ކުރިއަށް އޮތް 20 ވަނަ ރައްޔިތުން މަޖިލިހުގެ އިންތިހާބަށް މޯލްޑިވިއަން ޑިމޮކްރެޓިކް ޕާޓީ އެމްޑީޕީގެ ކެންޕެއިން ރަސްމީކޮށް ލޯންޗުކުރުން މާދަމާރޭ އޮންނާނެކަމަށް އެޕާޓީން ބުނެފިއެވެ.

އެމްޑީޕީން ބުނެފައިވާ ގޮތުގައި އެޕާޓީގެ ފަރާތުން ކުރިއަށް އޮތް މަޖިލިސް އިންތިހާބުގައި ވާދަކުރާ ކެންޑިޑޭޓުންގެ ކެންޕެއިން ލޯންޗުކުރުން އޮންނާނީ މާދަމާރޭ 20:30 ގައި އާރޓިފިޝަލް ބީޗުގައެވެ.

"މިސްރާބު ހަމަމަގަށް" މި ޝިޢާރުގެ ދަށުން މާދަމާ ބޭއްވޭ އެމްޑީޕީގެ މި ހާއްޞަ އިވެންޓުގައި ބައިވެރިވުމުގެ ފުރުޞަތު ދިވެހި އެންމެހައި ރައްޔިތުންނަށް އެޕާޓީން ވަނީ ހުޅުވާލައިފައެވެ.

ކުރިއަށް އޮތް މަޖިލިސް އިންތިހާބަށް އެމްޑީޕީގެ ފަރާތުން ރަސްމީކޮށް ކެންޕެއިން ފެށުމުގެ ޖަލްސާ މާދަމާ ރޭ ބޭއްވުމަށް ހަމަޖެހިފައިވާއިރު، ކުރިއަށް އޮތް މަޖިލިސް އިންތިހާބުގައި އެންމެ ގިނަ ކެންޑިޑޭޓުން ވާދަކުރުމަށް އީސީއަށް ފޯމް ހުށަހަޅާފައި ވަނީވެސް އެމްޑީޕީގެ ފަރާތުންނެވެ. އެގޮތުން އެމްޑީޕީގެ ފަރާތުން މިފަހަރުގެ އިންތިހާބުގައި 90 ކެންޑިޑޭޓުން ވާދަކުރުމަށް ފޯމް ހުށަހަޅާފައި ވެއެވެ.

އިލެކްޝަން ކޮމިޝަން، އީސީން ހާމަކޮށްފައިވާ ގޮތުގައި ކުރިއަށް އޮތް ރައްޔިތުންގެ މަޖިލިހުގެ އިންތިހާބުގައި 368 ކެންޑިޑޭޓަކު ވާދަކުރާނެއެވެ. އެއީ 42 އަންހެނުންނާއި އަދި 326 ފިރިހެނުންނެވެ.

ކުރިއަށް އޮތް 20 ވަނަ ރައްޔިތުންގެ މަޖިލިހުގެ އިންތިޚާބު ބާއްވަން އިލެކްޝަން ކޮމިޝަނުން ކަނޑައަޅާފައި ވަނީ މިއަންނަ މަހުގެ 17 ވަނަ ދުވަހެވެ. ނަމަވެސް ރައްޔިތުންގެ މަޖިލިހުން މިހާރު ވަނީ ރޯދަ މަސް ނިމޭތާ 10 ދުވަސް ފަހުން އިންތިޚާބު ބާއްވަން ޖެހޭގޮތަށް ޤާނޫނު އިސްލާހުކޮށްފައެވެ. އިންތިހާބާއި ބެހޭ ޤާނޫނަށް މި ގެނައި އިސްލާހަށް އަމްލަކުރަން ޖެހޭނީ ރައީސުލްޖުމުހޫރިއްޔާ އެ އިސްލާހް ތަސްދީގު ކުރެއްވުމުންނެވެ. އަދި މިހާތަނަށް އެއިސްލާހް ރައީސުލްޖުމްހޫރިއްޔާ ތަސްދީޤް ކުރައްވާފައެއް ނުވެއެވެ.