ސަރުކާރުން ދައުލަތުގެ މަގާމުތަކަށް އައްޔަނުކުރާ ބޭފުޅުންނަކީ އެ ކަމަށް ގާބިލް ބޭފުޅުންކަން ކަށަވަރު ކުރުމަކީ މިއަދު ކޮންމެހެންވެސް ކުރުން ވާޖިބު ކަމެއް ކަމުގައި ހޯރަފުށީ ދާއިރާގެ މެންބަރު އަދި މަޖިލީހުގެ ނާއިބު ރައީސް އަހުމަދު ސަލީމް ވިދާޅުވެއްޖެެއެވެ. 

ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ކެބިނެޓްގައި ހިމެނިވަޑައިގަންނަވާ ވަޒީރުންނަށް ރުހުން ދިނުމަށް މިއަދު ދައުރުން ބޭރުން ބޭއްވި ޖަލްސާގައި، ރުހުން ދިނުމާއި ގުޅޭގޮތުން ކޮމިޓީން އެކުލަވާލި ރިޕޯޓަށް ބަހުސް ކުރައްވަމުން ސަލީމް ވިދާޅުވީ، ގާނޫނު އަސާސީން ވަޒީރެއްގެ ކިބާގައި ހުރުމަށް ކަނޑައަޅާފައިވާ 5 ޝަރުތަކީ ވަރަށް އާދައިގެ ޝަރުތު ތަކެއް ކަމަށެވެ. 

ކަންމިހެން ހުރުމުން، ރައްޔިތުންގެ މަޖިލީހުން ރުހުންދޭ ވަޒީރަކީ އޭނާއާ ހަވާލުވާ ޒިންމާތައް އަދާކުރުމުގެ ގާބިލުކަން ހުރި މީހެއްތޯ ބަލަންޖެހޭ ކަމަށް ސަލީމް ވިދާޅުވި އެވެ. އަދި އެކަމަށްޓަކައި ގާނޫނަށް ވެސް ބަދަލު ގެންނަންޖެހޭ ކަމަށް އޭނާ ވިދާޅުވި އެވެ.

މީގެ އިތުރުން ސަލީމް ވަނީ، ވަޒީރުންގެ މަޖިލީހަށް، ރައީސުލްޖުމްހޫރިއްޔާ ބޭނުން މިންވަރަކަށް މެންބަރުން އައްޔަނު ކުރެވުމުގެ ބާރު ގާނޫނު އަސާސީން ރައީސުލްޖުމްހޫރިއްޔާ އަށް ދެއްވާފައިވާ ކަމަށާ، އަދި ބޭނުން މިންވަރަކަށް ވުޒާރާތައް އުފެއްދުމުގެ ބާރުވެސް އޮންނަ ކަމަށެވެ. އެހެންނަމަވެސް، އެއީ އެކަން އެގޮތަށް ކުރަންވީ ސަބަބެއް ނޫންކަމަށް އޭނާ ވިދާޅުވި އެވެ. 

ސަލީމް މިފަދައިން ވިދާޅުވެ، ވަޒީރުންގެ މަޖިލީހުގެ މެންބަރުންގެ އަދަދު މަދުކުރަން ވާހަކަ ދައްކަވާފައިވާއިރު، އެމްޑީޕީއާއި އިދިކޮޅު ޑިމޮކްރެޓްސް އިން ވަނީ، ސިޔާސީ މަގާމު ތައް ލިމިޓް ކުރަން ގާނޫނަށް ބަދަލު ގެންނަން ދެ ޕާޓީން އެކުގައި މަޖިލީހުގައި މަސައްކަތް ކުރުމަށް އެއްބަސްވެފައެވެ.