ރައީސުލް ޖުމުހުރިއްޔާ ޑރ. މުހައްމަދު މުއިއްޒުގެ ސަރުކާރުން ވަޒީރުންގެ މަޖިލހަށް އައްޔަން ކުރެއްވި 22 ވަޒީރުންގެ ތެރެއިން މަޖިލިހުގެ ރުހުން ނުލިބުނު ތިން ވަޒީރުން އަލުން އެ މަޤާމުތަކަށް އައްޔަން ކުރެއްވުމަށްފަހު އެތިން ވަޒީރުންނަށް ރުހުން ހޯދުމަށް މިއަދު މަޖިލިހަށް ފޮނުވައިފިއެވެ.
މިކަން ކަށަވަރު ކޮށްދެއްވަމުން ރައްޔިތުންގެ މަޖިލީހުގެ ކޮމިޔުނިކޭޝަންސް ޑިރެކްޓަރު ހަސަން ޒިޔާއު" ވޮއިސް"އަށް ވިދާޅުވީ ތިން ވަޒީރުންނަށް ރުހުން ހޯދުމަށް މިއަދު މަޖިލހަށް ފޮނުވާފައިވާ ކަމަށެވެ.
"ތިން ވަޒީރުންނަށް ރުހުން ހޯދުމަށް މަޖިލިހަށް ފޮނުވާފަ އޮތީ، އެކަމުގައި މަޖިލިހުން އަމަލުކުރާނެ ވަކި ގޮތެއް އަދި ނުނިންމާ"
ޒިޔާއު ވިދާޅުވިއެވެ.
މަޖިލީހަށް ރުހުން ހޯދުމަށް ފޮނުވާފައިވަނީ ބަންޑާރަނައިބު އަހުމަދު އުޝާމާއި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި އަދި ހައުސިން މިނިސްޓަރު ޑރ. އަލީ ހައިދަރަށެވެ.
ދައުރުން ބޭރު ވަޒީރުންނަށް ރުހުން ދިނުމަށް މިދިޔަމަހު 29 ވަނަ ދުވަހު މަޖިލިހުގެ ޖަލްސާއެއް ބާއްވާފައި ވާއިރު، އެޖަލްސާގެ ކުރިން އެމްޑީޕީ ޕީޖީ ގްރޫޕުން ވަނީ ރައީސް ޑރ.މުހައްމަދު މުއިއްޒުގެ ކެބިނެޓުގައި ހިމެނި ވަޑައިގަންނަވާ 4 ވަޒީރަކަށް ރުހުން ނުދިނުމަށް ތްރީލައިން ވިޕެއް ނެރެފައެވެ.
އޭގެ އިތުރުން ދަ ޑިމޮކްރެޓްސް އިންވެސް ވަނީ މި ސަރުކާރުގެ ތިން ވަޒީރަކަށް ރުހުންދޭން ނުފެންނަ ކަމަށް ނިންމާފައެވެ.
އެހެން ކަމާއިއެކު މިދިޔަ މަހުގެ 29 ވަނަ ދުވަހު ބޭއްވުނު މަޖިލިހުގެ ޖަލްސާއިން މި ސަރުކާރުގެ 3 ވަޒީރަކަށް ރުހުން ދޭން ނުފެންނަ ކަމަށް ވަނީ ފާސްކޮށްފައެވެ. އެމްޑީޕީން ރުހުން ދޭން ނުފެންނަ ކަމަށް ނިންމި ވަޒީރުންގެ ތެރެއިން މަޖިލިހުގައި ރުހުން ލިބި ވަޑައިގެންނެވީ އިކޮނޮމިކް މިނިސްޓަރ މުޙައްމަދު ސައީދަށެވެ.
މަޖިލިހުން ރުހުން ނުލިބުނު ވަޒީރުންނަށް އަލުން ވަޒީރުކަން ދިނުމުން އެކަންތައްތައް ބޮޑު ބަހުސަކަށް ދިޔަ ނަމަވެސް އެކަމުގައި ޤާނޫނީ ހުރަހެއް ނެތްކަމަށް ގިނަ ފަރާތްތަކުން ޤަބޫލުކުރައްވައެވެ. އެކަމުގެ ހުއްޖަތެއްގެ ގޮތުގައި ގިނަ މީހުން ދައްކަނީ އެތިން ބޭފުޅުންނަށް ވަޒީރުކަން އަލުން ހަވާލުކުރެއްވުމުގެ ގޮތުން ހުވާލައިދެއްވުމަށް ސުޕްރީމް ކޯޓުގެ ފަނޑިޔާރު ހުސްނުއްސުއޫދު ވަޑައިގެންނެވި ވަޑައިގެންނެވުމެވެ.
Advertisement
This content is created and paid for by advertisers and does not involve Voice Journalists
