ދަޢުލަތުގެ އެއްބާރުކަމަށްވާ ރައްޔިތުންގެ މަޖިލިހުން ރުހުން ނުދިން ވަޒީރުންތަކެއް އަލުން ހަމަ އެމަޤާމަށް އައްޔަން ކުރުމަކީ ރައީސުލްޖުމުހޫރިއްޔާ ޑރ.މުހައްމަދު މުއިއްޒު ޤާނޫނު އަސާސީގެ ހުރުމަތް ކަނޑާލުން ކަމަށް ދަ ޑިމޮކްރެޓްސްއިން ބުނެފިއެވެ.

ދަ ޑިމޮކްރެޓްސް ޕާޓީން މިފަދައިން ބުނެފައިވަނީ ރައީސް ޑރ.މުހައްމަދު މުއިއްޒުގެ ސަރުކާރުގައި ވަޒީރުންގެ ގޮތުގައި ހިމެނިވަޑައި ގަންނަވާ ތިންވަޒީރަކަށް މަޖިލިހުން ރުހުން ދޭން ނުފެންނަ ކަމަށް ނިންމާފައި ވަނިކޮށް އަލުން އެތިން ބޭފުޅުންނަށް ހަމަ އެ ވުޒާރާތަކުގެ ވަޒީރުކަން ދެއްވުމާއި ގުޅިގެންނެވެ.

އިއްޔެ ބޭއްވުނު މަޖިލިހުގެ ޖަލްސާގައި ރުހުން ދޭން ނުފެންނަކަމަށް ނިންމާފައި ވަނީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދަށާއި، އެޓާނީ ޖެނަރަލް އަހުމަދު އުޝާމަށާއި ، އަދި ހައުސިން މިނިސްޓަރު ޑރ. އަލީ ހައިދަރަށެވެ.

ދަ ޑިމޮކްރެޓްސްއިން ނެރުނު ބަޔާނުއި ބުނެއިވަނީ ރައީސް ޑރ. މުޙައްމަދު މުއިއްޒުގެ މި އަމަލަކީ ޤާނޫނު އަސާސީގެ ހުރުމަތް ކަނޑާލުން ކަމަށާއި ރައްޔިތުންގެ މަޖިލީހަށް އެ ވަޒީރުންގެ ނަންތައް އަލުން އަނބުރާ ނުފޮނުވޭނެ ކަމަށެވެ.

"ރައްޔިތުންގެ މަޖިލީހުން ރުހުން ނުދިން ވަޒީރުންތަކެއް އަލުން އައްޔަންކުރުމަކީ ގާނޫނުއަސާސީގެ ހުރުމަތް ކަނޑާލުމެވެ. ރައްޔިތުންގެ މަޖިލީހަށް އެ ވަޒީރުންގެ ނަންތަކެއް އަލުން އަނބުރާ ނުފޮނުވޭނެ," ޑިމޮކްރެޓްސްގެ ބަޔާނުގައި ބުނެފައިވެއެވެ.

ޑިމެކްރެޓްސްގެ މި ކުރު ބަޔާނުގައި އިއްޔެ މަޖިލިހުގެ ރުހުން ނުލިބުނުދައުލަތުގެ ބަންޑާރަ ނައިބު އަލުން އެމަޤާމަށް އައްޔަން ކުރުމާއި ބެހޭގޮތުންވެސް އެޕާޓިން ދެކޭގޮތް ހާމަކޮށްފައި ވެއެވެ.

"ރައްޔިތުންގެ މަޖިލީހުން ރުހުން ނުދިން މީހަކު ބަންޑާރަ ނައިބުގެ ހައިސިއްޔަތާ އަމިއްލަ ޒާތީ ތައައްސުބުގެ ދެމެދުގައި ތާށިވެ ހުރެގެން، ގާނޫނުއަސާސީގެ އިންތަކާ މިންތަކުން ބޭރުން ގާނޫނީ ލަފަޔާއި ރައުޔުތައް ނެރި، ދައުލަތް ތަމްސީލެއް ނުކުރެވޭނެ" ޑިމޮކްރެޓްސއިން ބުނެފައިވެ އެވެ.

ޑިމޮކްރެޓްސްގެ ބަޔާން ނިންމާލައިފައިވަނީ ދުނިޔޭގެ ޑިމޮކްރެޓިކް ހަމަތަކާއި،  ގާނޫނީ ދައުލަތްތަކުގެ ނިޒާމުތައް ރޭވިފައި އޮންނަ އެންމެ އަސާސީ ކަންތައްތަކަށް ކުޑައިމީސް ނުކުރެއްވުމަށް ރައީސް ހަނދާން ކޮށްދެއްވަމުންނެވެ.

" ޤާނޫނު އަސާސީގެ ހުރުމަތާއި ދުނިޔޭގެ ޑިމޮކްރެޓިކް ހަމަތަކާއި، ޤާނޫނީ ދައުލަތްތަކުގެ ނިޒާމުތައް ރޭވިފައި އޮންނަ އެންމެ އަސާސީ މަފްހޫމުތަކަށް ކުޑައިމީސް ނުކުރެއްވުމަށް ހަނގުމަކޮށް އަރުވަމެވެ" ޑިމޮކްރެޓްސްއިން ނެރުނު ބަޔާން ނިންމާލަމުން ބުނެފައިވެއެވެ.