އިދިކޮޅު ޕާރޓީތަކުން ވަޒީރުންނަށް ރުހުން ނުދޭން ނިންމި ނިންމުމަކީ ޒާތީ ކަމެއް ކަމަށާއި ޒާތީގޮތުން ޖައްސާލާ، ސަރުކާރު ބަލިކަށިކުރުމުގެ ނިޔަތުގައި ކުރާ އެފަަދަ ކަންކަމުން ސަރުކާރު ބަލިކަށި ނުކުރެވޭނެ ކަމަށް ބަންޑާރަ ނައިބް އަހުމަދު އުޝާމް ވިދާޅުވެއްޖެއެވެ.
ބަންޑާރަ ނައިބު އުޝާމް މިފަދައިން ވިދާޅުވީ މި ސަރުކާރުގެ 22 މިނިސްޓަރުންގެ ތެރެއިން ގެދޮރުވެރިކަމާއި ބިމާއި އުމްރާނީ ތަރައްޤީ އާއި ބެހޭ ވަޒީރު ޑރ.އަލީ ހައިދަރު، އެޓާނީ ޖެނެރަލް، އަހުމަދު އުޝާމް، އިކޮނޮމިކް މިނިސްޓަރު މުހައްމަދު ސައީދު އަދި އިސްލާމިކް މިނިސްޓަރ ޑރ. ޝަހީމް އަލީ ސައީދުއަށް ރުހުން ނުދޭން ޑިމޮކްރެޓްސް އިން ނިންމާފައިވަނިކޮށެވެ.
އެކްސްގައި ކުރެއްވި ޕޯސްޓެއްގައި ބަންޑާރަ ނައިބު ވިދާޅުވީ ވަޒީރުންނަށް ރުހުން ނުދިނުމަކީ ޒާތީ ކަމެއް ކަމަށެވެ. އަދި ރުހުން ނުދޭން އުޅުމަކީ ޒާތީކަމެއް ކަމަށާއި، މިއީ ސަރުކާރު ބަލިކަށިކުރުމުގެ ނިޔަތުގައި ކުރާކަމެއް ކަމަށެވެ.
"މިއީ ޒާތީ ކަމެއް. ޒާތީގޮތުން ޖައްސައިލާ، ސަރުކާރު ބަލިކަށިކުރުމުގެ ނިޔަތުގަ ކުރާ މިކަހަލަ ކަންކަމުން ސަރުކާރު ބަލިކަށި ވެސް ނުކުރެވޭނެ. ރައީސް ޑރ. މުހައްމަދު މުއިއްޒު ހުންނެވީ ގަދަކޮށް،" ބަންޑާރަ ނައިބުގެ ޕޯސްޓުގައިވިދާޅުވެފައިވެއެވެ.
ބަންޑާރަ ނައިބު މިފަދައިން ވިދާޅުވެފައިވާ އިރު ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން ވަޒީރުންނަށް ރުހުން ދިނުމުގެ މައްސަލަ ބަލާ ނިންމި ގޮތުގެ ރިޕޯޓު ހުށަހަޅާފައެވެ.
އެރިޕޯޓަށް ބަހުސް ކުރުމަށް ހުޅުވާލުމުން މަޖިލިހުގެ ނައިބު ރައީސް، އަދި އެމްޑީޕީގެ ހޯރަފުށީ ދާއިރާގެ މެންބަރު އަޙްމަދު ސަލީމް ވަނީ ވަޒީރުން އައްޔަންކުރުމުގެ ބާރު ރައީސަށް ލިބިދީފައި ވިޔަސް، އެއީ ހިތުހުރި ގޮތަކަށް ވަޒީރުން އައްޔަން ކުރަން ލިބޭ ހުއްދައެއް ނޫންކަމަށް ވިދާޅުވެ ވާހަކަ ދައްކަވާފައެވެ.
ހަމަ އެހެންމެ ދަ ޑިމޮކްރެޓްސްގެ ފަރާތުން މެދު ހެންވޭރު ދާއިރާގެ މެމްބަރު އަލީ އާޒިމް ވާހަކަދައްކަވަމުން ވިދާޅުވީ ވެރިކަމަށް އައުމަށް ދައްކަނީ އެހެން ވާހަކައެއް ކަމަށާއި، އެކަމަކު ވެރިކަމަށް އައުމަށް ފަހު އަމަލު ކުރަނީ މުޅިން އެހެން ގޮތަކަށް ކަމަށެވެ. އެހެންކަމުން ހުރިހާ ވަޒީރުންނަށް ރުހުން ދިނުމަކީ ފަސޭހަ ކަމެއް ނޫންކަމަށް އޭނާ ފަހަގަކުރެއްވިއެވެ.
ވަޒިރުންނަށް ރުހުން ދިނުމާއި ގުޅޭގޮތުން އެމްޑީޕީ އާއި އަދި ދަ ޑިމޮކްރެޓްސް އިންވެސް ވަނީ ވަޒީރުންގެ މަޖިލިހުގައި ހިމެނި ވަޑައި ގަންނަވާ ބައެއް ވަޒީރުނަންނަށް ރުހުން ނުދިނުމަށް ނިންމާފައެވެ.
މިކަމާއި ގުޅިގެން ޕްރޮގްރެސިވް ކޮންގްރެސް ކޯލިޝަނުން ނެރުނު ބަޔާނެއްގައި ބުނެފައިވަނީ ސަރުކާރެއްގެ ސިޔާސަތު ތަންފީޒުކުރުމަށް އެކުލަވާލާ ވަޒީރުންގެ މަޖިލީހުގެ މެންބަރުންނަށް ރުހުން ނުދިނުމަކީ ރައްޔިތުންގެ މަންފާއަށް ސަރުކާރުން ކުރަމުން ގެންދާ މަސައްކަތަށް ހުރަސް އެޅުން ކަމަށެވެ.
Advertisement
This content is created and paid for by advertisers and does not involve Voice Journalists
