ރައީސުލްޖުމުހުރިއްޔާ ޑރ. މުހައްމަދު މުއިއްޒު ވަކިކުރުމަށް ބޭނުންވާ ސޮއި މިހާރު ހަމަވެފައިވާ ކަމަށާއި، މަޖިލިހުގެ މިދަޢުރު ހަމަވުމުގެ ކުރިން އެމައްސަލަ މަޖިލިހަށް ހުށައަޅާނެ ކަމަށް މޯލްޑިވިއަން ޑިމޮކްރެޓިކް ޕާޓީ، އެމްޑީޕީން ބުނެފިއެވެ.
އެމްޑީޕީން މިފަދައިން ބުނެފައި ވަނީ މިއަދު އެޕާރޓީގެ ފަރާތުން ބޭއްވި ނޫސްވެރިންގެ ބައްދަލުވުމެގައެވެ.
މި ބައްދަލުވުމުގައި އެމްޑީޕީގެ ޕީޖީ ލީޑަރު، އަދި އަލިފުށި ދާއިރާގެ މެމްބަރު، މުހައްމަދު ރަޝީދު ވިދާޅުވީ ރައީސް ޑރ. މުހައްމަދު މުއިއްޒު މަޤާމުން ވަކިކުރުމަށް ބޭނުންވާ އަދަދަށް ވުރެ ގިނައިންވެސް މިހާރު އެޕާޓީން ސޮއި ހޯދާފައިވާ ކަމަށެވެ. އަދި މިހާރު ކުރިއަށް ދަނީ ޕާރޓީގެ އިސް ސަފުގައި ތިއްބެވި ބޭފުޅުންގެ ލަފަޔާއި މަޝްވަރާ ހޯދުންކަމަށް އޭނަ ވިދާޅުވިއެވެ.
"ޕާލިމެންޓްރީ ގްރޫޕުން އެ ހުށަހެޅުން އޮތީ ފާސް ވެސް ކޮށްފަ. ދެން އަޅުގަނޑުމެން މިކަމާއި ގުޅޭ ގޮތުން ޕާޓީގެ ލީޑަރޝިޕްގެ ލެވެލްގެ އިސް މަޝްވަރާތައް ކުރުމަށްފަހު، މިކަން ކުރިއަށް ގެންދާނީ"
އެމްޑީޕީ ޕީޖީ ލީޑަރ ވިދާޅުވިއެވެ.
މިއަދުގެ މި ބައްދަލުވުމުގައި މުހައްމަދު ރަޝީދު އިތުރަށް ވިދާޅުވީ މެމްބަރުންގެ ސޮއި ހަމަވެފައި ވީ ނަމަވެސް އެ މައްސަލަ މަޖިލިހަށް ވައްދާނީ އަދި ކޮން ދުވަހެއްގެ ކޮން ވަގުތެއްގައިކަން އެޕާރޓީން ނިންމާފައި ނުވާކަމަށެވެ.
"އެހުށަހެޅުން އަދި ހުށަހަޅާނީ މާދަންތޯ އަނެއް ދުވަހުންތޯ އަޅުގަނޑުމެން މިދަނީ ބަލަމުން. ވަގުތާއި ހާލަތަށް ބަލާފަ އެހުށަހެޅުން ހުށަހަޅަން ޖެހޭ އެންމެ ރަނގަޅު ވަގުތުގައި އަޅުގަނޑުމެން ހުށަހަޅާނީ"
ތަފްސީލް ދެއްވަމުން އެމްޑީޕީ ޕީޖީ ލީޑަރ ވިދާޅުވި އެވެ.
އެމްޑީޕީން މިފަދައިން ބުނެފައިވާއިރު މިވަގުތު އެމްޑީޕީގެ މެމްބަރުންގެ ގޮތުގައި ތިބީ 44 މެމްބަރުންނެވެ. މަޖިލިހުގައި އެމްޑީޕީއަށް ތާއިދު ކުރާނެކަން ދާދިފަހުން ހާމަކުރި ދަ ޑިމެކްރެޓްސްގެ 13 މެމްބަރުންނާއި އެކު މުޅިޖުމުލަ 57 މެމްބަރުންނެވެ.
ގާނޫނުއަސާސީގެ 100 ވަނަ މާއްދާގައި ބުނާ ގޮތުން ރައީސް މަގާމުން ވަކިކުރެވޭނީ މަޖިލިހުގެ ތިންބައިކުޅަ ދެބައި މެންބަރުންގެ ވޯޓާއެކު ގައެވެ. އެއީ 19 ވަނަ މިޖިލިހުގެ 87 މެމްބަރުންނަށް ބަލާނަމަ 58 މެމްބަރުންނެވެ.
މިޤަވާއިދު މިހެން އޮއްވައި މަޖިލިހުގައި ހިމެނި ވަޑައިގެންނެވި ގިނަ އަދަދެއްގެ މެމްބަރުންތަކެއް ރައީސް ޑރ. މުހައްމަދު މުއިއްޒު ސަރުކާރުގެ އިސް މަޤާމުތަކަށް ވަޑައިގެންނެވުމުން އެމްޑީޕީ އާއި ދަ ޑިމެކްރެޓްސްގެ ތާޢީދާއި އެކު މިހާރު މަޖިލިހުން ވަނީ މި މާއްދާއަށް ބަދަލު ގެނެސްފައެވެ. މި ގެނެވުނު ބަދަލުން މިހާރު މެމްބަރުންގެ ޖުމުލަ އަދަދކަމުގައި ބަލަނީ މިވަގުތު މަޖިލިހުގައި ތިއްބެވި ޖުމުލަ މެމްބަރުންގެ އަދަދަށެވެ. އޭރަށް ރައީސްގެ އިތުބާރު ނެތްކަމަށް ފާސްކުރަން ބޭނުންވަނީ 53 މެމްބަރުންގެ ވޯޓެވެ.
އެމްޑީޕީ އާއި ޑިމޮކްރެޓްސް ގުޅިގެން މަޖިލިހުގެ ޤަވާއިދަށް މިގެނެވުނު ބަދަކީ ޤާނޫނު އަސާސީ އާއި ޚިލާފު ބާތިލް މާއްދާއެއްގެ ގޮތުގައި ކަނޑައަޅައި ދިނުމަށް އެދި ސަރުކާރުން މިހާރު ވަނީ ސްޕްރިމްކޯޓަށް މައްސަލައެއް ހުށައަޅާފައެވެ.
Advertisement
This content is created and paid for by advertisers and does not involve Voice Journalists
