މާލޭގެ މިސްކިތްތައް ފޮޅާއި ސާފުކުރުމުގެ މަސައްކަތް، އެހެން ކުންފުންޏަކާއި ހަވާލުނުކޮށް، ސީދާ މާލޭ ސިޓީ ކައުންސިލުންގެ ބެލުމުގެ ދަށުން ކުރިއަށް ގެންދިއުމަށް އެ ކައުންސިލުން ނިންމައިފިއެވެ.
މި ނިންމުން ނިންމާފައި ވަނީ މިއަދު އޮތް މާލޭ ސިޓީ ކައުންސިލްގެ 4 ވަނަ ދައުރުގެ 134 ވަނަ ޖަލްސާގައެވެ.
މި ޖަލްސާގައި ވާހަކަ ދައްކަވަމުން މާލޭގެ މޭޔަރު އާދަމް އާޒިމް ވިދާޅުވީ އެ ކައުންސިލުން އެހެން ފަރާތްތަކާއި ހަވާލުކޮށްގެން ކުރަމުން އަންނަ މަސައްކަތަކުގެ ނަތީޖާ އެހާ ރަނގަޅު ކަމަށް ނުފެންނަ ކަމަށެވެ.
އަދި މިސްކިތް ސާފުކުރުމުގެ މަސައްކަތް އެހެން ބަޔަކާއި ހަވާލު ކޮށްގެން ކުރުމުންދާ ޚަރަދާއި، އެކަން އަމިއްލައަށް ކުރުމުން ދާނެ ޚަރަދާއި ގުޅޭގޮތުން ބެލި ބެލުމުން، އަމިއްލައަށް ސިޓީ ކައުންސިލުން އެމަސައްކަތް ކުރިޔަސް ވަކި އިތުރު ހަރަދެއް ނުހިނގާނެކަން އާޒިމް ފާހަގަކުރެއްވި އެވެ.
އެގޮތުން އާޒިމް ވިދާޅުވީ މިހާރު ކުންފުނިތަކުން އެ މަސައްކަތް ކުރަނީ މަހަކު 2.2 މިލިއަން ރުފިޔާއަށްކަމަށާ، ކައުންސިލުން އެ މަސައްކަތްކުރާއިރު ވެސް ހަރަދު ވަނީ 2.1 މިލިއަން ރުފިޔާ ކަމަށެވެ.
އާޒިމްގެ ވާހަކައަށް ތާއީދު ކުރައްވައި ޑެޕިއުޓީ މޭޔަރު އަހުމަދު ނަރީޝް ވިދާޅުވީ މިސްކިތްތައް ރަނގަޅަށް ނުބެލެހެއްޓޭކަމުގެ ޝަކުވާތައް ކައުންސިލަށް ލިބެމުން އަންނަކަމަށެވެ. އަދި ކުންފުނިތަކުން އެ މަސައްކަތް، ބިދޭސީންނާއި ހަވާލުކޮށްގެން ކުރަމުންދާއިރު އެމީހުންނަކީ ކައުންސިލަށް ޖަވާބުދާރީވެވޭނެ ފަދަ މުވައްޒަފުންތަކެއް ނޫންކަމަށް ނަރީޝް ވިދާޅުވިއެވެ.
އެހެންކަމުން ޖަލްސާގައި ބައިވެރިވި މެންބަރުންގެ ތާއީދާއެކު ވަނީ މިސްކިތް ސާފުކުރުމުގެ މަސައްކަތް ކައުންސިލާއި ހަވާލުކުރަން ނިންމާފައެވެ.
Advertisement
This content is created and paid for by advertisers and does not involve Voice Journalists
