ފަލަސްތީނު ރައްޔިތުންގެ ގަތުލު އާއްމުތައް ހިންގައި ބަނޑަށް ޖައްސައި މަރަމުންދާ ހައްދު ފަހަނައަޅައިފައިވާ އިސްރާއީލުން އިންޑިއާއަށް ކަނޑައަޅާފައިވާ އެމްބެސެޑަރު ބައިވެރިވެވަޑައިގެން ސުލްހައާއި އަމާންކަމަމުގެ މައްޗަށް ވާހަކަދެއްކި ފޯރަމެއްގައި ރާއްޖޭގެ ކުރީގެ އެމްޑީޕީ ސަރުކާރުގެ ޑިފެންސް މިނިސްޓަރ މާރިޔާ އަހްމަދު ދީދީ ބައިވެރިވެވަޑައިގެން ވާހަކަފުޅު ދައްކަވައިފިއެވެ.

މިފޯރަމަކީ ހަނގުރާމައިގެ ދުވަސްތަކެއް ނޫންކަމާއި އިންޑިއާއަކީ ދުނިޔޭގެ ސުލްހައަށް މަސައްކަތްކުރާ ގައުމެއް ކަމަށް ކަނޑައެޅިފައި އޮތް މައުޟޫއަކަށް ވާހަކަ ދެކެވުނު ފޯރަމެކެވެ.

މިފޯރަމްގައި ބައިވެރިވި އިސްރާއީލުގެ އެމްބެސެޑަރ ނައޯރގިލޯންއަކީ އިންޑިއާގެ އިތުރަށް ސްރީލަންކާއާއި ބޫޓާނަަށްވެސް އިސްރާއީލުން ކަނޑައަޅާފައި ހުންނަ އެމްބެސެޑަރެވެ.

Advertisement

މާރިޔާ ދީދީގެ އިތުރަށް ދެން މި ފޯރަމްގައި ވާހަކަދެއްކީ އިންޑިއާއިން އދއަށް ކަނޑއަޅާފައި ހުންނަ ކުރީގެ ޕާމަނަންޓް ރެޕްރެޒެންޓެޓިވްއެވެ.

މިފޯރަމްގައި މާރިޔާދީދީ ދެއްކެވީ ކޮން ވާހަކައެއް ކަމެއް އަދި ރަނގަޅަކަށް ނޭނގެއެވެ.

އެކަމަކު މައުޟޫއަށް ބަލާނަމަ އޭނަގެ ވާހަކަ ބިނާކޮށްފައި އޮންނާނީ އިންޑިއާއަކީ މިސަރަހައްދުގެ ސުލްހަ މަސަލަސްކަމަށް ލޯބިކުރާ ގައުމެއްކަމަށް ދެއްކުމަށެވެ.

ހައިރާންވާންޖެހޭ ކަމަކީ އިންޑިއާގެ މަސްލަހަތުގެ މައްޗަށް މާރިޔާ ވާހަކަ ދެއްކުމެއް ނޫނެވެ. އެކަމަކު މުޅި ދުނިޔޭގެ ކުރިމަތީގައި ފަލަސްތީނުގެ ރައްޔިތުން މަރައި ޣައްޒާގެ ބިން މުސްލިމުންގެ ލެއިން ކަޅިކުރަމުންދާ އަދި ދުނިޔޭގެ ހުރިހައި ގާނޫނެއް މުގުރަމުންދާ ޖައްބާރު އެޕަތައިޑް ދައުލަތެއް ތަމްސީލުކުރާ މީހަކާއެކު ދުނިޔޭގެ ސުލްހައޭ އަމާންކަމޭ ހަނގުރާމައެއް ނޫނޭ ކިޔައިގެން އަނގަހުޅުވާލަން ކެރިވަޑައިގެންނެވީތީއެވެ.

އެމެރިކާ ފިޔަވައި ދުނިޔޭގެ ހުރިހާ ގައުމަކުންނާއި އދގެ  ޖަމްއިއްޔާ ޖަމާއަތްތަކުންނާއި ބައިނަލް އަގުވާމީ ކޯޓުން އިސްރާއީލުގެ އަނިޔާވެރިކަމާއި ގަތުލުއާއްމުގެ ވާހަކަ ދައްކަދައްކައި އޮއްވައި އިންޑިއާއިން އެގައުމުގެ ބުރުސޫރަ ދައްކުވަން އިސްރާއީލުގެ ވެރިޔަކު ކުރިއަށް ނެރުމަކީ މުސްލިމުންގެ މޫނުމަތީގައި ޖެހި އެތިފަހަރެކެވެ. މިފޯރަމްގައި މާރިޔާ ދިދީ ބައިވެރިވެވަޑައިގެންނެވުމަކީ ދިވެހިރާއްޖޭގެ ރައްޔިތުންނަށް ކުރި ފުރައްސާރައެކެވެ. މަލާމާތެކެވެ.

މާރިޔާ ދީދީ އިންޑިއާއަށް ވަޑައިގެން މިއުޅުއްވަނީ "ފަސްޓްޕޯސްޓް ޑިފެންސް ސަމިޓް" ކިޔާ ސަމިޓެއްގައި ބައިވެރިވެވަޑައިގަތުމަށް އިންޑިއާއިން ދިން ދައުވަތަކަށެވެ.

މިސަމިޓްގައި ވާހަކަފުޅު ދައްކަވަމުން ރާއްޖޭގެ މިހާރުގެ ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒަކީ ތަސައްރަފް ނުފުދޭ ބޭފުޅެއްކަމަށް ވިދާޅުވިކަމަށް އިންޑިއާގެ ނޫސްތަކުން ރިޕޯޓްކޮށްފައި ވެއެވެ. އިންޑިއާ ސިފައިން ރާއްޖޭގައި ތިބުމަކީ ރާއްޖޭގެ އިސްގުލާލަށް އެއްވެސް ބުރުލެއް އަރާނެ ކަމެއް ނޫންކަމަށް އޭނަ ވިދާޅުވިކަމަށްވެސް ނޫންތަކުން ބުނެފައިވެއެވެ. މުއިއްޒަކީ އެހެން މީހެއްގެ ހިޔަނީގައި މަސައްކަތްކުރައްވާ ބޭފުޅެއްކަމަށްވެސް ވިދާޅުވެފައިވެއެވެ.

އިންޑިއާ ސިފައިން ރާއްޖޭގައި ތިބީ އެމްޑޯޕީގެ ވެރިކަމުގައި ދިވެހިސަރުކާރުން އެދިގެން އިންސާނީ އެހީތެރިކަން ފޯރުކޮށްދިނުމަށްކަމަށްވެސް ވިދާޅުވެފައިވެއެވެ.

އޭނަގެ ވާހަކައިގައި އިންޑިއާއާއެކު އެމްޑީޕީ ސަރުކާރުން ގެންގުޅުނު ސިޔާސަތުތައް ދިފާއުކުރައްވައި ރައީސް ޑޮކްޓަރ މުއިއްޒަށް ވަރަށް ބޮޑަށް ފާޑުވިދާޅުވެފައިވެއެވެ. ދިވެހިރާއްޖޭގެ އިގްތިސާދު އޮތީ ވަރަށް ނިކަމެތި ހާލެއްގައިކަމަށްވެސް ވިދާޅުވެފައިވެއެވެ.