުޅުމާލޭގައި ވަގުތީ ކެޓް ޝެލްޓަރއެއް ހަދަން ދަނޑުވެރިކަމާއި ދިރޭތަކެއްޗާއި ބެހޭ ވުޒާރާއިން މާލެ ސިޓީ ކައުންސިލާއި ހަވާލު ކުރައްވައިފިއެވެ.

ކެޓް ޝެލްޓަރ ހަދަނީ ހުޅުމާލޭ ދެވަނަ ފިޔަވަހީގެ ފަރުކޮޅުފުށި ސަރަހައްދުގައެވެ. މިކަމަށް 5000 އަކަ ފޫޓުގެ ބިމެއް ހަމަޖައްސާ ބިން ދޫކުރުމުގެ އެއްބަސްވުމުގައި ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީއާއި މާލެ ސިޓީ ކައުންސިލާ ދެމެދުވަނީ ސޮއިކުރައްވާފައެވެ. މިއީ އޮޅުކޮށްގެން ގެންގުޅޭ ޖަނަވާރުތަކަށް ރައްކާތެރި މާޙައުލެއް ފޯރުކޮށްދިނުމަށް ހަދާ ތަނެކެވެ.

ސަރުކާރުގެ ފަރާތުން ހުޅުމާލޭގައި ކެޓް ޝެލްޓަރ އަޅަން ސިޓީ ކައުންސިލާއި ހަވާލުކުރެއްވުމުގެ އެއްބަސްވުމުގައި ދަނޑުވެރިކަމާއި ދިރޭތަކެއްޗާ ބެހޭ ވުޒާރާގެ ފަރާތުން ސޮއިކުރެއްވީ ސްޓޭޓް މިނިސްޓަރ ހުސައިން އިސްމާއިލެވެ. މާލޭ ސިޓީ ކައުންސިލްގެ ފަރާތުން ސޮއިކުރެއްވީ މޭޔަރ އާދަމް އާޒިމެވެ.

މި ސަރުކާރުގެ ދިރޭތަކެއްޗާ ބެހޭ ވުޒާރާއިން ވިދާޅުވި ގޮތުގައި ކެޓް ޝެލްޓަރ ޤާއިމްވެގެން ދިއުމާއެކު މާލެތެރޭ ބުޅާ ގިނަވާ މައްސަލައަށް ދާއިމީ ހައްލެއް ލިބިގެންދާނެއެވެ. ސަރުކާރުގެ އަމާޒަކީ ހަފްތާ-14 ނިމުމުގެ ކުރިން ފެސިލިޓީ އަޅާ، ޢާންމުންނަށް ހުޅުވާލުން ކަމަށާއި، އަދި އަމާޒަކީ ރާއްޖޭގެ ހުރިހާ ހިސާބެއްގައިވެސް މިފަދަ ފެސިލިޓީތައް ޤާއިމްކުރުން ކަމަށް ވެސް އެވުޒާރާއިން ވަނީ ވިދާޅުވެފައެވެ.

މާލޭގެ މަގުތަކުގައި ގިނަވަމުންދާ ބުޅާތައް ގެންގުޅޭނެ "ޕެޓް ކެއަރ ފެސިލިޓީ"އެއް ޤާއިމްކުރުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ހަފްތާ 14 މަގުޗާޓުގައިވަނީ ހިމަނާފައެވެ.

މާލޭ މޭޔަރު އާދަމް އާޒިމް ހުވާކުރެއްވުމުގެ ރަސްމީ ދަރުބާރުގައި ވާހަކަފުޅު ދައްކަވަމުން ޑރ. މުހައްމަދު މުއިއްޒު ވަނީ "ޕެޓް ކެއަރ ފެސިލިޓީ"އެއް ފަރުކޮޅުފުށި ސަރަހައްދުގައި ޤާއިމު ކުރައްވާނެކަމަށް ވިދާޅުވެފައެވެ.