މާލޭގެ މަގުމަތިން ހަތަރު ފުރޮޅުލީ އުޅަނދުތަކަށް ކުއްޔަށް ދޫކުރި ޕާކިން ޖާގަތަކާއި ގުޅޭ ގޮތުން ޝަކުވާ ހުށަހެޅުމުގެ ފުރުސަތު މާލޭސިޓީ ކައުންސިލުން ހުޅުވާލައިފިއެވެ.
މި ފުރުސަތު ހުޅުވަލައިފައި ވަނީ އިއްޔެ މާލޭސިޓީން ގެޒެޓްގައި ޝާއިއުކުރި އިއުލާނަކުންނެވެ. އެއިލާނުގައި ބުނެފައިވަނީ ފެބުރުއަރީ 5 އާއި ހަމައަށް ޝަކުވާ ހުށަހެޅުމުގެ ފުރުސަތު ހުޅުވާލައިފައިވާ ކަމަށެވެ.
މާލެ ސިޓީ ކައުންސިލްގެ މި އިޢުލާނުގައިވާ ގޮތުން ޝަކުވާ ހުށަހެޅުމަށް ހުޅުވާލައިފައި ވަނީ ޕާކިންގ ސްލޮޓް ލިބުނު މެސެޖަށްފަހު އިތުރު މުއާމަލާތެއް ނުކުރާ ފަރާތްތަކަށާއި، ޕާކިންގ ސްލޮޓް ލިބުނުކަން އެންގުމަށްފަހު އެއްބަސްވުން ނަހަދާ ފަރާތްތަކަށާއި އަދި ޕާކިންގ ސްލޮޓްތަކާއި ގުޅޭ އިތުރު ޝަކުވާތައް ހުށައަޅަށް ބޭނުންވާ ފަރާތްތަކަށެވެ.
މާލެސިޓީ ކައުންސިލުން ބުނެފައިވަނީ ޝަކުވާ ހުށަހަޅާނީ ސިޓީ ކައުންސިލްގެ ވެބްސައިޓުގައިވާ ޝަކުވާ ހުށަހަޅާ ޕޯޓަލް ނުވަތަ ލިޔުމަކުން ކައުންސިލްގެ އާންމު ހިދުމަތްތަކާ ބެހޭ ބަޔަށް ކަމަށެވެ.
މާލޭ ސިޓީކައުންސިލުން ޕާރކިން ސްލޮޓްތައް ދޫކުރުމަށް އިޢުލާނުކޮށްފައިވަނީ 2022 ވަނަ އަހަރުގެ ތެރޭގައެވެ. އޭރު ހުޅުވާލައިފައި ވަނީ ކޮންމެ މީހަކަށް ތަފާތު ތިން ސަރަހައްދަކުން ސްލޮޓަށް އެދެވޭ ގޮތަށް، ގިނަވެގެން އެއް އަހަރުދުވަހަށް މަހު ފީ ދައްކާ ގޮތަށް ދޫކުރާ ޖާގަތަކެއްގެ ގޮތުގައެވެ.
އެގޮތުން އޭރު ޕާރކިންގ ޖާގަތައް މަހަކަށް ދޫކޮށްފައި ވަނީ
ޓެކްސީ (4 ފުރޮޅުލީ ރީނދޫބޯޑު ޖެހި ވެހިކަލްތައް) 750 ރުފިޔާ
ޕްރައިވެޓް ކާރުތަކަށް : 1500 ރުފިޔާ
ކުންފުނިތަކަށް : 3000 ރުފިޔާ
މާލެ ސިޓީކައުންސިލުން ޕާކިން ޖާގަތައް ދޫކުރި ގޮތުން އޭރުވެސް ގިނަފަރާތްތަކަކުން ދިޔައީ ވަރަށް ބޮޑަށް ކަންބޮޑުވުން ފާޅުކުރަމުންނެވެ. ގިނަބަޔަކު އެންމެ ގިނައިން ކަންބޮޑުވުން ފާޅުކޮށްފައި ވަނީ ގިނަ މީހުން އާންމުކޮށް ސައިކަލު ޕާކުކުރަމުންދިޔަ ސަރަހައްދުތަކުން ޕާކިންގ ސްލޮޓްތައް ދޫކޮށްފައިވާކަމަށް ބުނެއެވެ.
Advertisement
This content is created and paid for by advertisers and does not involve Voice Journalists
