ބޭސްފަރުވާ ކުރުމަށް އެދި ހުށައަޅާ ފަރާތްތަކަށް އެއޮންނަ އުސޫލުގެ ތެރެއިން އެކަން ހަމަޖައްސައި ދެނީ އެންސްޕާ / އާސަންދައިން ކަމަށާ، އެކޭސްތަކަށް ރައީސުލްޖުމްހޫރިއްޔާ އިރުޝާދު ދެއްވާ އުސޫލެއް ނޯންނަ ކަމަށް އެންސްޕާގެ ސީއީއޯގެ ހީނާ ވަލީދު ވިދާޅުވެއްޖެއެވެ. 

އާސަންދަ އާއި އެންސްޕާގެ އެހީ ދިނުމުގެ ކަންކަމަށް ރައީސުލްޖުމުހޫރިއްޔާ ޑރ މުޢިއްޒު ނުފޫޒު ފޯރުއްވަމުންދާ ކަމަށާ، އެތަކެއް ސަތޭކަ މީހުންނަށް އެންސްޕާ އެހީ ނުލިބިގެން އިންޑިޔާއަށް ނުދެވި ފައިވާ ކަމަށް ބުނެ މީޑިއާއަކުން ޚަބަރު ފަތުރާފައިވާ އިރު، އެ ނޫހުން ވަނީ، އިންޑިޔާއަށްދާން އާސަންދަ އާއި އެންސްޕާގެ އެހީ ނުދީ އެގައުމަށް ޖެއްސުން ކުރަމުންދާ ކަމަށްވެސް ބުނެފަ އެވެ. 

އެކަމާއި ގުޅިގެން އެކްސް ގައި ކުރެއްވި ޕޯސްޓެއްގައި ހީނާ ވިދާޅުވީ، ބޭސްފަރުވާ ކުރުމަށް އެދި ހުށައަޅާ ފަރާތްތަކަށް އެއޮންނަ އުސޫލުގެ ތެރެއިން އެކަން ހަމަޖައްސައި ދެނީ އެންސްޕާ / އާސަންދައިން ކަމަށެވެ.

Advertisement

އަދި އެކޭސްތަކަށް ރައީސުލްޖުމްހޫރިއްޔާ އިރުޝާދު ދެއްވާ އުސޫލެއް ނޯންނަ ކަމަށްވެސް ވިދާޅުވި އެވެ. 

މިއާއެކު ހީނާ ވިދާޅުވީ، މި ޖެނުއަރީ މަހުގެ 1-25 އަށް ބޭސްފަރުވާއަށް ދިއުމަށް 1922 ޓިކެޓް ދޫކުރެވިފައިވާ ކަމަށެވެ. އަދި އޭގެ 97.2 އިން ސައްތަ އަކީ ބޭސް ފަރުވާއަށް އިންޑިއާއަށް ދިއުމަށް ދޫކޮށްފައިވާ ޓިކެެޓް ކަމަށްވެސް އޭނާ ވިދާޅުވި އެވެ.

އާސަންދަ ސްކީމްގެ ދަށުން ރާއްޖެއިން ބޭރަށް ބޭސްފަރުވާއަށް މިވަގުތު ފޮނުވަމުންދަނީ އިންޑިއާ އާއި ސްރީލަންކާއަށެވެ.

ނަމަވެސް ތައިލެންޑާއި ޔޫއޭއީ ފަދަ ފެންވަރު ރަނގަޅު ގައުމުތަކަށްވެސް އާސަންދަ ލިބޭ ގޮތް ހެދުމަށް ސަރުކާރުން މަސައްކަތް ކުރައްވަމުންދާކަން ރައީސް މުޢިއްޒު އިއުލާން ވަނީ ކުރައްވާފައެވެ.