ހުޅުމާލޭ މިދިލިމަގުން ދުއްވާފައިދިޔަ ދިޔަ ކާރެއް، އެ މަގުގައި،  ސޯލާ ޕެނަލްތައް ހަރުކުރުމަށް ޖަހާފައި ހުރި ހޮޅިތަކުގައި ޖެހި އަނެއްކާވެސް ނުރައްކާތެރި އެކްސިޑެންޓެއް ހިނގައިފި އެވެ. 

ފުލުހުންގެ މީޑިއާ އޮފިޝަލް ވިދާޅުވީ, ހުޅުމާލޭ މިދިލިމަގުން ދުއްވާފައިދިޔަ ކާރެއްސޯލާ ޕެނަލްތައް ހަރުކުރުމަށް ޖަހާފައި ހުރި ހޮޅިތަކުގައި ޖެހި އެކްސިޑެންޓް ހިނގާފައިވާ ކަމުގެ މައުލޫމާތު މިއަދު 8:45 ކަންހާއިރު ފުލުހުންނަށް ލިބިފައިވާ ކަމަށެވެ. 

އަދި މި އެކްސިޑެންޓްގައި ކާރު ދުއްވި މީހާއަށް އަނިޔާވެގެން ހުޅުމާލޭ ހޮސްޕިޓަލްގައި ފަރުވާދެމުން އަންނަ ކަމަށްވެސް އޮފިޝަލު ވިދާޅުވި އެވެ. 

Advertisement

މީގެ އިތުރުން މީޑިއާ އޮފިޝަލް ވިދާޅުވީ މި މައްސަލަ ތަހުގީގުކުރަމުންދާ ކަމަށެވެ. 

އެކްސިޑެންޓްގެ ވީޑިއޯ މީސްމީޑިއާގައި އާއްމު ވެފައިވާއިރު، އެ އެކްސިޑެންޓްގެ ސަބަބުން ކާރުގެ ކުރީ ކޮޅަށް ވަނީ ބޮޑެތި ގެއްލުން ތަކެއް ވެފައެވެ. އަދި ސޯލާ ޕެނަލްގެ ބައެއް ހޮޅިތައް ބިނދިފައިވާ އިރު އަނެއްބައި ހޮޅިތައް ވަނީ ގުދުވެފައެވެ. 

ދާދިފަހުންވެސް، އެ ސޯލާ ޕެނަލް ތަކުގެ ހޮޅިތަކުގައި ޖެހި ނުރައްކާތެރި އެކްސިޑެންޓެއް ހިނގާފައި ވެއެވެ. ނަމަވެސް އެ އެކްސިޑެންޓްގައި ކާރަށް ގެއްލުންވި ނަމަވެސް މީހަކަށް އަނިޔާވެފައެއް ނުވެއެވެ.