ރައްޔިތުންގެ މަޖިލީހުގެ ޖުމުލަ މެންބަރުން ގުނާ މާއްދާތައް ބާތިލް ކުރަން ދައުލަތުގެ ބަންޑާރަނައިބުގެ ފަރާތުން ސުޕްރީމް ކޯޓަށް ހުށަހަޅާފައި ވަނިކޮށް، އެ މާއްދާތައް ޤަވާއިދުން އުނިކޮށް އެހެން މާއްދާއެއްގައި ހިމަނަން އާންމު ކޮމިޓީން ނިންމި ނިންމުން މިއަދު މަޖިލީހުން ފާސް ކޮށްފިއެވެ.

މިއަދު ކުރިއަށްދިޔަ މަޖިލިހުގެ ޖަލްސާގައި ބައިވެރިވި މެމްބަރުންގެ ތެރެއިން އިސްލާހު ފާސްކުރުމަށް 29 މެމްބަރަކު ވޯޓްދެއްވާފައި ވާއިރު އިސްލާހު ފާސްކުރަން ނުފެންނަ ކަމަށް 8 މެމްބަރަކު ވަނީ ވޯޓްދެއްވާފައެވެ.

މަޖިލިހުން މިއަދު މި ފާސްކުރި އިސްލާހް ގެނައުމަށް މަޖިލިހުގެ އާންމު ކޮމިޓީގެ ބައްދަލުވުމުގައި ނިންމީ މިމަހުގެ 15 ވަނަ ދުވަހުއެވެ. އެދުވަހުގެ ކޮމިޓީ ބައްދަލުވުމުގައި ނިންމާފައިވަނީ ގާނޫނު އަސާސީއާ ހިލާފުކަމަށް ބުނާ އެ ތިން މާއްދާ ގަވާއިދުން އުނިކޮށް އޭގެ ބަދަލުގައި ގަވާއިދުގެ 242 މާއްދާއަށް އަކުރެއް އިތުރުކޮށް އެ މާއްދާގައި ހިމެނުމަށެވެ.

މިއަދު މަޖިލިހުން ފާސްކޮށް ގަވާއިދު 242 އަކަށް އިތުރުކުރި ބައިގައި ބުނާގޮތުން ގާނޫނުއަސާސީގެ 78 ވަނަ މާއްދާގައި ބަޔާންކޮށްފައިވާ ރައްޔިތުންގެ މަޖިލީހުގެ މެންބަރަކު މެންބަރުކަމުން ވަކިވުމުގެ ސަބަބުން އެ ގޮނޑި ހުސްވި ތާރީހުން ފެށިގެން، ރައްޔިތުންގެ މަޖިލީހުގެ ކުރިއަށް އޮތް އާންމު އިންތިހާބާ ދެމެދު ހަ މަސް ދުވަސް ނުވަތަ އެއަށްވުރެ ކުރު މުއްދަތެއް އޮތްނަމަ އެ ގޮނޑިއަކަށް މެންބަރަކު އިންތިހާބު ކުރެވެން ނެތް ހާލަތުގައި ރައްޔިތުންގެ މަޖިލީހުގެ ޖުމްލަ މެންބަރުންގެ އަދަދު ގުނުމުގައި އެ ހުސްވި ގޮނޑި ނުހިމެނޭނެއެވެ.

ރައްޔިތުންމަޖިލިހުގެ ޤަވާއިދަށް މިއަދު މި ގެނައި ބަދަލާއިއެކު ރައީސާއި ނައިބު ރައީސް އަޒުލްކުރުމުގެ ބާރު އެމްޑީޕީއަށާއި ދަ ޑިމޮކްރެޓްސް ޕާރޓީއަށް ލިބިގެންދާނެއެވެ.

އެހެނީ ރައީސް ޑރ.މުހައްމަދު މުއިއްޒުގެ ސަރުކާރުގެ އިސް މަޤާމުތަކާއި ހަވާލުވެ ލެއްވުމަށް މަޖިލިހުގެ 7 މެމްބަރަކު، މެމްބަރުކަމުން އިސްތިއުފާ ދެއްވުމުން މިވަގުތު މަޖިލހުގައި ތިއްބެވީ ޖުމުލަ 80 މެމްބަރުންނެވެ. ޤަވާއިދަށް މިއަދު މި ގެނެވުނު ބަދަލާއިއެކު ރައީސާއި ނައިބު ރައީސް އަޒުލް ކުރުމަސް ބޭނުންވަނީ މަޖިލހުގެ 54 މެމްބަރުންގެ ވޯޓެވެ. އެމްޑީޕީ އާއި ޑިމޮކްރެޓްސް އެކުވުމުން މިއަދަދަށް ވުރެ މެމްބަރުނގެ އަދަދު އިތުރުވެގެން ދާނެއެވެ.

ޤާނޫނު އަސާސީގައި ކަނޑައަޅާފައިވާ ގޮތުން ނަމަ 19 ވަނަ މިޖިހުގައި ޖުމުލަ މެމްބަރުންގެ އަދަދު ގުނަން ޖެހޭނީ 87 މެމްބަރުން ކަމަށެވެ. އެ އަދަދަށް ބަލައިފި ނަމަ ރައީސާއި ނައިބު ރައީސް އަޒުލް ކުރެވޭނީ މަޖިލިހުގެ ތިންބައިބައިކުޅަ ދެބައިކަމަށްވާ 58 މެމަބަރުންގެ ވޯޓުންނެވެ. ނަމަވެސް މިހާރު މަޖިލިހުގައި މެމްބަރުން ތިބި އަދަދަށް ބަލާއިރު އެމްޑީޕީ އާއި ޑިމޮކްރެޓްސް އެކުވިޔަސް މިއަދަދަށް މެމްބަރުން ހަމައެއް ނުވާނެއެވެ.

މަޖިލިސް އިން މިފަދައިން ފާސްކޮށްފައިވާއިރު، ރައީސް އަޒުލުކުރުމާއި ގުޅޭ މާއްދާއަށް މަޖިލީހުން ގެނައި އިސްލާހާއި ގުޅޭ މައްސަލައިގެ އަޑުއެހުން ސުޕްރީމް ކޯޓުން ވަނީ މިމަހުގެ 21 ވާ ބުދަ ދުވަހަށް އަވަސް ކޮށްފައެވެ. މި މައްސަލައިގެ އަޑުއެހުން އޮންނާނީ އެދުވަހުގެ ހެނދުނު 10 ޖަހާއިރު އެވެ.