ހުޅުމާލޭގައި ފުޓްސަލް އަދި ނެޓުބޯޅަ ކޮމްޕްލެކްސްއެއް ތަރައްގީ ކުރުމަށް ދިވެހި ސަރުކާރާއި، ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އާއި ދެމެދު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި އެޗްޑީސީގެ ފަރާތުން ސޮއިކުރައްވާފައި ވަނީ މެނޭޖިން ޑިރެކްޓަރު އިބްރާހިމް ފަޒުލް ރަޝީދެވެ. އަދި ސަރުކާރުގެ ފަރާތުން ސޮއިކުރައްވާފައި ވަނީ ސްޕޯޓްސް މިނިސްޓަރު އަބްދުالله ރާފިއު އާއި ފިނޭންސް މިނިސްޓަރު ޑރ. މުހައްމަދު ޝަފީގެވެ.

އެޗްޑީސީގެ ފަރާތުން މަޢުލޫމާތު ދެއްވިގޮތުގައި މިއަދު މި ސޮއިކުރެވުނު އެއްބަސްވުމުގެ ދަށުން ތަރައްޤީ ކުރުމަށް ހަމަޖެހިފައިވާ ފުޓްސަލް އަދި ނެޓްބޯޅަ ކޮމްޕްލެކްސް އަކީ މުޖުތަމައުގައި ކުޅިވަރާއި، ދުޅަހެޔޮ ސިއްހަތަށް އޮންނަ ޝައުގުވެރިކަން އިތުރުކުރުމުގެ ގޮތުން ތަރައްޤީ ކުރެވިގެންދާނެ ދެ ކޮމްޕްލެކްސްއެވެ.

Advertisement

އެޗްޑިސީން އިތުރަށް ހާމަކޮށްފައިވާ ގޮތުގައި ހުޅުމާލޭގައި ފުޓްސަލް އަދި ނެޓްބޯޅަ ކޮމްޕްލެކްސްއެއް ތަރައްޤީ ކުރުމަކީ ރައީސުލްޖުމުހޫރިއްޔާ ޑރ.މުހައްމަދު މުއިއްޒުގެ ހަފްތާ 14 ގެ ވައުދުގެ ތެރޭގައި ވެސް ހިމެނޭ ކަމެކެވެ.  

މި ސަރުކާރުގެ ފަރާތުން ކުޅިވަރުގެ ވަސީލަތްތައް ތަރައްޤީ ކުރުމަށާއި ޒުވާނުންގެ ހުނަރުވެރިކަން އިތުރުކުރުމަށްޓަކައި އަންނަނީ ގިނަ ގުނަ ކަންތައްތަކެއް ކުރަމުންނެވެ. އެގޮތުން މާލޭގައި ހުރި ކުޅިވަރުކުޅޭ ބައެއް ތަންތަން މަރާމާތުކޮށް ތަރައްޤީކުރުމުގެ މަސައްކަތްތައް ކުރަމުންދާއިރު ޒުވާނުންގެ ހުނަރުތައް ދައްކާލުމަށް ހަފްތާ ބަންދާއި ދިމާކޮށް ގެންދަނީ ހާއްޞަ ހަރަކާތްތަކެއް ހިންގަމުންނެވެ.