ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް "ސޮނީ ސްޕޯޓްސް ގޯލްޑަން ފުޓްސަލް ޗެލެންޖު 2024" ވ. އަތޮޅު އަތޮޅު ފައިނަލުގެ ފުރަތަަމަ ލެގުގައި ހުކުރުދުވަހުގެ ރޭ ފެލިދޫ އާއި ކެޔޮދޫ ވާދަކުރި މެޗު ފަސޭހަކަމާއި އެކު 5-2 ގެ ނަތީޖާއަކުން ކެޔޮދޫ އިން ކާމިޔާބުކޮށްފި އެވެ.
ހުޅުމާލޭ ރެހެންދި ދެ ނަންބަރު ފުޓްސަލް ދަނޑުގައި ކުޅެވުނު މި މެޗުގެ ފުރަތަަމަ ހާފުގައި ކެޔޮދޫގެ ފަރާތުން ތަފާތު މޮޅު ކުޅުމެއް ފެނިގެންދިޔަ އިރު މި ހާފުގައި އެޓީމުން ވަނީ ހަތަރު ލަނޑުގެ ލީޑެއް ނަގާފައެވެ.
ނަމަވެސް ދެވަނަ ހާފުގައި ފެލިދޫ އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން މިހާފުގައި އެޓީމުން ވަނީ ދެލަނޑު ކާމިޔާބުކޮށް ނަތީޖާގެ ފަރަގު ކުޑަކޮށްފައެވެ. ނަމަވެސް މެޗުގެ ފަހުވަގުތު ކޮޅުގެ ތެރޭގައި ކެޔޮދޫ އިން ވަނީ އިތުރު ލަނޑެއް ކާމިޔާބުކޮށް އަނެއްކާވެސް ތިން ލަނޑުގެ ލީޑެއް ނަގާފައެވެ.
މިމެޗުގައި ކެޔޮދޫގެ އަހުމަދު ރަޝީދު ތިން ލަނޑު ކާމިޔާބުކޮށް ހެޓްރިކް ހެދި އިރު އެޓީމުގެ އަނެއް ދެލަނޑު ކާމިޔާބުކޮށްދިނީ އިބްރާހިމް ފުއާދު އަދި އަރީން އަބްދުﷲ އިބްރާހިމް އެވެ. އަދި މިމެޗުގައި ފެލިދޫގެ ލަނޑުތައް ކާމިޔާބުކޮށްދިނީ މުހައްމަދު ފައިޒާން ފަޒީން އަދި އަބޫބަކުރު އިބްރާހިމް އެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ކެޔޮދޫ ޓީމުގެ އަހުމަދު ރަޝީދު އެވެ.
މިދެޓީމުގެ މެދުގައި ކުޅެވޭ ފައިނަލް މެޗުގެ ދެވަަނަ ލެގު ކުޅުމަށް ހަމަޖެހިފައިވަނީ މިމަހުގެ 13 ވަނަ ދުވަހުގެ ރޭ 21:00 ގައެވެ.
މިއަހަރުގެ ގޯލްޑަން ފުޓްސަލް ޗެލެންޖުގައި ޖުމްލަ 129 ޓީމު ބައިވެރިވެފައިވާއިރު، މުބާރާތުގައި 320 މެޗު ކުޅުމަށް ވަނީ ހަމަޖެހިފައެވެ. އަދި މިއަހަރުގެ މުބާރާތުގައި ވ. އަތޮޅުން ދެޓީމް ބައިވެރިވުމާއެކު އަތޮޅު ޗެންޕިއަންކަން ކަނޑައެޅުން ހަމަޖެހިފައިވަނީ ބައިވެރިވި ދެޓީމުގެ މެދުގައި ދެ މެޗު ކުޅެ، ދެ މެޗުގެ އެގްރިގޭޓުން ކުރި ހޯދާ ޓީމަކަށް އަތޮޅު ޗެންޕިއަންކަން ލިބޭގޮތަށެވެ.
Advertisement
This content is created and paid for by advertisers and does not involve Voice Journalists
