ދިވެހިރާއްޖެއަށް ބޭރުގެ މަސައްކަތްތެރީން ގެނައުމުގައި ގެންގުޅެންޖެހޭ ގަވާއިދުތަކާ ޚިލާފުވާ ވަޒީރުންނަށާއި މިނިސްޓްރީ ތަކަށް ފިޔަވަޅު އަޅަންޖެހޭ ކަމަށް މަޖިލީހުގެ ވިލުފުށީ ދާއިރާގެ މެންބަރު ހަސަން އަފީފް ވިދާޅުވެއްޖެއެވެ.
ހަސަން އަފީފް މިހެން ވިދާޅުވީ މިއަދު ބޭއްވި ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ތިންވަނަ ޖަލްސާގައި، ތުޅާދޫ ދާއިރާގެ މެމްބަރު ހިސާން ހުސައިން، ދައުލަތުގެ ހުރިހާ މުއައްސަސާތަކުން ނުވަތަ ދައުލަތުގެ ތިން ބާރުން، ހެދިފައިވާ ޤާނޫނުތަކާ އެއްގޮތަށް މަސައްކަތް ކުރުމަށް ގޮވާލާއި ހުށަހެޅުނު ކުއްލި މައްސަލައަށް ބަހުސް ކުރައްވަމުންނެވެ.
އެގޮތުން ހަސަން އަފީފް ވިދާޅުވީ ޤާނޫނާ ޚިލާފަށް ކަންކަން ކުރަމުންދާ މިނިސްޓްރީތަކަށް، އެކަންތައްތައް ރަނގަޅަށް ސާފުކޮށްދެން ޖެހޭ ކަމަށާއި، އަދި ޤާނޫނާއި އެއްގޮތަށް އެ ކަންތައްތައް ނުކުރާ ކަމަށްވަނީނަމަ އެ ވަޒީރެއްގެ އިތުބާރުނެތްކަމަށް މަޖިލީހަށް ހުށައަޅާ އެ މަޤާމަކުން ދުރުކުރުވަން ޖެހޭކަމަށެވެ.
"ދިވެހިރާއްޖޭގެ ވަޒީފާއާއި ބެހޭ ޤާނޫނުގައި ބިދޭސީން އެއް ޤައުމަކުން އެންމެ ގިނަ އަދަދަކަށް ގެނެވޭނެކަމަށް ބުނެފައިވަނީ އެއްލައްކަ މީހުން. ނަމަވެސް ހަމަ ސަރުކާރުގެ ތަފާސްހިސާބުތަކުގައި އެބަ ދައްކާ ވަކި ޤައުމަކަށް ނިސްބަތްވާ 139000 (ސަތޭކަ ތިރީސް ނުވަ ހާސް) މީހުން މިހާރުވެސް ދިވެހިރާއްޖޭގައި ވަޒީފާ އަދާކުރަމުންދާ ކަމަށް. އެހެން އޮއްވާ، ޤާނޫނާ ޚިލާފަށް އަނެއްކާ އެޤައުމުން އިތުރަށް މަސައްކަތްތެރީން ރާއްޖެ އެތެރެ ކުރުމަށް ހުއްދަ ދިނުމަކީ ޤާނޫނާ ކަނޑައެޅިގެން ޚިލާފަށް ކުރާ ކަމެއް."
ހަސަން އަފީފު
މީގެ އިތުރުންވެސް ހަސަން އަފީފް ވަނީ، މިސަރުކާރުގެ އާކޮޅުގައި ޤާނޫނާ ޚިލާފުވާކަމުގެ މައްސަލަތައް ފެންމަތިވަމުންދާއިރު، ދުވަސްވަމުންދާ ވަރަކަށް، ފަހުކޮޅަށް ގޮސް ކިހިނެއްވާނެތޯ އާއި އަދި ކިހާވަރަކަށް ޤާނޫނާ ޚިލާފުވާނެތޯ ސުވާލު އުފައްދަވާފައެވެ.
Advertisement
This content is created and paid for by advertisers and does not involve Voice Journalists
