ކުރީ ސަރުކާރުން ކުރިއަށް ގެންދިޔަ ގެދޮރުވެރިޔާ ސްކީމްގެ ދަށުން ދޫކުރުމަށް އިއުލާންކުރި 4000 ފުލެޓު، ދޫކުރުން ހުއްޓާލުމަށް އެންޓި ކޮރަޕްޝަން ކޮމިޝަން (އޭސީސީ) އިން ހައުސިން މިނިސްޓްރީއަށް އެންގި އެންގުން ނިމުމަކަށް ގެނެސްފި އެވެ.
އެ ފުލްޓްތައް ދޫކުރުމުގެ މަސައްކަތް ކުރިއަށް ގެންދަން އޭސީސީން ހުއްދަދީފައިވަނީ އަސާސީ އުސޫލުތަކާއި ޝަރުތުތަކާ އެއްގޮތަށް ޕޮއިންޓް ދީފައިވާ ފޯމުތަކަށް ބަދަލު ނާންނަ ގޮތަށް ކަމަށް އެ ކޮމިޝަނުން ބުނެއެވެ.
އަދި ހަމައެހެންމެ މީގެ ކުރިން މައްސަލަ ހުރި ކަމަށް ފާހަގަވި ފޯމުތައް މުރާޖައާ ކުރުމާއި މުރާޖައާ ކުރުމުގައި، އުސޫލުގައި ސީދާ ކަނޑައެޅިގެން ވަކި ގޮތެއް ބަޔާން ނުކުރާ ކަންކަމާ މެދު ގޮތްތައް ކަނޑައަޅައި މުރާޖައާ ކުރުމުގައި ތަފާތެއް ނެތި، އެއް މިންގަނޑަކުން އަމަލުކުރުމަށް ހައުސިން މިނިސްޓްރީ އަށް ވަނީ އަންގާފައެވެ.
އޭސީސީން ގެދޮރުވެރިޔާ ފްލެޓުތަކުގެ މައްސަލަ ބަލަން ފެށީ، ކުރީ ސަރުކާރުގެ ދައުރު ނިމެން އެއް ދުވަސް ވެފައި ވަނިކޮށް، ގެދޮރުވެރިޔާ ސްކީމްގެ ދަށުން އެންމެ ކުރިން ހަވާލުކުރާ 4،000 ފްލެޓު ލިބޭ މީހުންގެ ދާއިމީ ލިސްޓު އާއްމުކޮށް، ފްލެޓު ލިބޭ މީހުންގެ މެދުގައި ގުރުއަތުނެގުންވެސް ކުރިއަށް ދަނިކޮށެވެ.
އެ މަސައްކަތް އޭރު އެ ކޮމިޝަނުން ހުއްޓުވީ ފްލެޓު ހައްގު ނުވާ ބަޔަކަށް މަގާމުގެ ބޭނުން ނާޖާއިޒު ގޮތުގައި ހިފައިގެން އޭރުގެ ސަރުކާރުން ފްލެޓު ދީފައި ހުރި ކަމަށް އާންމުން ކުރަމުންދިޔަ ތުހުމަތުތަކުގެ ސަބަބުންވެ.
Advertisement
This content is created and paid for by advertisers and does not involve Voice Journalists
