ކުރިއަށް އޮތް ރައްޔިތުންގެ މަޖިލިހުގެ އިންތިހާބުގައި ވޯޓު ވިއްކައިފި ނަމަ، އެއީ ޖީލެއް ހަލާކުކޮށްލުމަށް ދެވޭ ވޯޓެއް ކަމުގައި އަދާލަތު ޕާޓީގެ ޓިކެޓުގައި ވައިކަރަދޫ ދާއިރާ އަށް ވާދަކުރައްވާ ޙުސައިން ޘަޤީފް މިއަދު ވިދާޅުވެއްޖެއެވެ.

އަންނަ މަހުގެ 17 ވަނަ ދުވަހު އޮންނަ ރައްޔިތުންގެ މަޖިލިހުގެ އިންތިހާބާ ދިމާކޮށް ޕީއެސްއެމް ނިއުސް އިން ގެނެސްދޭ "މަޖިލިސް ބަހުސް 2024" ގައި ވާހަކަ ދައްކަވަމުން ޘަޤީފް ވިދާޅުވީ އިންތިހާބުތަކުގައި ވޯޓު ގަނެ، ވިއްކުން ހުއްޓުވޭނީ ރައްޔިތުންނަކީ ފުދުންތެރިކަން ހުރި ބަޔަކަށް ހަދައިގެން ކަމަށެވެ. ވޯޓު ވިއްކުމަކީ ކުށަކަށް ވިޔަސް، އެކަން ސާބިތު ކުރުމަކީ މި މުޖުތަމައުގައި ދަތިކަމެއް ކަމަށް ވެސް އޭނާ ވިދާޅުވިއެވެ.

އެހެންކަމުން އެކަން ކަން ފަސޭހަ އިން ސާބިތު ކުރެވޭނެ ގޮތަކަށް ގާނޫނު ބަދަލު ކުރަން ޖެހޭ ކަމަށާއި އޭނާއަކީ އަބަދުވެސް އެކަމާ ދެކޮޅަށް ވަކާލާތުކޮށް އަޑު އުފުލާ މީހެއް ކަމަށް ވެސް ޘަޤީފް ވިދާޅުވިއެވެ. އަދި އޭނާއަކީ ފާޅުގައި އެކަމާ ދެކޮޅު ހަދާ މީހެއް ކަމަށް ވެސް ޘަޤީފް ވިދާޅުވިއެވެ.

Advertisement

ޘަޤީފް ވިދާޅުވި ގޮތުގައި ތައުލީމީ ގާބިލް މީހުންނާއި ފަސްބައި ސާފު މީހުން އެކަހެރިކޮށް ނާގާބިލް މީހުން ކަންކަމަށް މަތިކޮށް އެމީހުންގެ ބާރު ހިންގާއިރު މިއަދު ވިސްނާ ނުލައި ވޯޓު ވިއްކާލައިފި ނަމަ، އެއީ އަނެއްކާ ވެސް ޖީލެއް ހަލާކުކޮށްލުމަށް ދެވޭ ވޯޓެކެވެ.