ދިވެހިރާއްޖޭގެ ފުޓްބޯޅައިގެ މައި ޢިދާރާ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)އަށް ލިބުނު ދެ މިލިއަނެއްހާ ޑޮލަރަށް ހިޔާނާތްތެރިވެފައިވާ މައްސަލައެއްގައި އެތަނުގެ ދެ ވެރިއެއްގެ މައްޗަށް ދައުވާކޮށްދިނުން އެދި ޕްރޮސެކިއުޓަރ ޖެނަރަލްގެ އޮފީހަށް ފޮނުވާފައިވާ ކަމަށް ދިވެހި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން މިފަދައިން ވިދާޅުވެފައިވަނީ މިއަދު ހަވީރު އިސްކަންދަރު ކޮށީގައި ބޭއްވި  ނޫސްވެރިންގެ ބައްދަލުވުމެއްގައި ފުލުހުންގެ ހެޑް އޮފް ފައިނޭންޝަލް ކްރައިމް ޔުނިޓްގެ އިންސްޕެކްޓަރ އޮފް ޕޮލިސް ޔޫސުފް ލޫތެވެ.

މި ބައްދަލުވުމުގައި އިންސްޕެކްޓަރ އޮފް ޕޮލިސް ޔޫސުފް ލޫތު ވިދާޅުވީ އެފްއޭއެމުގެ ފައިސާއަށް ހިޔާނާތްތެރި ވެފައިވާ ބޮޑުމައްސަލަ ތަޙްޤީގުކުރަމުން ދާއިރު މިހާތަނަށް ހޯދިފައިވާ ގޮތުގައި މި ހިޔާނާތުގައި އެތަނުގެ ބައެއް ވެރިންގެ އެކައުންޓަތަކަށް ގިނަ އަދަދަކަށް ފައިސާ ޖަމާވެ، އެފައިސާއިން ލޯންޑުކުރުމުގެ މުއާމަލާތްތައް ހިންގާފައިވެއެވެ.

Advertisement

ލޫތު އިތުރަށް ވިދާޅުވީ އެތަނުގެ އިސްވެރިންގެ އެކައުޓްތަކަށް ވަދެފައިވާ ފައިސާތަކަށް ބަލާއިރު އެފްއޭއެމަށް ރާއްޖޭގެ އެކިއެކި ތަންތަނުން ދޭ ފައިސާ އާއި، ބޭރުގެ ފަރާތަކުން ދޭ ފައިސާވެސް ހިމެނޭ ކަމަށެވެ.

"މި މައްސަލައާ ގުޅުން ހުރި ބައެއް ތަންތަން ބަލާފާސްކޮށް، ޑޮކިއުމެންޓްރީ ހެއްކާއި އަދި އިލެކްޓްރޯނިކް ބައެއް ޑިވައިސް ވަނީ ހެކީގެ ގޮތުގައި ފުލުހުންގެ ބެލުމުގެ ދަށަށް ގެނެސްފައި ". އިންސްޕެކްޓަރ އޮފް ޕޮލިސް ޔޫސުފް ލޫތު ވިދާޅުވިއެވެ.

އެފްއޭއެމްގެ އިސްވެރިންގެ އެކައުންޓްތަކަށް ވަދެފައިވާ ފައިސާގެ ތަފްސީލް ދެއްވަމުން ލޫތު ވިދާޅުވީ ދުނިޔޭގެ ފުޓްބޯޅަގެ މައި އިދާރާ ފީފާއިން އެފްއޭއެމްއަށް ޖަމާކޮށްފައިވާ 10،000 ޑޮލަރު އެފްއޭއެމްގެ އިސްވެރިއެއްގެ އެކައުންޓަށް ޖަމާކޮށްފައިވާ ކަމަށެވެ. އެ ފައިސާ އެ ފަރާތުން އަމިއްލައަށް ބޭނުންކޮށް، އޭގެ މަންފާ ހޯދާފައިވާ ކަމަށް ތުހުމަތު ކުރެވޭ އެކަށީގެންވާ ހެކި ތަހްޤީގަށް ލިބިފައިވާކަމަށްވެސް ލޫތު ވިދާޅުވިއެވެ.

ލޫތު ވިދާޅުވީ ފުލުހުންނަށް ތަހުޤީގަށް ލިބިފައިވާ ހެއްކާއި ގަރީނާގެ މައްޗަށް ބިނާކޮށް އެފްއޭއެމްގެ އިސް ދެ ވެރިއެއްގެ މައްޗަށް ދައުވާކުރަން މިހާރު ޕީޖީއަށް ފޮނުވާފައިވާ ކަމަށެވެ.

ލޫތު ވިދާޅުވީ އެފްއޭއެމްގެ މި ބޮޑު ހިޔާނާތުގެ މައްސަލަ ތަހުގީގުކުރުން މިހާރުވެސް ކުރިއަށްދާކަމަށެވެ.