އިއްޔެގެ ވަގުތެއްގައި ޕްރެސެކިއުޓާ ޖެނެރަލް (ޕީޖީ) ހުސެއިން ޝަމީމަށް ދިން ނުރައްކާތެރި ހަމަލާއާ ގުޅިގެން މިއަދު ހައްޔަރު ކުރި ދެ މީހުން ތަހުގީގުގެ މަރުހަލާ ނިމެންދެން ބަންދު ކުރުމަށް ކްރިމިނަލް ކޯޓުން އަމުރުކޮށްފިއެވެ.

މިދެމީހުން ތަޙްޤީގު މަރުހަލާ ނިމެންދެން ބަންދުކޮށްފައިވާއިރު މިދެމީހުންގެ މައްޗަށްވެސް ކުރަނީ ނުރައްކާތެރި އެއްޗެއް ބޭނުންކޮށްގެން  މާރާމާރީ ހިންގުމާއި އަދި އަމާން އަމާންކަށް ނަގާލަން މަސައްކަތް ކުރުމުގެ ތުޙްމަތެވެ.

ޕީޖީ ޝަމީމަށް ހަމަލާ ދީފައި ވަނީ އޭނާ އިއްޔެ ދަރިފުޅު ސްކޫލަށް ގެންގޮސް، އެނބުރި ގެއަށް ވަޑައިގެންނެވި މަގުމަތީގައި، ގޭ ދޮރުމަތިންނެވެ. އެ ހަމަލާގައި ޝަމީމުގެ އަތަށް ވަރަށް ބޮޑަށް ގެއްލުންވެ އޭޑީކޭ ހޮސްޕިތަލުން ފަރުވާ ހޯއްދަން ޖެހިފައި ވެއެވެ.

ޕީޖީ ޝަމީމަށް ދެވުނު އެ ހަމަލާއާއި ގުޅިގެން  ދާޚިލީ ސަލާމަތާއި ފަންނިއްޔާތާއި ބެހޭ ވަޒީރު ޢަލީ އިޙުސާން ވަނީ މި މައްސަލައަށް ވަރަށް ބޮޑު އިސްކަމެއް ދެއްވާނެކަމަށާއި، ހަމަލާ ދިން ފަރާތްތައް އިންސާފުގެ ކުރިމައްޗަށް ގެންނާނެ ކަމުގެ ޔަގީން ކަން ދެއްވާފައެވެ.

ޝަމީމަށް ދެވުނު ހަމަލާގައި ދެ މީހަކު ހައްޔަރު ކުރުމާއި ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައި ޕޮލިސް ކޮމިޝަނަރ އަލީ ޝުޖާއު ވިދާޅުވީ މި މައްސަލަ ފުލުހުންގެ ސަމާލުކަމަށް އައި ހިސާބުން ފެށިގެން ފުލުހުންގެ ހުރިހާ ވަސީލަތެއް ބޭނުންކޮށްފައިވާނެ ކަމަށެވެ.

ޕީޖީ ޝަމީމަށް ދެވުނު މި ހަމަލާއާއި ގުޅިގެން މިހާރު ވަނީ އޭނާގެ ސެކިއުރިޓީވެސް ބޮޑުތަނުން ވަރުގަދަ ކުރެވިފައެވެ.