މާލޭގެ މަގުތަކުގައި ގިނަދުވަސްވަންދެން ބޭނުން ނުކޮށް ހުރި ވެހިކަލްތައް ނަގާ ނައްތާލުމުގެ މަސައްކަތް މިއަދު ފަށައިފިއެވެ.

މާލެ އިންޑަސްޓްރިއަލް ވިލެޖުގައި ބޭއްވި ހާއްސަ ރަސްމިއްޔާތެއްގައި މި ޕްރޮގްރާމް އިފްތިތާހުކޮށްދެއްވީ ދަތުރުފަތުރާއި މަދަނީ އުދުހުންތަކާބެހޭ ވަޒީރު މުޙައްމަދު އަމީންއެވެ. މި ރަސްމިއްޔާތުގައި މާލޭ މޭޔަރ އާދަމް އާޒިމްގެ އިތުރުން މާލެ ސިޓީކައުންސިލްގެ މެމްބަރުންނާއި، ކަމާއި ގުޅުންހުރި ފަރާތްތައް ބައިވެރިވެ ވަޑައިގެންފައެވެ.

މި ޕްރޮގްރާމް ފަށްޓަވައިދެއްވަމުން ވަޒީރު ވިދާޅުވީ މާލޭގެ މަގުތަކުގައި ވެހިކަލްތައް ގިނަވެ، ތޮއްޖެހުމުގެ މައްސަލަކީ ވަރަށް ގިނަ ދުވަސްވެފައިވާ މައްސަލއެއް ކަމަށާއި ، މިއަދު މި ފެށުނު ޕްރޮގްރާމުގެ ސަބަބުން އެކަމަށް ހައްލު ލިބިގެންދާނެ ކަމަށެވެ.

Advertisement

" އުސޫލުތަކެއް ނެތި ރައްޔިތުންނަށް އުނދަގޫވާގޮތަށް ވެހިކަލްތައް ޕާކްކޮށްފައި މި ހުންނަނީ، މިއަދު މި ފެށޭ ޕްރޮގްރާމުގެ ދަށުން ކޮންމެވެސް ވަރެއްގެ ލުޔެއް އިހުސާސް ކުރެވޭނެ ކަމަށް ލަފާކުރެވޭ،" މިނިސްޓަރ އަމީން ވިދާޅުވިއެވެ.

މިރަސްމިއްޔާތުގައި ވާހަކަދައްކަވަމުން މާލެ މޭޔަރ އާދަމް އާޒިމް ވިދާޅުވީ މާލެ މަގުތަކުން ވެހިކަލްތައް މަދުކުރުމަށްޓަކައި ގިނަ މަސައްކަތްތަކެއް ކުރުމަށް ރާވާފައިވާކަމަށާއި، މައްސަލަ ހައްލުކުރުމަށްޓަކައި ގާނޫނު ތަންފީޒުކުރުމަށް ބާރު އަޅުއްވާނެކަށެވެ.

މިއަދު މި ފެށުނު ޕްރޮގްރާމު ފުރަތަމަ ބައެއްގެގޮތުގައި މާލޭގެ އެކި ހިސާބުތަކުގައި ޕާކްކޮށްފައި ހުރި ގިނަ ދުވަސްވެފައިވާ ވެހިކަލްތައް ނައްތާލުމުގެ މަސައްކަތް ވަނީ ކުރިއަށް ގެންގޮސްފައެވެ.

މި ޕްރޮގްރާމުގެ ދަށުން އަމިއްލައަށް އެދިގެން، އުޅަނދުތައް ނައްތާލަން ބޭނުންވާ ފަރާތްތަކަށް އެފުރުސަތުވެސް ވަނީ ހުޅުވާލާފައެވެ. އެފަދަ ފަރާތްތަކަށް މިނިސްޓްރީގެ ފަރާތުން އެހީތެރިކަން ފޯރުކޮށްދެއްވަނެ ކަމަށް މިނިސްޓްރީން ވަނީ ހާމަކުރައްވާފައެވެ.