ހުޅުމާލެ ދެވަނަ ފިޔަވަހީގައި މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ މުވައްޒަފުންނަށް  ދޫކޮށްފައިވާ "ޕޯޓް ރެސިޑެންސް" އެޕާޓްމެންޓްތަކުގެ ކުލި ކުޑަ ކޮށްދީ، ކުލި ދައްކަން ފަށާ މުއްދަތު ފަސް ކޮށްދެއްވާނެ ކަމަށް އެ ކުންފުނިން ބުނެފިއެވެ.

އެކުންފުނން އެކަން ހާމަކޮށްފައި ވަނީ ދައުލަތު މީޑިއާ ޕީއެސްއެމްގެ ރާއްޖެ މިއަދު ޕްރޮގްރާމްގައި އެ ކުންފުނީގެ ސީއީއޯ މުހައްމަދު ވަޖީހު އިބްރާހިމް ވާހަކަ ދައްކަވަމުންނެވެ.

ވަޖީހު ވިދާޅުވީ ފްލެޓްތަކުގެ މަސައްކަތް އަވަހަށް ނިންމާލައި، އެތަނަށް މީހުން ވެއްދުމުގެ މަސައްކަތް މިހާރު ކުރަމުންދާ ކަމަށެވެ.

އެޕްރޮގްރާމުގައި ވަޖީހު އިތުރަށް ވިދާޅުވީ އެޕްރީލްމަހުން ފެށިގެން ކުލި ނަގާގޮތަށް އޮތުމުން މުއައްޒަފުންގެ ބޮޑަތިކަން ބޮޑުވުންތަކެއް ހުރިކަން އެނގުނު ހިސާބުން އެކަން ރަނގަޅުކުރުމަށް މަސައްކަތް ކުރައްވަމުން ގެންދަވާ ކަމަށެވެ. އަދި ފުލެޓްތަކުގެ ކުލި މިހާރު ނަގަން ނިންމާފައިވާ އަގު ކުޑަކުރުމުގެ މަޝްވަރާވެސް ކަމާއި ގުޅުންހުރި ފަރާތްތަކާއި ގުޅިގެން ކުރައްވަމުން ގެންދަވާ ކަމަށެވެ.

އެމްޕީއެލްގެ މުއައްޒަފުންނަށް އަމާޒުކޮށްގެން އަޅާފައިވާ ތިން ޓަވަރުގައި ހިމެނެނީ އެއް ކޮޓަރީގެ 204 ޔުނިޓާއި، އަދި  ތިން ކޮޓަރީގެ 330 ޔުނިޓާއި އެކު މުޅި ޖުމުލަ 534 އެޕާރޓްމަންޓެވެ.

އެމްޕީއެލްގެ ފުލެޓްތަކުގެ ކުލި ފަސްކޮށްދީ ، ކުޑަކޮށްދިނުމަށް ނިންމާފައިވާއިރު މި ސަރުކާރު ވެރިކަމަށް އައިސް ހުޅުމާލެ ފޭސް 1 އަދި ފޭސް 2 ގެ ފުލެޓް ތަކުގެ ކުލީގެ ބޮޑުބައެއް ވަނީ ކުޑަކޮށްދީފައެވެ.