މޯލްޑިވިއަން ޑިމޮކްރެޓިކް ޕާޓީ އެމްޑީޕީން އަނެއްކާވެސް މި ނިކުތީ ފާލުން ނައްޓާފައިވާ ސަރުކާރެއް ހަމަ މަގަށް އަޅުވަންކަމަށް ރައްޔިތުންގެ މަޖިލިހުގެ އިންތިޚާބަށް އެޕާޓީން ކަނޑައެޅުއްވި ތަރުޖަމާނު ކެނދިކުޅޫދޫ ދާއިރާގެ މެމްބަރު އަހުމަދު އީސާ ވިދާޅުވެއްޖެއެވެ.
އީސަ މިފަދައިން ވިދާޅުވެފައިވަނީ ތަރުޖަމާނުކަމުގެ ހައިސިއްޔަތުން ފުރަތަމަ ބޭއްވި ނޫސްވެރިންގެ ބައްދަލުވުމުގައި މިއަދު ވާހަކަ ދައްކަވަމުންނެވެ.
މިއަދުގެ މި ނޫސްވެރިންގެ ބައްދަލުވުމުގައި އީސަ ވިދާޅުވީ މި ސަރުކާރަށް މިވީ ކުރު މުއްދަތުގެ ތެރޭގައި ޑިމޮކްރަސީ އާއި ބީރައްޓެހި ވަރަށް ގިނަ ކަންތައްތަކެއް މި ސަރުކާރު ކޮށްފައިވާ ކަމަށާއި އަދި މިހާރުވެސް ކުރަމުންދާކަމަށެވެ.
އެގޮތުން އޭނާ ފާހަގަކުރެއްވީ މިސަރުކާރުން މަޖިލިހުގެ ބާރުތަކަށް އިހުތިރާމްކުރުން ހުއްޓާލާފައިވާ ކަމަށާއި، މަޖިލިހުގެ ނިންމުންތަކަށް ގޮންޖައްސަވަމުންދާ ކަމަށެވެ. އަދި މަޖިލިހުން ފާސްކުރާ ބިލްތައް ގާނޫނަށް ވިޔަނުދީ ހިފަހައްޓަވާ، މަޖިލިހުގެ ކޮންމެ ނިންމުމެއް ހިއްޕަވައިގެން ކޯޓްތަކަށް ވަޑައިގަންނަވަން ފައްޓަވާފައިވާކަމަށެވެ.
ހަމަ މިއާއިއެކު އީސަ ވިދާޅުވީ މިއިން ދުވަހަކު ސަރުކާރަކުން އިންތިހާބަކަށް ނުފޫޒު ނުފޯރުވާ މިންވަރަށް މި ސަރުކާރުން ކުރިއަށް އޮތް މަޖިލިސް އިންތިހާބު ކާމިޔާބު ކުރުމަށް ނުފޫޒު ފޯރުވަމުންދާ ކަމަށެވެ. އެގޮތުން ދައުލަތުގެ ވަޒީރުންގެ އިތުރުން ކުންފުނިތަކުގެ އެމްޑީންވެސް މިކަންތަކުގައި އިސްދައުރެއް އަދާކުރައްވަމުންދާ ކަމަށެވެ.
"އަޅުގަނޑުމެން މިފަހަރު އަނެއްކާވެސް މިނިކުތީ ފާލުން ނައްޓާފައި އޮތް ސަރުކާރު, ދައުލަތް ހަމަމަގަށް އަޅުވަން އަޅުގަނޑުމެން ނިކުމެ މިތިބީ"
މަޖިލިހުގެ އިންތިޚާބަށް އެމްޑީޕީން ކަނޑައެޅުއްވި ތަރުޖަމާނު ކެނދިކުޅޫދޫ ދާއިރާގެ މެމްބަރު އަހުމަދު އީސާ ވިދާޅުވިއެވެ.
އީސަ އިތުރަށް ވިދާޅުވީ މި ސަރުކާރުން އިތުރަށް ގާނޫނު އަސާސީއަށް ގޮންޖަހަން ފުރުޞަތު ނުދެއްވާނެ ކަމަށާއި، ރައްޔިތުންގެ ހައްގުތަކަށް އަރައިގަންނަންވެސް ފުރުޞަތު ނުދެއްވާނެކަމަށެވެ. އަދި ކުރިއަށް އޮތް މަޖިލިސް އިންތިހާބު ބޮޑުތަނުން އެމްޑީޕީން ކާމިޔާބު ކުރާނެ ކަމަށެވެ.
Advertisement
This content is created and paid for by advertisers and does not involve Voice Journalists
