ރައްޔިތުންގެ މަޖިލީހުން މި ސަރުކާރުގެ ތިން ވަޒީރަކަށް ރުހުން ނުދިނީ ބޭރުގެ ބަޔަކު މަޖުބޫރުކޮށްގެން، އެނޫން އެހެން ގޮތެއް ނެތީގެން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރޭ ހދ. ނޮޅިވަރަންފަރުގައި ބޭއްވި ޖަލްސާގައި ވާހަކަ ދައްކަވަމުން ރައީސް ވިދާޅުވީ، ރިޔާސީ ނިޒާމަކުން، ރައްޔިތުން ވެރިޔަކު އިންތިޚާބު ކުރުމުން، އެ ވެރިމީހާ، ކެބިނެޓަށް ނަގާ މީހުންގެ ޝަރުތުތައް ހަމަވާނަމަ، އަބަދުވެސް ރުހުން ދޭ ކަމަށެވެ. މިހާތަނަށްވެސް ރާއްޖޭގައި ކަން ހިނގަމުން އައީ އެފަދައިން ކަމަށާ، ވަޒީރުންނަށް ނަތީޖާ ނުނެރެވޭ ނަމަ، ނޫނީ ޒިންމާދާރުކަން ކުޑަނަމަ ނުވަތަ އިތުބާރު ގެއްލިއްޖެ ނަމަ ސުވާލުކޮށް މަގާމުން ވަކިކުރެވޭ ކަމަށް ރައީސް ވިދާޅުވިއެވެ.
އެހެން ނަމަވެސް، އެ ފަދައިން ކަނޑ ނުކޮށް، ކެބިނެޓަށް އައްޔަން ކުރި ބައެއް ވަޒީރުންނަށް ރުހުން ނުދޭން، މަޖިލީހުގެ މެޖޯރިޓީ ޕާޓީ، އެމްޑީޕީން ނިންމި ކަމަށާ، އެ ޕާޓީން އެކަން ކުރީ ބޭރުގެ ބަޔަކު މަޖުބޫރު ކޮށްގެން ކަމަށް ރައީސް ތުހުމަތު ކުރެއްވި އެވެ.
"އެހެން ނަމަވެސް އެއްވެސް އަސާސެއް ނެތި ނޫންތޯ އަޅުގަނޑުމެންގެ ބައެއް ވަޒީރުންނަށް ރުހުން ނުދިނީ. އެކަން ކުރަމުން ދިޔަގޮތް އަޅުގަނޑުމެންނަށްވެސް މަޢުލޫމަތު ލިބޭ. އެބޭފުޅުންގެ މައްޗަށް ބާރު ހިންގާ، ރާއްޖެއިން ބޭރުގެ ކޮންމެސް ބަޔަކު، އަމުރު ކުރާގޮތަށް، މަޖުބޫރުވެގެން، ތިމަންނަމެންނަށް ޖެހެއޭ ތިން، ހަތަރު ވަޒީރުންނަށް ރުހުން ނުދޭން. އެހެން އަޅުގަނޑުމެންގެ އެމްޕީ އިންކައިރީވެސް ބުނަމުންދިޔައީ. ތި އެންމެނަށް ނުދެވޭނެއޭ ރުހުމެއް. 'ތިމަންނަމެން ކޮންމެހެންވެސް ޖެހެއޭ ދެތިން މީހުން ދުއްވާލަން.' ހަމަ އެ ލޭންގުއޭޖް ބޭނުން ކުރެއްވީ (އެމްޑީޕީ މެންބަރުން)"
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
މީގެ އިތުރުން ރައީސް މުޢިއްޒު ވިދާޅުވީ، ކޮންމެ ބަޔަކު މަޖިލީހަށް އިންތިޚާބު ކުރި ނަމަވެސް، ރައްޔިތުން ބޭނުންވާ ކަންކަން ކޮށްދިނުމަށް ސަރުކާރަށް އެއްބާރުލުން ދޭންޖެހޭނެކަމަށާ އެހެން ނަމަވެސް އެގޮތަށް އެކަން ނުވާ ކަމަށެވެ.
މިވޭތުވެދިޔަ ތިން މަހަށް ބަލާލިޔަސް އެއޮތީ ފެންނަން އެތައް މިސާލެއް. ބަޖެޓުގެ ވާހަކަ މިދައްކަނީ. އަޅުގަނޑުމެންނަށް ނަމެއްގައި ފުރުސަތު ދިނީ. ހަމަ ރަނގަޅަށް އެނގޭ ނޫންތޯ؟ މިއީ އާ ސަރުކާރެއްކަން. އެހެންވީމާ ފުރުސަތު ދޭންޖެހޭނީ އަޅުގަނޑުމެންނަށް ކަން. އެކަމަކު ނުދީ، ހިނގަހިނގާ ހުންނަ މަޝްރޫޢުތަކަށް ފުލް ބަޖެޓް ނުދިނީ އަޅުގަނޑުމެންނަށް އުނދަގޫ ކުރަން.
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
ރައީސް ވިދާޅުވީ، އެފަދައިން ބަޖެޓަށް ހެދުމުން އެކަމުގެ ހުރިހާ ގެއްލުމެއްވެސް ލިބެނީ ރައްޔިތުންނަށް ކަމަށެވެ.
ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ 22 ވަޒީރުންނަށް ރުހުންދޭން ދައުރުން ބޭރުން މިދިޔަ މަހު 29 ގައި ބޭއްވި ޖަލްސާގައި ތިން ވަޒީރަކަށް އިދިކޮޅު އެމްޑީޕީ އާއި، އެޕާޓީ އާއިއެކު މަޖިލިސް ތެރެއިން ކޯލިޝަން ހެދި ޑިމޮކްރެޓްސް އިން ވަނީ ރުހުން ނުދެއެވެ.
އެއީ؛
ބަންޑާރަނައިބު އަހުމަދު އުޝާމް
ހައުސިން މިނިސްޓަރު ޑރ. އަލީ ހައިދަރު
އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު
އެހެން ނަމަވެސް، ރައީސް މުޢިއްޒު ވަނީ ރުހުން ނުލިބުނު ވަޒީރުން ހަމަ އެ މަގާމުތަކަށް އަލުން އައްޔަންކުރައްވައި، ހުވާ ލައިދެއްވާފައެވެ.
Advertisement
This content is created and paid for by advertisers and does not involve Voice Journalists
