ދުބާއީގައި މިހާރު ކުރިއަށްދާ ބީޗު ސޮކާ ވޯލްޑްކަޕް 2024 ގެ ގުރޫޕް "ބީ" ގައި އީރާން އަދި ޓަހިޓީ ކުއާޓާ ފައިނަލުން ޖާގަހޯދިއިރު، މިގުރޫޕްގައި ހިމެނޭ އާޖެންޓީނާ އަދި ސްޕެއިން މުބާރަތުގެ ގުރޫޕް ސްޓޭޖުން ކަޓައިފި އެވެ.

ފެބުރުއަރީ 15-25 އަށް ދުބާއީގައި ކުރިއަށް މިމުބާރާތުގައި ޖުމްލަ 16 ޓީމު ވާދަކުރަމުން އަންނައިރު، މުބާރާތް ކުރިއަށް ދަނީ ހަތަރު ގުރޫޕަކަށް ބަހާލައިގެންނެވެ. ކޮންމެ ގުރޫޕަކުން ވެސް އެންމެ ރަގަޅު ނަތީޖާއެއް ހޯދާ ދެޓީމަށް ކުއާޓާގެ ފުރުސަތު ލިބޭ ގޮތަށެވެ.

ބީޗް ސޮކާ ވޯލްޑްކަޕްގައި ކޮންމެ މެޗެއްގައި 10 މިނެޓުގެ ތިން ހާފު އުޅޭއިރު، ގުރޫޕް ސްޓޭޖުގެ މެޗުތަކުގައި ވެސް ދެޓީމު އެއްވަރުވެއްޖެ ނަމަ އިތުރު ވަގުތުގެ އެއްހާފު ކުޅެ، ނަތީޖާއެއް ނުނެރެވިއްޖެ ނަމަ ޕެނަލްޓީ ޖަހައިގެން މޮޅުވާ ޓީމެއް ކަނޑައަޅާނީ އެވެ. އަދި މުބާރާތުގެ ގުރޫޕް ސްޓޭޖު މެޗުތަކުގައި މެޗުގެ ފުރިހަމަ ވަގުތުގެ ތެރޭގައި މޮޅުވެއްޖެ ނަމަ، މޮޅުވާ ޓީމަކަށް ތިން ޕޮއިންޓް ލިބޭއިރު، އިތުރު ވަގުތު ކުޅެގެން މޮޅުވެއްޖެނަމަ ލިބޭނީ ދެ ޕޮއިންޓެވެ. އަދި ޕެނަލްޓީ ޖަހައިގެން މޮޅުވާ ޓީމަކަށް ލިބޭނީ އެއް ޕޮއިންޓެވެ.

Advertisement

އެގޮތުން ގުރޫޕް އޭގެ އެއްވަނަ ޓީމުގެ ގޮތުގައި އީރާން ކުއާޓާ ފައިނަލުން ޖާގައެއް ކަށަވަރުކުރިއިރު، ޓަހިޓީ ކުއާޓާ ފައިނަލުން ޖާގަ ހޯދީ ގްރޫޕްގެ ދެވަނަ ޓީމުގެ ގޮތުގައެވެ. 

މުބާރާތުގައި އީރާނުން ކުޅުނު ފުރަތަަމަ މެޗުގައި ޕެނަލްޓީ ޖަހައިގެން 7-6 ގެ ނަތީޖާއަކުން ސްޕެއިން އަތުން މޮޅުވިއިރު، ދެވަނަ މެޗުގައި އެޓީމުން ވަނީ 6-3 ގެ ނަތީޖާއަކުން އާޖެންޓީނާ ބަލިކޮށްފައެވެ. އަދި ގުރޫޕް ސްޓޭޖުގެ ފަހުމެޗުގައި 5-3 ގެ ނަތީޖާއަކުން ޓަހިޓީ އަތުން މޮޅުވެ އެޓީމުން ގުރޫޕްގެ އެއްވަނަ ހޯދީ ކުޅުނު ތިން މެޗުން ލިބުނު 7 ޕޮއިންޓާއެކުގައެވެ.

ޓަހިޓީ ގެ ފުރަތަަމަ މެޗުގައި 4-3 ގެ ނަތީޖާއަކުން އާޖެންޓީނާ އަތުން މޮޅުވިއިރު، ދެވަނަ މެޗުގައި އެޓީމުން ވަނީ 5-3 ގެ ނަތީޖާއަކުން ސްޕެއިން ބަލިކޮށްފައެވެ. އަދި ގުރޫޕްގެ ފަހު މެޗުގައި 5-3 ގެ ނަތީޖާއަކުން އީރާން އަތުން ބަލިވި ނަމަވެސް ކުޅުނު ތިން މެޗުން ލިބުނު 6 ޕޮއިންޓާއެކު ގުރޫޕްގެ ދެވަނަ އެޓީމުން ވަނީ ކަށަވަރުކޮށްފައެވެ. އަދި މިގުރޫޕްގެ ތިންވަނަ ހޯދީ އާޖެންޓީނާ އެވެ.

އެޓީމުން ވަނީ ގުރޫޕް ސްޓޭޖުގެ ފަހުމެޗުގައި 5-4 ގެ ނަތީޖާއަކުން ސްޕެއިން ބަލިކޮށް ތިން ޕޮއިންޓް ހޯދާފައެވެ. އަދި މުބާރާތުގައި ކުޅުނު ތިން މެޗުން ވެސް ބަލިވެ ސްޕޭނުން ގުރޫޕް ސްޓޭޖުގެ މެޗުތައް ނިންމާލީ ގުރޫޕް ބީގެ ފުލުގައި އޮވެއެވެ.