ޖުމްހޫރީ ޕާޓީ (ޖޭޕީ) ގެ ޓިކެޓުގައި ހުޅުމާލެ ދެކުނު ދާއިރާ އަށް ވާދަކުރައްވާ އެޕާޓީގެ ނައިބު ލީޑަރު އަދި ކުރީގެ ޓްރާންޕޯޓް މިނިސްޓަރު އައިޝަތު ނަހުލާ ވާނީ ދާއިރާ އާއި ދިވެހި ޤައުމުގެ އެންމެހާ ރައްޔިތުންނަށް އިޚްލާޞްތެރި މެންބަރަކަށް ކަމަށް ޖޭޕީގެ ލީޑަރު އަދި ނަހުލާގެ ފިރިކަލުން ޤާސިމް އިބްރާހިމް ވިދާޅުވެއްޖެއެވެ.
އެކްސް ގައި ކުރި ޕޯސްޓެއްގައި ގާސިމް ވިދާޅުވީ ޖޭޕީގެ ޓިކެޓް ގައި ނަހުލާ ވާދަކުރައްވަނީ ދިވެހިރާއްޖޭގެ ސިޔާސީ މައިދާނުގައި އަންހެނުންގެ ބާރުވެރިކަން އިތުރުކޮށް، މަދަނީ، އިގްތިޞާދީ އަދި އިޖްތިމާއީ ކަންކަމުގައި އަންހެނުންގެ ދައުރު ފުޅާކޮށް، ފުރުޞަތުތައް ފަހިކުރުމުގެ މަތިވެރި އަޒުމުގައި ކަމަށެވެ.
ޤާނޫނު ހަދާ މަޖިލީހަކީ، އެމަޖިލީހަކަށް ތަޖުރިބާއާއި ހިކުމަތްތެރި، ވިސްނުންތެރި އަމާނާތްތެރިން އިންތިޚާބު ކުރަން ޖެހޭ ތަނެއް ކަން ފާހަގަކުރައްވަމުން ގާސިމް ވިދާޅުވީ ހުޅުމާލޭ ދެކުނުދާއިރާގެ ރައްޔިތުންގެ މަންދޫބެއްގެ ގޮތުން 20 ވަނަ ރައްޔިތުންގެ މަޖިލީހަށް ޖުމްހޫރީ ޕާޓީގެ ފަރާތުން ވާދަކުރައްވާނީ ޕާޓީގެ ނައިބު ލީޑަރު ނަހުލާ ކަމަށެވެ.
ހުޅުމާލޭ ދެކުނު ދާއިރާގެ ލޮބުވެތި ރައްޔިތުންގެ ތާއީދާއި އެއްބާރުލުން ނަހުލާއަށް ލިބިގެންދާނެ ކަމަށް އުންމީދު ކުރައްވާ ކަމަށް ވެސް ގާސިމް އެކްސް ގައި ކުރި ޕޯސްޓްގައި ވެއެވެ. އަދި ނަހުލާ އަކީ ހުޅުމާލެ ދެކުނު ދާއިރާ އާއި ދިވެހި ޤައުމުގެ އެންމެހާ ރައްޔިތުންނަށް އިޚްލާޞްތެރި، ވަފާތެރި ކެނޑިޑޭޓެއް ކަމުގައި ވާނެ ކަމީ ޝައްކެއް އޮތް ކަމެއް ނޫން ކަމަށް ވިދާޅުވެ ގާސިމް ވަނީ ނަހުލާއަށް ތައުރީފް ކުރައްވާފައެވެ.
Advertisement
This content is created and paid for by advertisers and does not involve Voice Journalists
