ތ. ވޭމަންޑުއާއި ކިނބިދޫ ކޯޒްވޭއަކުން ގުޅާލެވި، ދެ ރަށް އެއްފަސްވެގެން ދިޔުމުން މަތީ ތައުލީމުގެ ފުރުސަތުތައް އިތުރަށް ފަހިވެގެންދާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ރައީސް މިހެން ވިދާޅުވެފައި ވަނީ އާންމު ރައްޔިތުންގެ ސުވާލުތަކަށް ސީދާ ރައީސް ޖަވާބުދެއްވާ 'ރައީސްގެ ޖަވާބު' ސިލްސިލާގައި މިއަދު ތ.ކިނބިދޫ، ނަރުގިސްވިލާ، ޢާއިޝަތު ވަސީލާ، ކުރެއްވި ސުވާލަށް ޖަވާބު ދެއްވަމުންނެވެ.
އެގޮތުން ވަސީލާ ވަނީ އެ ރަށުގައި މަތީ ތައުލީމުގެ ފުރުސަތުތައް ފަހިވެފައި ނެތްކަން ފާހަގަ ކުރައްވައި މަތީ ސާނަވީ ތައުލީމާއި ޔުނިވަސިޓީ ތަޢުލީމްގެ ފުރުސަތު ފަހިކޮށްދެއްވުމަށް ރައީސް މުޢިއްޒުގެ ސަރުކާރުން ގެންގުޅުއްވާ ވިސްނުންފުޅާ ގުޅޭ ގޮތުން ސުވާލު އަމާޒުކޮށްފައެވެ.
އެ ސުވާލަށް ޖަވާބުއަރުވަމުން ރައީސް ވިދާޅުވީ، ކިނބިދޫގައި މިހާރު އޭލެވެލްއަށް ކިޔެވުމުގެ ފުރުސަތު ފަހިވެފައި ނެތް ނަމަވެސް، އެ ރަށާއި ވޭމަންޑުއާ ގުޅުވައިލައި ނިމުމުން، އެ ކަމަށް ހައްލުތަކެއް އަންނާނެ ކަމަށެވެ.
"ވޭމަންޑުއާއި މި ރަށާ [ކިނބިދޫ] ކޯޒްވޭއަކުން ގުޅައިލެވުނީމާ، އެއް ކަމަކަށް އެއްގަމުން ދެވޭގޮތް ވާނެ. އޭރުން އެއްފަސްވީ. އެއްފަސްވީމާ ލިބޭ ފައިދާތައް ހުންނާނެ، ތައުލީމު ހާސިލުކުރުމުގައި ވެސް. އެއީ އެއްގޮތް އަޅުގަނޑު ވިސްނާ. ތިކަން (މަތީ ސާނަވީގެ މައްސަލަ) ހައްލު ކުރަން. ޕޮއިންޓަކީ، ތި ބޭނުންވާ ކަންތައް ވަރަށް އަވަހަސް ހާސިލް ކޮށްދެއްވާނަމޭ އިރާދަކުރެއްވިޔާ."
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
މީގެ އިތުރުން، އެރަށުގައި ޔުނިވާސިޓީ ކެންޕަސް އެއް ފަދަ ތަނެއް ގާއިމް ކޮށްގެން ޔުނިވާސިޓީ ތަޢުލީމް ހާސިލް ކުރުމުގެ މަގުފަހި ކުރުމާއި ގުޅޭގޮތުން ކުރެވުނު ސުވާލަށް ޖަވާބު ދެއްވަމުން ރައީސް މުއިއްޒު ވިދާޅުވީ، ކިނބިދުއާއި ވޭމަންޑޫ އެއްފަސްވެ، ކޯޒްވޭއަކުން ގުޅައިލެވުމުން އެ މައްސަލައަށް އެދެވޭ ހައްލެއް ހޯދައިދެއްވާނެ ކަމަށެވެ. އެ ކަން ކުރެވެން އޮތް އެންމެ ރަނގަޅު ގޮތަކީ އެއީ ކަމަށް އެ މަނިކުފާނު ވިދާޅުވިއެވެ.
"ޔުނިވާސިޓީގެ ކެމްޕަސް ގާއިމުކުރުން ވިޔަސް އެ ކަހަލަ ޔުނިވާސިޓީ ތައުލީމުގެ ފުރުސަތުތައް ހަމަ އެއްފަސްވެގެން އާބާދީ ބޮޑުވީމާ [ކުރެވޭނެ]. އޭރަށް އެހެން ރަށްރަށު މީހުން ވެސް އަންނާނެ. އެ ކަހަލަ ގޮތަކަށް އެކަން ކުރީމާ ރަނގަޅުވާނެ ކަންނޭނގެ. ވަރަށް ސަމާލުކަންދޭނަން ތިކަމަށް."
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
2018 ވަނަ އަހަރުގެ ރިޔާސީ އިންތިހާބުގެ ތެރެއިން، ކުރީގެ ރައީސް އިބްރާހިމް މުހައްމަދު ޞާލިހު ވެސް ވަނީ ތ. ކިނބިދޫ އާއި ވޭމަންޑޫ ކޯޒްވޭއަކުން ގުޅާލުމަށް ވައުދުވެވަޑައިގެންފައެވެ. އެހެންނަމަވެސް، ދައުރު ނިމުނުއިރު ވެސް މަޝްރޫއުގެ މަސައްކަތް ފެށިފައިނުވާއިރު، އެއްވެސް ކުރިއެރުމެއް ވެސް ލިބިފައެއް ނުވެއެވެ.
ރައީސުލްޖުމްހޫރިއްޔާ ޑރ މުހައްމަދު މުޢިއްޒު މި ހަފުތާގައި ތ. އަތޮޅަށް ކުރެއްވި ދަތުރުފުޅުގައި ވަނީ ކިނބިދޫ - ވޭމަންޑޫ ކޯޒްވޭގެ ހުވަފެން އެމާނިކުފާނުގެ މި ސަރުކާރުން ހަގީގަތަކަށް ހަދައިދެއްވާނެ ކަމަށް ވައުދުވެވަޑައިގެންފައެވެ. އަދި އެކަމަށް އެންމެ އިސްކަމެއް ދެއްވާނެ ކަމަށްވެސް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
