ޒަޔަނިސްޓު އިޒުރާއިލްގެ އަޅުވެތިކަމުގައި ، ވޭނާއި ހިތްދަތިކަން ތަހައްމަލުކުރަމުންގެންދާ ފަލަސްޠީނަކީ މިނިވަން ދަޢުލަތެއްގެ ގޮތުގައި ބަލައިގަތުމަށް އިނގިރޭސިވިލާތުން ވިސްނަމުންދާކަމުގައި އެ ޤައުމުގެ ހާރިޖީ ވަޒީރު ޑޭވިޑް ކެމަރަން ހާމަކުރައްވައިފިއެވެ.
އިނގިރޭސި ހާރިޖީ ވަޒީރު މިފަދައިން ވިދާޅުވެފައި ވަނީ އިނގިރޭސިވިލާތުގައި ތިއްބަވާ ޢަރަބި ޤައުމުތަކުގެ ސަފީރުންނާއި ބައްދަލުކުރައްވާ ދެއްކެވި ވާހަކަފުޅެއްގައެވެ
ކުރިން އިނގިރޭސިވިލާތުގެ ބޮޑުވަޒީރުކަންވެސް ކުރައްވާފައިވާ ކެމެރަން ވިދާޅުވީ ފަލަސްޠީނު މިނިވަން ދަޢުލަތެއްގެ ގޮތުގައި ބަލައިގަތުންވެގެން ދާނީ ޒަޔަނިސްޓް ޔަޙޫދީން ފަލަސްޠީނުގެ ރައްޔިތުންނާއި ދެކޮޅަށް ދެމުންގެންދާ ރަހުމެއްނެތް ލާއިންސާނީ ހަމަލާތަކަށް ނިމުމެއް ގެނައުމަށްވެސް ކުރެވޭނެ އެންމެ މުހިއްމު މަސައްކަތް ކަމަށެވެ.
"އެންމެ ފުރަތަމަ މަސައްކަތަކީ ފަލަސްޠީނުގެ މިނިވަން ދަޢުލަތެއް އޮންނާނެ ގޮތުގެ ތަޞައްވުރެއް ސިފަކުރުން. އެ ދަޢުލަތުގައި ހިމެނޭނެ ބައިތަކާއި، ބާރުތައް ބެހިގެންދާނެ ގޮތާއި، ސަރުކާރު ހިނގާނެ ގޮތް ކަނޑައެޅުން. އެއާ އެކުއެކީގައި އަޅުގަނޑުމެންނަށް ފަލަސްޠީނަކީ މިނިވަން ދަޢުލަތެއްގެ ގޮތުގައި ބަލައިގަތުމުގެ މަސައްކަތް ފެށޭނެ. އަދި އ.ދ އިން ވެސް އެއީ މިނިވަން ދަޢުލަތެއްގެ ގޮތުގައި ބަލައިގަނެވޭނެ. އޭރުން މި މަސައްކަތަށް ދެން ހުރަސް އެޅޭނެ ގޮތެއް ނޯންނާނެ."
އިނގިރޭސި ހާރިޖީ ވަޒީރު ވިދާޅުވިއެވެ.
މުސްލިމު ނޫން ޤައުމުތަކުގެ ބައެއް އިސްވެރިން މިފަދަ ގޮތަކަށް ވާހަކަ ދެއްކެވި ނަމަވެސް ޔަޙުދީ އިޒުރާއިލުން މިއިން އެއްވެސް ކަމަކަށް ބޯލަބާފައެއް ނުވެއެވެ. އަދި ޒަޔަނިސްޓު އިސްރާއީލުގެ ޖައްބާރު ބޮޑުވަޒީރު ބެންޖަމިން ނަތަންޔާހޫ މިފަދަ އެއްވެސް ކަމަކަށް ވިސްނާފައެއް ވެސް ނުވެއެވެ.
އެހެނީ ޒަޔަނިސްޓް އިޒުރޭލުން ފަލަސްޠިނުގެ ކުށެއްނެތް ނިކަމެތި ރައްޔިތުންނާއި ދެކޮޅަށް މިހާރު ކުރިއަށްގެންދާ ލާއިންސާނީ ހަމަލާތަކުގައި މިއަދާއި ހަމައަށް 26000 އަށް ވުރެ ގިނަ މުސްލިމުން ވަނީ ޝަހީދު ކޮށްލައިފައެވެ.
Advertisement
This content is created and paid for by advertisers and does not involve Voice Journalists
