މިހާރު ކުރިއަށްދާ 19 ވަނަ ރައްޔިތުންގެ މަޖިލީހުގެ ރައީސް މުޙައްމަދު އަސްލަމާއި ނައިބު ރައީސް އަހުމަދު ސަލީމްގެ އިތުބާރު ނެތް ކަމަށް ހުށައަޅާފައިވާ މައްސަލައިގެ ނޯޓިސް މިއަދު މި ދޭބެފުޅުންނަށް މަޖިލީހުން ފޮނުވައިފިއެވެ.

އަސްލަމާއި ސަލީމް ގެ އިތުބާރު ނެތް ކަމަށް ބުނެ މައްސަލަ ހުށައެޅީ މިދިޔަ މަހުގެ 28 ވަނަ ދުވަހު ސަރުކާރު ހިންގާ ޕީޕީއެމް/ޕީއެންސީ ކޯލިޝަން ގެ ޕާލިމެންޓަރީ ގްރޫޕުންނެވެ.

އެ ކޯލިޝަނުން މި ދެބޭފުޅުންގެ އިތުބާރު ނެތް ކަމަށް ހުށައެޅީ  އަސްލަމް ވަކި ޕާޓީއެއްގެ މަސްލަހަތު ކުރިއެރުވުމަށާއި، ދުސްތޫރުން މަތިކޮށްފައިވާ ޒިންމާތަކާއި ޚިލާފުވާ ގޮތަށް އަމަލު ކުރައްވާކަމަށް ބުނެ، 23 މެމްބަރުންގެ ސޮޔާއި އެކު އެވެ.  މި ގަރާރުގައި ސޮއި ކުރެއްވި ބޭފުޅުންގެ ތެރޭގައި ޕީޕީއެމް/ޕީއެންސީގެ މެންބަރުންގެ އިތުރުން، އެމްޑީއޭއާއި އެމްއެންޕީގެ މެންބަރުން އަދި އަމިއްލަ މެންބަރު މުހައްމަދު ނަޝީދު އަބްދުالله ވެސް ހިމެނިވަޑައިގަންނަވައެވެ.

އިދިކޮޅުން ރައީސް ޑރ.މުއިއްޒުގެ ކެބިނެޓްގެ ބައެއް ވަޒީރުންނަށް ރުހުން ނުދޭން ނިންމުމާއި ގުޅިގެން މަޖިލިސް ތެރޭ އުފެދުނު ހަމަނުޖެހުންތަކުގެ ތެރެއިން ޕީޕީއެމް/ޕީއެންސީ ކޯލިޝަންގެ ޕީޖީ ގްރޫޕުން ހުށައެޅި ގަރާރުގައި ބުނެފައިވަނީ ވަޒީރުންނަށް ރުހުންދޭން ސަރުކާރުގެ މަސްއޫލިއްޔަތު އަދާ ކުރާ ކޮމިޓީން، އެ ބައްދަލުވުމަށް ހާޒިރުވި ހުރިހާ މެމްބަރުންގެ އިއްތިފާގުން ނިންމައި، އެ ރިޕޯޓް މަޖިލީހަށް ހުށައެޅި ކަމަށެވެ. ނަމަވެސް އަސްލަމް އެ މައްސަލަ އަށް ބަހުސް ކުރުމަށް ފުރުސަތު ނުދީ، އެ މައްސަލަ އާއި ގުޅޭ ގޮތުން މެމްބަރުންގެ ވޯޓަކަށް ވެސް ނާއްސަވާ، އެ ރިޕޯޓް އަނބުރާ ކޮމިޓީ އަށް ފޮނުވާލި ކަމަށް ވެސް އެ ގަރާރުގައި ވެއެވެ.

މަޖިލީހުގެ ރައީސް އާއި ނައިބު ރައީސްގެ އިތުބާރު ނެތް ކަމަށް ހުށަހަޅާފައިވާ މައްސަލައިގެ ނޯޓިސް ފޮނުވިއިރު، މި ހިނގާ 19 ވަނަ މަޖިލީހުގެ ފަހު ދައުރު ފައްޓާ ޖަލްސާ މާދަމާ އޮންނާނެއެވެ. އެ ޖަލްސާގައި ރައީސް ޑރ. މުހައްމަދު މުއިއްޒުގެ ފުރަތަމަ ރިޔާސީ ބަޔާން އިއްވުމަށް ވަނީ ހަމަޖެހިފައެވެ.

މަޖިލީހުގެ ރައީސް ކަމާއި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ހަވާލުވެވަޑައިގަތީ މި ދައުރުގެ ރައީސް ކަމުގައި ހުންނެވި ކުރީގެ ރައީސް މުހައްމަދު ނަޝީދު މަގާމުން އިސްތިއުފާ ދެއްވުމާއި ގުޅިގެންނެވެ. ނަޝީދާއި އެކު އޭރު މަޖިލީހުގެ ނައިބު ރައީސާގެ މަގާމުގައި ހުންނެވި އީވާ އަބްދުالله ވެސް ވަނީ މަގާމުން އިސްތިއުފާ ދެއްވާފައެވެ. 

ނަޝީދާއި އީވާ މަގާމުން އިސްއުފާ ދެއްވީ މި ދެބޭފުޅުންގެ ވެސް އިތުބާރު ނެތް ކަމުގެ މައްސަލަ އެމްޑީޕީން ހުށައަޅައި، މަޖިލީސް ހުއްޓުވީ ގާނޫނު އަސާސީއާ ހިލާފަށް ކަމަށް ސުޕްރީމް ކޯޓުން ހުކުމްކޮށްފައި ވަނިކޮށް ކަން ފާހަގަކޮށްލަން ޖެހެއެވެ.