ރައްޔިތުންގެ މަޖިލީހުން ރުހުން ނުދިން ވަޒީރުން އަލުން އެ މަގާމަށް އައްޔަނު ކުރެއްވުމާއި ދެކޮޅަށް މަޖިލީހަށް ހުށަހަޅާފައިވާ ގަރާރާއިމެދު ގޮތެއް ނިންމެންދެން، އެ ވަޒީރުންނަށް ރުހުން ދިނުމުގެ މައްސަލަ ތާވަލް ކުރުން ފަސް ކުރެއްވުމަށް މަޖިލީހުގެ ރައީސް މުހައްމަދު އަސްލަމް ނިންމަވައިފިއެވެ. 

ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ކެބިނެޓަށް އައްޔަނު ކުރެވުނު ވަޒީރުންގެ ތެރެއިން، އިސްލާމީ ކަންތައްތަކާ ބެހޭ ވުޒާރާގެ ވަޒީރު ޑރ މުހައްމަދު ޝަހީމް ޢަލީ ސަޢީދާއި، ގެދޮރުވެރިކަމާއި ބިމާއި ޢުމްރާނީ ތަރައްޤީއާއި ބެހޭ ވުޒާރާގެ ވަޒީރު ޑރ ޢަލީ ހައިދަރު އާއި ބަންޑާރަ ނާއިބު އަހުމަދު އުޝާމަށް މަޖިލީހުން ރުހުން ދީފައެއް ނުވެއެވެ. 

އެހެން ނަމަވެސް، ބަންޑާރަ ނާއިބާއި އެ ދެ ވަޒީރުން އަލުން މަގާމަށް އައްޔަނު ކުރައްވައި ރުހުން ހޯއްދެވުމަށް މަޖިލީހަށް ފޮނުއްވާފައި ވާއިރު، އެފަދައިން މަޖިލީހުން ރުހުން ނުދޭ ވަޒީރުން އަލުން މަގާމަށް އައްޔަނު ކުރުމާއި ދެކޮޅަށް ގަލޮޅު އުތުރު ދާއިރާގެ މެންބަރު އީވާ އަބްދުالله ވަނީ މަޖިލީހަށް ގަރާރެއް ހުށަހަޅުއްވާފައެވެ.

މިއަދުގެ މަޖިލީހުގެ ޖަލްސާ ފަށްޓަވަމުން އަސްލަމް ވަނީ، އެފަދަ މައްސަލާގައި މީގެ ކުރިން މަޖިލީހުގައި ކަން ހިނގައިދިޔަ ގޮތުގެ މައްޗަށް އަލި އަޅުއްވާ ލައްވާފައެވެ. 

އެގޮތުން ކުރީގެ ރައީސް މުހައްމަދު ނަޝީދުގެ ވެރިކަމުގައި އެޓާނީ ޖެނަރަލްގެ މަޤާމަށް ޑރ އަހުމަދު ޢަލީ ސަވާދަށް ދެފަހަރުގެ މަތީން ރުހުން ދިނުމަށް ފޮނުއްވުމުންވެސް މަޖިލީހުން ރުހުން ދީފައި ނުވާ ކަމަށާ، އެހެންކަމުން އެ މަގާމަށް އެހެން ބޭފުޅަކު އައްޔަނުކުރައްވައި ރުހުން ދިނުމަށް ފޮނުއްވިއިރު، އެ ބޭފުޅާއަށް ރުހުން ލިބުނުކަން އަސްލަމް ފާހަގަކުރެއްވި އެވެ. 

މިއާއެކު އަސްލަމް ވިދާޅުވީ ރުހުން ނުލިބިވާ ވަޒީރުން އަލުން އައްޔަނު ކުރެއްވުމާއި ދެކޮޅަށް ހުށަހެޅުނު މައްސަލައާއި މެދު ގޮތެއް ނިންމެންދެން އެ ވަޒީރުންނަށް ރުހުން ދިނުމާ ގުޅޭ މައްސަލަ ފަސްކުރައްވަން ނިންމަވާފައިވާ ކަމަށެވެ. 

އީވާ ހުށަހެޅުއްވި އެ ގަރާރުގެ ފުރަތަމަ ކިޔުން އިއްވައި އިބްތިދާއީ ބަހުސް މިއަދު ވަނީ ފަށާފައެވެ.