ދުބާއީގައި މިހާރު ކުރިއަށްދާ ބީޗު ސޮކާ ވޯލްޑްކަޕް 2024 ގެ ގުރޫޕް "ޑީ" ގައި އަންގާރަދުވަހުގެ ރޭ މެކްސިކޯ އާއި ދެކޮޅަށް ކުޅުނު މެޗު 4-3 ގެ ނަތީޖާއަކުން ކާމިޔާބުކޮށް ގުރޫޕްގެ އެއްވަނަ ޓީމުގެ ގޮތުގައި ބްރެޒިލް މުބާރާތުގެ ކުއާޓާ ފައިނަލުން ޖާގަ ހޯދައިފި އެވެ.

ފެބުރުއަރީ 15-25 އަށް ދުބާއީގައި ކުރިއަށް މިމުބާރާތުގައި ޖުމްލަ 16 ޓީމު ވާދަކުރަމުން އަންނައިރު، މުބާރާތް ކުރިއަށް ދަނީ ބައިވެރިވި 16 ޓީމު ހަތަރު ގުރޫޕަކަށް ބަހާލައިގެންނެވެ. ކޮންމެ ގުރޫޕަކުން ވެސް އެންމެ ރަގަޅު ނަތީޖާއެއް ހޯދާ ދެޓީމަށް ކުއާޓާގެ ފުރުސަތު ލިބޭ ގޮތަށެވެ.

ބީޗް ސޮކާ ވޯލްޑްކަޕްގައި ކޮންމެ މެޗެއްގައި 10 މިނެޓުގެ ތިން ހާފު އުޅޭއިރު، ގުރޫޕް ސްޓޭޖުގެ މެޗުތަކުގައި ވެސް ދެޓީމު އެއްވަރުވެއްޖެ ނަމަ އިތުރު ވަގުތުގެ އެއްހާފު ކުޅެ، ނަތީޖާއެއް ނުނެރެވިއްޖެ ނަމަ ޕެނަލްޓީ ޖަހައިގެން މޮޅުވާ ޓީމެއް ކަނޑައަޅާނީ އެވެ. އަދި މުބާރާތުގެ ގުރޫޕް ސްޓޭޖު މެޗުތަކުގައި މެޗުގެ ފުރިހަމަ ވަގުތުގެ ތެރޭގައި މޮޅުވެއްޖެ ނަމަ، މޮޅުވާ ޓީމަކަށް ތިން ޕޮއިންޓް ލިބޭއިރު، އިތުރު ވަގުތު ކުޅެގެން މޮޅުވެއްޖެނަމަ ލިބޭނީ ދެ ޕޮއިންޓެވެ. އަދި ޕެނަލްޓީ ޖަހައިގެން މޮޅުވާ ޓީމަކަށް ލިބޭނީ އެއް ޕޮއިންޓެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ތިންވަނަ ހާފުގެ ކުޅުން ނިމުނުއިރު، 3-3 ގެ ނަތީޖާއަކުން ދެޓީމް އެއްވަރުވެ، ނަތީއްޖާނެރުމަށްޓަކައި ކުޅެވުނު އިތުރު ވަގުތުގެ ތެރޭގައި ކާމިޔާބުކުރި ލަނޑާއެކު ބްރެޒިލް މެޗުން މޮޅުވީ 4-3 ގެ ނަތީޖާއަކުންނެވެ.

މުބާރާތުގައި ބްރެޒިލް ކުޅުނު ފުރަތަަމަ މެޗުގައި 3-5 ގެ ނަތީޖާއަކުން އޮމާން އަތުން މޮޅުވިއިރު، ދެވަނަ މެޗުގައި ޕޯޗުގަލް އަތުން އެޓީމު މޮޅުވީ އިތުރު ވަގުތުގެ ތެރޭގައި ކާމިޔާބުކުރި ލަނޑާއެކު 3-2 ގެ ނަތީޖާއަކުންނެވެ. އަދި މެކްސިކޯގެ ފުރަތަަމަ މެޗުގައި 8-2 ގެ ތަފާތުބޮޑު ނަތީޖާއަކުން ޕޯޗުގަލް އަތުން އެޓީމު ބަލިވިއިރު، ދެވަނަ މެޗުގައި އޮމާން އަތުން އެޓީމު ބަލިވީ 5-2 ގެ ނަތީޖާއަކުންނެވެ.

މިނަތީޖާއާއެކު މުބާރާތުގައި ކުޅުނު ތިން މެޗުން ލިބުނު 7 ޕޮއިންޓާއެކު ގުރޫޕްގެ އެއްވަނަ ޓީމުގެ ގޮތުގައި ބްރެޒިލް ކުއާޓާ ފައިނަލުން ޖާގަ ހޯދިއިރު، މިމެޗުން ބަލިވި މެކްސިކޯ މުބާރާތް ނިންމާލީ ކުޅުނު ތިން މެޗުން ވެސް ބަލިވެ ގުރޫޕްގެ ފުލުގައި އޮވެއެވެ.

މުބާރާތުގެ ކުއާޓާ ފައިނަލުގެ ފުރަތަަމަ މެޗުގައި ބުރާސްފަތި ދުވަހުގެ ހަވީރު ރާއްޖެ ގަޑިން 16:30 ބުރެޒިލް ނުކުންނާނީ ޖަޕާނާއި ދެކޮޅަށެވެ.