ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ތުރުކީވިލާތުގެ ރައީސް ރަޖަބް ޠައްޔިބް އުރްދުޣާން އާއި ބައްދަލުކުރައްވައިފިއެވެ.
މިއީ ރައީސުލްޖުމުހުރިއްޔާ ރާއްޖޭގެ ވެރިކަމާއި ހަވާލުވެ ވަޑައިގެންނެވުމަށްފަހު ތުރުކީ ވިލާތުގެ ރައީސާއި ބައްދަލުކުރެއްވި ދެވަނަ ފަހަރު ކަމަށްވާ އިރު މިއަދުގެ މި ބައްދަލުވުމަކީ ޔޫއޭއީގައި މިހާރު ކުރިއަށްދާ ވޯލްޑް ގަވަރމަންޓްސް ސަމިޓުގެ ހަވާސާގައި ބޭއްވެވި ބައްދަލު ކުރެއްވުމެކެވެ.
މި ބައްދަލު ކުރެއްވުމާއި ގުޅޭގޮތުން ރައީސް އޮފީހުން ވިދާޅުވީ މި ބައްދަލުކުރެއްވުމުގައި ދެ ޤައުމުގެ ގުޅުން އިތުރަށް ބަދަހިކުރުމާއި ގުޅޭގޮތުން މަޝްވަރާކުރެއްވިކަމަށެވެ.
ރައީސުލްޖުމުހުރިއްޔާ ޑރ.މުހައްމަދު މުއިއްޒު ރާއްޖޭގެ ވެރިކަމާއި ހަވާލުވެ ވަޑައިގެންނެވުމަށްފަހު އެންމެ ފުރަތަމަ ރަސްމީ ދަތުރުފުޅެއްގައި ވަޑައިގެންފައި ވަނީ ތުރުކީވިލާތަށެވެ. އެ ދަތުރުފުޅުގައި ވަނީ ދެޤައުމުގެ ދެމެދުގައިވާ ގުޅުން އިތުރަށް ހަރުދަނާ ކުރުމާއި ގުޅޭގޮތުން މަޝްވަރާކުރައްވާފައެވެ.
ރައީސްގެ އެ ދަތުރުފުޅަށް ފަހު ތުރުކީ ވިލާތާއި ރާއްޖެ އާއި ދެމެދު ތަރައްޤީގެ ގިނަ މަޝްރޫޢުތަކެއް މިހާރުވެސް ވަނީ ހިނގަން ފަށާފައެވެ. އަދި ހަމަ އެހެންމެ ރާއްޖޭގެ ޒުވާނުންނަށް ތައުލީމުގެ ގިނަ ފުރުޞަތުތަކެއްވެސް ވަނީ ތުރުކީވިލާތުން ތަނަވަސް ކޮށްދެއްވާފައެވެ.
Advertisement
This content is created and paid for by advertisers and does not involve Voice Journalists
