ރާއްޖޭގައި ގޭންގު މަރާމާރީއާއި ގޭންގު ކުށްތައް ގިނަވެފައިވީ ނަމަވެސް ގޭންގަކީ ކޮބައިކަން ދެނެގަނެވޭނެ ރަނގަޅު ޤަވާއިދެއް ނެތުމުން، ގޭންގުކުށްތަކާއިބެގޭ ޤާނޫނަށް އިސްލާހް ގެނައުމުގެ މަސައްކަތް ކުރަމުން އަންނަކަމަށް ޕޮލިސް ކޮމިޝަނަރު އަލީ ޝުޖާއު ވިދާޅުވެއްޖެއެވެ.

ޕޮލިސް ކޮމިޝަނަރ މިފަދައިން ވިދާޅުވެފައި ވަނީ "ހޯމް ޓީމް" ގެ ނަމުގައި  ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުންނެވެ. ޝުޖާއު ވިދާޅުވީ ގާނޫނަށް ގެންނަން ޖެހޭ އިސްލާހުތައް ގެނައުމަށް ފުލުހުން ކުރަންޖެހޭ މަސައްކަތްތައް ކޮށް ނިމިފައިވާ ކަމަށާއި އިސްލާހުގެ ޑްރާފްޓް ނިމި މަޖިލިސްއަށް ފޮނުވުމަށް ތައްޔާރުވެފައިވާ ކަމަށެވެ.

މި ބައްދަލުވުމުގައި ޕޮލިސް ކޮމިޝަނަރ ސުޖާއު އިތުރަށް ވިދާޅުވީ ޕޮލިހުންގެ އުންމީދަކީ  ފުލުހުންގެ ބޭނުންވާ ގާނޫނީ އިސްލާހުތައް އަވަހަށް ރައްޔިތުންގެ މަޖިލީހުން ފާސްވެގެން ދިޔުން ކަމަށެވެ.

ރާއްޖޭގައި ހިނގާ ގިނަ ގޭންގު މާރާމާރީ އާއި ގޭންގު ކުށްތަކާއި ގުޅިގެން ކަމާއި ގުޅުންހުރި މުއައްސަސާތަކުން އަބަދުވެސް ފާހަގަކުރަމުން ގެންދާ އެއްކަމެއް އޮވެއެވެ. އެއީ  މީގެ 13 އަހަރު ކުރިން، 2010 ވަނަ އަހަރު ވުޖޫދަށް ގެނައި ގޭންގު ކުށްތައް ހުއްޓުވުމުގެ ގާނޫނު ފަރުމާކުރެވިފައިވާ ގޮތުން ކުށްތަކަށް އަރައި ގަންނަ ފަރާތްތައް އިންސާފުގެ ކުރިމައްޗަށް ގެނައުމުގައި ބޮޑަތި ގޮންޖެހުންތަކެއް ހުރިކަމެވެ.

މިއަދުގެ ބައްދަލުވުމުގައި ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހްސާން ވިދާޅުވީ ގޭންގު ކުށްތައް ހުއްޓުވުމަށްޓަކައި ކުރަން ޖެހުނު ކޮންމެ ކަމެއް މިސަރުކާރުން ކުރާނެ ކަމަށާއި އެކަމުގައި ފަސްނުޖެހޭނެ ކަމަށެވެ.