މަސްވެރިންނަށް ދޭން ޖެހޭ ފައިސާ ދިނުން އަވަސްކުރުމަށް ސަރުކާރަށް ގޮވާލާ މަޖިލީހަށް ގަރާރެއް ހުށައަޅައިފިއެވެ.
އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ހުށައެޅުއްވި މި ގަރާރުގައި ވަނީ މިއީ މަސްވެރިން ކުރަމުން އަންނަ ބުރަ މަސައްކަތަށް ފައިސާ ދިނުމުގައި ދެމަހަށް ވުރެ ގިނަ ދުވަސް ދިޔައިރު ވެސް އެފަރާތްތަކަށް ފައިސާ ނުލިބޭތީ، މަސްވެރިންގެ ދިރިއުޅުމުގެ ކަންކަމަށް ދަތި ވަމުންދާ ކަމަށެވެ.
މި ގަރާރުގައި ރޮޒައިނާ ވަނީ މަސްވެރިންގެ އަގުވަޒަންކޮށް މަސްވެރިކަމުގެ ސިނާއަތުގައި މަސައްކަތްކުރާ ފަރާތްތަކަށް ރަނގަޅު އާމްދަނީއާއި ނަފާ ހޯދުމަށް އެހީތެރިވެދިނުމަކީ ދިވެހިރާއްޖޭގެ މަސްވެރިކަމުގެ ގާނޫނުގެ މަގުސަދުތަކުގެ ތެރޭގައި ބަޔާންކޮށްފައިވާ ކަމެއް ކަމަށެވެ. މީގެ އިތުރުންވެސް ރައީސް ޑރ. މުހައްމަދު މުއިިއްޒުގެ ރިއާސީ ވައުދުގެ ތެރޭގައި މަސްކިރާ ވަގުތުން ފެށިގެން 48 ގަޑިއިރުތެރޭގައި މަސްވެރިޔާއަށް ފައިސާ ލިބޭނެ އިންތިޒާމު ހަމަޖައްސައި ދެއްވާނެ ކަމަށް ބަޔާން ކޮށްފައިވާ ކަމަށް ވެސް އެގަރާރުގައި ވެއެވެ.
މީގެ އިތުރުންވެސް މި ގަރާރުގައި ބުނެފައިވަނީ މަސްވެރިންނަކީ ރާއްޖޭގެ އިގްތިސާދު ބިނާކުރުމުގައި ބުރަ އަދި މުހިއްމު މަސައްކަތެއް ކުރަމުންދާ ބައެއް ކަމަށްވާތީ، އެ މަސައްކަތުގެ އަގު މަސްވެރިންނަށް ލިބުމަކީ މަސްވެރިންގެ ހައްގެއް ކަމަށެވެ. އަދި ގައުމުގެ އިގްތިސާދާ ގުޅިފައިވާ މިފަދަ މުހިއްމު ކަމެއްގައި ސަރުކާރުން ވެފައިވާ ވައުދުތަކާއި ގާނޫނުން މަސްވެރިންނަށް ލިބިދޭ ހައްގުތައް ކަށަވަރުކޮށްދިނުމަކީ ސަރުކާރުގެ ޒިންމާއެއް ކަމަށްވެސް ވަނީ ބުނެފައެވެ.
މި ގަރާރު މަޖިލީހަށް ހުށައަޅާފައިވާއިރު، ދާދި ފަހުން މަސްވެރިކަމާއި ބެހޭ ވުޒާރާގެ ވަޒީރު އަހުމަދު ޝިޔާމް ވަނީ ރައީސް ޑރ. މުޢިއްޒުގެ އެދިވަޑައިގަތުމަށް ސަވަރިން ގެރެންޓީދީގެންވެސް މަސްވެރިންނަަށް ކުރީ ސަރުކާރުން ނުދީ ހުރި ފައިސާ ދިނުމަށް ފެސިލިޓީއެއް ހޯދުމުގެ މަސައްކަތް ބާރަށް ކުރަމުންދާ ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
